ءماجىلىس دەپۋتاتى سامات مۇساباەۆ كوپشىلىكتىڭ كوكەيىندە جۇرگەن وتاندىق اۋە كومپانيالاردىڭ ساعاتتاپ كەشىگۋ ماسەلەسىن جۇيەلى تۇردە كوتەرىپ كەلەدى. بىلتىر ماجىلىستە "كولىك تۋرالى" زاڭ تالقىلانعاندا، وعان "تاسىمالداۋشى تاراپ ۇشاق، پويىز، اۆتوبۋس قۇرالدارىن كەشىكتىرگەن ءار ساعاتقا بيلەت قۇنىنىڭ 3% وتەماقى رەتىندە قايتارۋى ءتيىس" دەگەن تۇزەتۋدى سامات مۇساباەۆ پەن ەدىل جاڭبىرشين ۇسىنعان بولاتىن.

دەپۋتاتتىڭ ايتۋىنشا، ۇشاق، پويىز نەمەسە اۆتوبۋس ءبىر ساعات كەشىكسە 3%، ەكى ساعاتقا 6%، وسىلايشا قوسىلا بەرەدى. ءتىپتى، بۇلاي جالعاسا بەرسە جولاۋشى بيلەت قۇنىن تولىق قايتارىپ الۋىنا دا مۇمكىندىك بار.

– بۇل، ارينە، تاسىمالداۋشىلارعا ۇناعان جوق. الايدا، حالىققا كەرەك تۇزەتۋ، ەل ۇنەمى شاعىمداناتىن نارسە بولعان سوڭ سوزىمىزدەن تانباي، ايتقاننان قايتپادىق. اقىرى، ءماجىلىس زاڭعا تولىقتىرۋ ەنگىزدى، سەنات ماقۇلدادى، قاڭتار ايىندا پرەزيدەنت قول قويدى. ءسۇيتىپ، وسى جىلدىڭ باسىنان بەرى بۇل زاڭ كۇشىندە! – دەدى س.مۇساباەۆ.

زاڭعا ءتيىستى تۇزەتۋدى ەنگىزىپ، ۇشاقپەن كەشىگىپ ۇشىپ، ءوزى تاجىريبەدەن وتكەن دەپۋتات سامات مۇساباەۆ كومپانيانىڭ رەسمي سايتىنا كىرىپ، شاعىم قالدىرۋ ءۇش قادامدىق جۇمىس ەكەنىن ايتادى. ءۇش ساعاتتان استام ۋاقىت ءۇشىن بيلەت قۇنىنىڭ 10% سوماسىن قايتارىپ العان دەپۋتات ءبارىن رەتىمەن تۇسىندىرگەن.

1) كومپانيانىڭ رەسمي سايتىنا كىرەسىز. تىكەلەي سىلتەمە: help.airastana.com. وسى جەرگە تولىق اتى-ءجونىڭىزدى، بيلەت ءنومىرىن، رەيس ءنومىرى، ۇشۋ ۋاقىتى قانشاعا كەشىككەنى جانە ەلەكترون پوشتاڭىزدى جازاسىز. ياعني، شاعىم قالدىراسىز.

2) support@help.airastana.com - تۇتىنۋشىلاردىڭ قولداۋ بولىمىنەن جاۋاپ كەلەدى، ء"سىزدىڭ شاعىمىڭىز تىركەلدى" دەگەن جاۋاپ بولادى جانە قوسىمشا انكەتا جولدانادى. وسى انكەتاداعى سۇراقتارعا جاۋاپ بەرەسىز. اتى-ءجونىڭىز بەن اقشانى قايتارۋ ءۇشىن ەسەپشوت ءنومىرىڭىزدى جازاسىز.

3) ء"وتىنىشىڭىز بويىنشا تالاپ ەتكەن وتەماقى سوماسى ءسىزدىڭ شوتىڭىزعا جىبەرىلدى" دەگەن حابارلاما كەلەدى. وسىلايشا، ءسىز ءماجىلىس قابىلداعان زاڭنىڭ يگىلىگىن كورەسىز!

دەگەنمەن، سامات مۇساباەۆتىڭ پىكىرىنشە، ءبىر رەيسپەن 180 جولاۋشى كەلەتىن بولسا، سولاردىڭ اراسىنان كومپانياعا شاعىم ءتۇسىرىپ، وتەماقى تالاپ ەتەتىندەر از.

– ەگەر، سول 180 ادامنىڭ ارقايسىسى شاعىم جاساپ، كەم دەگەندە 8 - 9 مىڭ تەڭگەدەن وتەماقى الاتىن بولسا، سول كۇنى كەشىككەن ءبىر رەيس ءۇشىن شامامەن 1 440 000 تەڭگەدەي وتەماقى تولەگەن بولار ەدى... ءار رەيس ءۇشىن ءبىر جارىم ميلليون تولەپ وتىرۋ كىمگە ۇنايدى؟ كەلەسىدە كەشىكپەۋدى ۇيرەنەر ەدى! – دەيدى دەپۋتات.

Abai.kz