الماتىدا ءورت شىققان ۇيدە ورتكە قارسى قورعانىس جۇيەسى ىستەمەگەن. بۇل تۋرالى «اقكەنت» شاعىناۋدانىنداعى كوپپاتەرلى تۇرعىن ۇيدەگى ءورت وقيعاسى بويىنشا وتكەن ءباسپاسوز ءماسليحاتىنان ءمالىم بولدى.

الماتى قالالىق تجد باستىعىنىڭ مىندەتىن اتقارۋشى پولكوۆنيك ەرلان الىبەكوۆتىڭ ايتۋىنشا، كوپپاتەرلى تۇرعىن-ءۇيدىڭ وڭتۇستىك جاعىندا ءورت ءسوندىرۋ تەحنيكاسىنا ارنالعان پودەزد بولماعان. سول سەبەپتى سول جەردە ورنالاسقان پاتەرلەردىڭ ەسىكتەرىن قولمەن سىندىرىپ، اۆتو ساتىلار ءۇشىن جول اشۋعا تۋرا كەلگەن.

«بۇل جۇمىستارعا ءبىراز ۋاقىت كەتتى. ايتۋ كەرەك، ءۇيدىڭ تۇرعىندارىنىڭ بارلىعى كوندومينيۋم وكىلدەرى جانە ولار ينجەنەرلىك جابدىقتاردىڭ، ونىڭ ىشىندە ورتكە قارسى قورعانىس جۇيەلەرىنىڭ ۇقىپتى ساقتالۋىنا جاۋاپتى. كەشەگى جاعداي تۇرعىن ۇيدەگى تۇتىنگە قارسى قورعانىس جۇيەسىنىڭ جۇمىس ىستەمەيتىنىن كورسەتتى. ەگەر ول جۇمىس ىستەسە قاباتتاردى قاتتى ءتۇتىن باسپاس ەدى»، - دەدى ەرلان الىبەكوۆ.

ول سونداي-اق مۇنداي ۇيلەردە اپاتتىق شىعۋ جولى رەتىندە 5-ءشى قابباتان باستاپ جوعارى قاباتتاردىڭ بالكوندارىنا دەيىن جالعاسقان ليۋكتەر بولاتىنىن ايتتى.

«ولاردىڭ بارلىعى جابىق بولدى، ەگەر اشىق بولعان بولسا، جوعارعى قاباتتارداعى تۇرعىندار 5-ءشى قاباتقا دەيىن ءتۇسىپ، ارى قاراي ءبىزدىڭ ءورت سوندىرۋشىلەر ولاردى ەۆاكۋاتسيالايتىن ەدى»، - دەدى سپيكەر.

ەسكە سالساق، ءبىز بۇعان دەيىن 16 قاباتتى ۇيدە ورت تۇتانعانىن حابارلاعان ەدىك.

قىزىل جالىن ساعات 18:46 كەزىندە وقشاۋلانىپ، سوندىرىلدى.

31 ادام، ونىڭ ىشىندە 16 بالا اۋرۋحاناعا جەتكىزىلگەن بولاتىن.

امالى قالماعان تۇرعىندار بالالارىن تەرەزەدەن لاقتىردى.

زارداپ شەككەندەردىڭ ىشىندە 2 جۇكتى ايەل بار.

كەيىن الماتى قالالىق دەنساۋلىق ساقتاۋ باسقارماسى ءبىر ادامنىڭ قازا تاپقانىن حابارلادى.

ورتتەن زارداپ شەككەن تۇرعىندار تاماق جانە جاتىن ورىنمەن قامتاماسىز ەتىلدى.

Abai.kz