سولتۇستىك قازاقستان وبلىسى تايىنشا اۋدانىنداعى «EMS AGRO» شوشقا كەشەنىندە ءتورت جۇمىسشى قازا تاپتى. وقيعا بولعان نوۆويۆانوۆكا ەلدى مەكەنىنە ءوڭىر باسشىسى ايداربەك ساپاروۆ باردى.

سقو اكىمدىگى ءباسپاسوز قىزمەتىنىڭ مالىمەتىنشە، جاۋاپكەرشىلىگى شەكتەۋلى سەرىكتەستىگىنىڭ ءتورت جۇمىسشىسى اۋىسىم اياقتالىسىمەن مال بورداقىلاۋ الاڭىنان شىقپاعان.

كەيىن تەكسەرۋ بارىسىندا ولاردىڭ تەرەڭدىگى 8 مەترلىك كارىزدىك جيناقتاۋشىنى تازالاۋ بارىسىندا قازا تاپقاندىعى انىقتالدى.

وقيعا ورنىنا سقو اكىمى ايداربەك ساپاروۆ، ونىڭ ءبىرىنشى ورىنباسارى مارات تاسماعانبەتوۆ، وبلىستىق پوليتسيا دەپارتامەنتىنىڭ باستىعى ايدىن قابدۇلدينوۆ، تايىنشا اۋدانىنىڭ پروكۋرورى عالىمجان اۋباكىروۆ جانە مەملەكەتتىك ەڭبەك ينسپەكتسياسى باسقارماسىنىڭ باستىعى مارات وماروۆ باردى.

وبلىس اكىمىنىڭ تاپسىرماسىمەن ارنايى كوميسسيا قۇرىلدى.

ءتورت جۇمىسشىنىڭ مەرت بولۋىنا نە سەبەپ بولعاندىعى انىقتالىپ جاتىر. ءوڭىر باسشىسى ولاردىڭ وتباسىلارىنا بارىپ، كوڭىل ايتتى.

Abai.kz