الماتىدا ينۆاتاكسي قىزمەتى بويىنشا ىلكى جوبا ىسكە قوسىلدى. جوبا وسى جىلدىڭ قىركۇيەگىنە دەيىن ەكى اي ىشىندە پيلوتتىق رەجيمدە ىسكە اسىرىلادى.

بۇل تۋرالى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ ايتتى.

سپيكەردىڭ سوزىنشە، مەگاپوليستە «ينۆاتاكسي» قىزمەتىن 2 مىڭنان استام ادام پايدالانادى، ونىڭ 800-ءى مۇگەدەك بالا. بيىل ينۆاتاكسي قىزمەتىن ۇيىمداستىرۋعا جەرگىلىكتى بيۋدجەتتەن 920 ملن تەڭگە ءبولىندى.

«بۇعان دەيىن مەگاپوليستە قوسىمشا قاجەتتىلىگى بار ادامداردى تاسىمالداۋعا مامانداندىرىلعان كولىك تاپشىلىعى بايقالعان بولاتىن جانە دە ينۆاتاكسي قىزمەتتەرىنىڭ ساپاسىنا قاتىستى ەسكەرتۋلەر بولعان. كورسەتىلەتىن قىزمەتتەردى بارىنشا قامتۋ جانە ساپاسىن ارتتىرۋ ءۇشىن الماتى قالاسى اكىمدىگىنىڭ باستاماسىمەن جانە ەڭبەك مينيسترلىگىنىڭ قولداۋىمەن «ياندەكس. تاكسي» اگرەگاتورى ارقىلى ينۆاتاكسي قىزمەتتەرىن ۇسىنۋ جوباسى جۇزەگە استى»، - دەدى باۋىرجان جاۋباسوۆ.

سونىمەن قاتار، ول جوبا اياسىندا وڭ ناتيجەلەرى بويىنشا قر ەڭبەك جانە حالىقتى الەۋمەتتىك قورعاۋ مينيسترلىگى نورماتيۆتىك-قۇقىقتىق اكتىلەرگە ءتيىستى وزگەرىستەر ەنگىزۋدى جوسپارلاپ وتىرعانىن اتاپ ءوتتى.

قىزمەتتى جەتكىزۋشىلەر ءۇشىن ياندەكس تاكسي پلاتفورماسىندا ەسەپتىك جازبالار جاسالدى جانە مۇگەدەكتىگى بار ادامداردى پيلوتتىق جوباعا قوسۋ مۇمكىندىگى بەرىلدى.

وسى پيلوتتىق جوباعا قوسىلعان مۇگەدەكتىگى بار ادامدار «ياندەكس تاكسي» قوسىمشاسى ارقىلى قىزمەتتەرگە تاپسىرىس بەرۋدى ىڭعايلى ۋاقىتتا ياندەكس Go قوسىمشاسىندا ارنايى ازىرلەنگەن «INVA» ءتاريفى ارقىلى دەربەس جۇزەگە اسىرا الادى.

بۇل پيلوتتىق جوبادا جول جۇرىسىنە شەكتەۋ بار. مۇگەدەكتىگى بار ءبىر ادام ءۇشىن كۇنىنە 2 ساپاردان اسپايتىن ليميت بەلگىلەنگەن.

فوتو: اشىق دەرەككوزدەن

Abai.kz