استانادا قارجى (ينۆەستيتسيا) پيراميداسىن قۇرۋ جانە باسقارۋ فاكتىسى بويىنشا «Sincere Systems» جشس باسشىلىعىنا قاتىستى سوت ۇكىمى شىقتى. بۇل تۋرالى قارجى مونيتورينگى اگەنتتىگى حابارلادى.

جشس 2020 جىلدان بەرى جۇمىس ىستەگەن جانە كريپتوۆاليۋتا بيرجالارىمەن ىنتىماقتاساتىن كومپانيانىڭ اتىن جامىلىپ، ازاماتتاردان قاراجات جيناعان.

سالىمشىلاردىڭ سانىن كوبەيتۋ ءۇشىن ويدان شىعارىلعان جوبالارعا ينۆەستيتسيا سالۋ مۇمكىندىگى قاراستىرىلعان.

– كليەنتتى ينۆەستيتسيانىڭ قاۋىپسىز ەكەندىگىنە سەندىرۋ ءۇشىن ID بەرۋ ارقىلى كليەنتتىڭ جەكە كابينەتى تىركەلگەن، سالىمعا تەڭ ۆيرتۋالدى قاراجاتپەن تولىقتىرۋ مۇمكىندىگى بار ۆەب-سايت قۇرىلدى، – دەلىنگەن رەسمي اقپاراتتا.

ازاماتتاردان جينالعان قاراجات كولەمى 215 ملن تەڭگەنى قۇرادى.

سوت ۇكىمىمەن «Sincere Systems» جشس باسشىسى 5 جىلعا ينۆەستيتسيالىق قىزمەتپەن اينالىسۋعا تىيىم سالىنىپ، 6 جىلعا شارتتى تۇردە باس بوستاندىعىنان ايىرىلدى.

ايتا كەتەيىك، بۇعان دەيىن قارجى مونيتورينگى اگەنتتىگىنىڭ اقتوبە وبلىسى بويىنشا دەپارتامەنتى «Sincere Systems» (S-Group) قارجى پيراميداسىن قۇرۋ جانە باسقارۋ ءىسىن تەرگەپ جاتقانى بەلگىلى بولدى. ىس بويىنشا ازاماتتاردى كومپانياعا تىركەلۋگە شاقىرعان ەكى ازاماتقا قاتىستى تەرگەۋ ءجۇرىپ جاتىر.

Abai.kz