دارىگەرلەر قاراعاندىداعى بالالارعا ارناۋلى الەۋمەتتىك قىزمەت كورسەتۋ ورتالىعىندا ۋلانعان بالالاردىڭ جاعدايى تۋرالى مالىمەت بەردى، دەپ حابارلايدى Ulysmedia.kz.

بۇدان بۇرىن 1 تامىزدا اۋرۋحاناعا تاعى ەكى بالا جەتكىزىلگەنىن حابارلانعان بولاتىن. دارىگەرلەردىڭ ايتۋىنشا، ولاردىڭ جاعدايى تۇراقتى.

«ستاتسيونارلىق ەم الىپ جاتقان بالالاردىڭ جاعدايى تۇراقتى. 1 تامىزدا تۇسكەن ەكى پاتسيەنتتىڭ بىرەۋىنىڭ جاعدايى ورتاشا، ەكىنشىسىنىڭ جاعدايى قاناعاتتانارلىق. ەكەۋى دە بولىمشەدە»، - دەپ حابارلادى قاراعاندى وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى.

اق حالاتتىلاردىڭ ايتۋىنشا، التى بالا ءالى دە جانساقتاۋ بولىمىندە جاتىر.

31 شىلدەدە اۋرۋحاناعا تۇسكەن باسقا بالالاردىڭ جاعدايى وڭالىپتى. ەكەۋى ۇيلەرىنە جىبەرىلگەن، تاعى بەسەۋى ينفەكتسيالىق بولىمشەدە ەم الىپ جاتىر.

«قازىرگى ۋاقىتتا وبلىستىق كلينيكالىق اۋرۋحانانىڭ ينفەكتسيالىق ورتالىعىنىڭ بولىمشەسىندە ەمدەلىپ جاتقان ەكى بالانىڭ جاعدايى جاقسارۋىنا بايلانىستى، اۋرۋحانادان شىعارىلدى. ولار ءماس دارىگەرىنىڭ باقىلاۋىندا»، - دەلىنگەن حابارلامادا.

ەسكە سالايىق، 30 شىلدەدە قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بالالار جاپپاي ۋلانعانى حابارلانعان.

دەنساۋلىق ساقتاۋ مينيسترلىگىنىڭ مالىمەتىنشە، بالالاردىڭ ۋلانۋىنا تاماقتىڭ قاتىسى جوق.

بالالار قۇقىقتارى جونىندەگى ۋاكىل وسى وقيعادان كەيىن ەلدەگى 84 الەۋمەتتىك مەكەمەنىڭ بارلىعى ءجىتى تەكسەرىلەتىنىن مالىم ەتتى.

سونداي-اق، قاراعاندىدا بالالار ۋلانعان ورتالىقتىڭ 12 قىزمەتكەرى جۇمىستان شەتتەتىلگەنى بەلگىلى بولدى.

بۇدان بۇرىن پورتالىمىزدىڭ ءتىلشىسى نەيروپسيحياتريالىق اۋرۋلارى بار بالالار ەم قابىلدايتىن جابىق مەكەمەدە نە بولعانىن انىقتاۋعا تىرىسىپ كورگەن.

فوتو: اشىق دەرەككوزدەن

Abai.kz