30 تامىزدان باستاپ، جول ەرەجەسىن بۇزعان ساموكاتشىلارعا ايىپپۇل سالىنادى. بۇل تۋرالى قر ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا ايتتى.

پرەزيدەنت 29 ماۋسىم كۇنى «جول قوزعالىسىن ۇيىمداستىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. زاڭ رەسمي تۇردە جاريالاندى جانە 30 تامىزدان باستاپ قولدانىسقا ەنگىزىلەدى.

وسى زاڭ ارقىلى «جول قوزعالىسى تۋرالى» زاڭعا تۇزەتۋلەر ەنگىزىلدى، ولار كولىك قۇرالدارىنىڭ جاڭا تۇرلەرىنىڭ – «ەلەكتر سكۋتەرى» مەن «شاعىن ەلەكتر كولىك قۇرالدارىنىڭ» مارتەبەسىن انىقتادى.

شاعىن ەلەكتر كولىگىنە گيروسكۋتەرلەر، سيگۆەيلەر، مونوكولىكتەر، ەلەكتر سكەيتبوردتار جانە باسقا تۇرلەرى جاتادى.

ال، ەلەكترلىك سكۋتەر – ەكى نەمەسە ءۇش دوڭگەلەگى بار، ەلەكتر قوزعالتقىشىن پايدالانۋ ارقىلى ءبىر ادامنىڭ قوزعالۋىنا ارنالعان، ورىندىعى جوق، ماكسيمالدى كونسترۋكتيۆتىك جىلدامدىعى ساعاتىنا 25 شاقىرىمنان اسپايتىن ەلەكترلى كولىك قۇرالى.

بۇل - ولاردى پايدالانۋ ءتارتىبىن زاڭنامالىق تۇرعىدان بەكىتۋدەگى العاشقى قادام. بۇعان دەيىن ەلەكتر ساموكاتتارى مەن شاعىن ەلەكتر كولىكتەرى زاڭ اياسىنان تىس قالاتىن. ەندى ءبىرىنشى كەزەكتە ءبىز ولاردى قاۋىپسىز پايدالانۋ جونىندەگى تالاپتاردى بەكىتتىك. بۇل جولاۋشىلاردى تاسىمالداۋعا، جاياۋ جۇرگىنشى وتكەلدەرىنەن وتۋگە، جارىق شاعىلىستىراتىن زاتتاردى قولدانۋعا جانە باسقا دا جولداعى جەكە قاۋىپسىزدىك ماسەلەلەرىنە قاتىستى، - دەدى سپيكەر.

قولدانىستاعى زاڭنامادا وسى زاڭبۇزۋشىلىقتار ءۇشىن جاۋاپكەرشىلىك قاراستىرىلعان. وسىلايشا، قۇقىقبۇزۋشىلىقتار انىقتالسا، ولار اقبتك 593-بابى (5 اەك ايىپپۇل) نەمەسە اقبتك 620-بابى (ەسكەرتۋ نەمەسە 3 اەك ايىپپۇل) بويىنشا جاۋاپقا تارتىلادى.

اكىمدىكتەرمەن جانە كيكشەرينگتىك كومپانيالارمەن بىرلەسىپ، تروتۋارلاردا، جولداردا جانە ۆەلوسيپەد جولدارىندا قوزعالىس جىلدامدىعىن باعدارلامالىق رەتتەۋدى ەنگىزەمىز. قۇقىقبۇزۋشىلاردىڭ جەكە باسىن انىقتاۋ جانە سكۋتەرمەن جاسالعان قىلمىستاردى اشۋ ءۇشىن سكۋتەردى كىم، قاشان جانە قانداي مارشرۋت بويىنشا پايدالانعانىن ەسەپكە الامىز. سكۋتەرلەر تۇراعى ءۇشىن ارنايى ورىنداردى انىقتايمىز، - دەدى ا. بورانوۆا.

Abai.kz