اقتاۋدا شاحماتتان مەكتەپ كوماندالارى اراسىنداعى الەم چەمپيوناتى ءوز مارەسىنە جەتتى.

كىشى جاستاعى (12 جاسقا دەيىنگى) توپتا Velammal MHS Mogappair كومانداسىنا تەڭ كەلەر قارسىلاس تابىلمادى - ءۇندىستاننان كەلگەن وقۋشىلار بارلىق سەگىز كەزدەسۋدە جەڭىسكە جەتتى.

ەكىنشى ورىن مەن كۇمىس مەدالدار ۋكراينانىڭ Lviv Academic Gymnasium (لۆوۆ ق.) كومانداسىنا بۇيىردى. ءۇشىنشى ورىنعا بىردەن بەس كوماندا تالاستى، ولاردىڭ تورتەۋى قازاقستان نامىسىن قورعاعان ەدى. قولا جۇلدەگەر قوسىمشا كورسەتكىشتەر بويىنشا انىقتالدى. ناتيجەسىندە مەدالدار استانا قالاسىنىڭ رەسپۋبليكالىق فيزيكا-ماتەماتيكا مەكتەبىنىڭ الانبەك جاينازاروۆ، ءامىر جۇكەنوۆ، ميراس حاسەنوۆ، ايسۇلتان انەتوۆ ەسىمدى وقۋشىلارىنىڭ قانجىعاسىندا كەتتى.

ەرەسەكتەر توبىندا (18 جاسقا دەيىن) تۇركيالىق Istanbul ENKA High School كومانداسىنىڭ شاحماتشىلارى تۋرنير اياقتالۋعا ءبىر كۇن قالعاندا التىن مەدال الۋدىڭ قامىن جاساۋدا الدىنا جان سالمادى.

الماتىلىق وقۋشىلار ايرىقشا توزىمدىلىگى مەن جەڭىسكە دەگەن جىگەرىن كورسەتتى. چەمپيوناتتىڭ قورىتىندى كۇنىنىڭ قارساڭىندا ولار جەتىنشى ورىنعا عانا قول جەتكىزە العان ەدى. بىراق 7-ءشى جانە 8-ءشى تۋرداعى ەكى جەڭىس رفمش كومانداسىنا (الماتى ق.) كوماندالىق ۇپايلار بويىنشا ءۇندىستان كومانداسىن قۋىپ جەتۋگە، ال قوسىمشا كورسەتكىشتەر بويىنشا قارسىلاستارىنان ءتىپتى اسىپ ءتۇسىپ، كۇمىسكە قول جەتكىزۋگە مۇمكىندىك بەردى. كۇمىس جۇلدەگەرلەر اراسىندا ەدگار مامەدوۆ، يمانعالي احيلباي، ءامىر يگەن، زارينا نۇرعاليەۆا، ءاليحان داۋلەت بار. ءوز كەزەگىندە ۇندىلىك Velammal Vidyalaya Alapakkam (چەنناي ق.) كومانداسىنىڭ وقۋشىلارى قولا مەدالعا يە بولدى.

جەڭىمپازدارعا سىي-قۇرمەت كورسەتۋ راسىمىندە قازاقستان شاحمات فەدەراتسياسى پرەزيدەنتى تيمۋر تۋرلوۆ اتالمىش تۋرنير قازاقستاننىڭ عانا ەمەس، بۇكىل الەمنىڭ سپورتتىق ومىرىندەگى ماڭىزدى وقيعاعا اينالعانىن اتاپ ءوتتى.

«بۇگىن مۇندا الەمنىڭ 50-دەن استام ەلىنەن ونداعان كوماندا جينالدى. بۇل - بۇكىل الەمدە شاحمات قوزعالىسىنىڭ ەرەكشە تانىمالدىعىنىڭ جانە قازاقستاننىڭ الەمدىك شاحمات سالاسىنداعى ىقپالىنىڭ ايقىن كورسەتكىشى. وسى تۋرنير جۇزدەگەن جاس شاحماتشىلاردىڭ مانسابىنىڭ باستاماسىنا اينالعانىنا، سونىمەن قاتار جاڭا دوستار جانە نيەتتەس جولداستار تابۋعا، اقتاۋدىڭ اسەم جەرلەرىن تاماشالاۋعا جانە قازاق مادەنيەتىمەن جاقىنىراق تانىسۋعا ​​مۇمكىندىك بەرگەنىنە سەنىمدىمىن»، - دەدى تيمۋر تۋرلوۆ.

ماڭعىستاۋ وبلىسىنىڭ اكىمى نۇرلان نوعاەۆ الداعى ۋاقىتتا مۇنداي تۋرنيرلەر اقتاۋدا جالعاسىن تاباتىنىنا سەندىردى.

«بىرنەشە كۇن بويى وتكەن حالىقارالىق شاحمات ءتۋرنيرى اياقتالدى. وسى ستراتەگيالىق ماڭىزى بار سايىستا ءبىزدىڭ وقۋشىلار تاپقىرلىقتارىن، تەرەڭ بىلىمدەرىن، ءتىل تابىسا ءبىلۋ داعدىلارىن كورسەتتى. ەل پرەزيدەنتى قاسىم-جومارت توقاەۆ استانادا وتكەن شاحماتتان الەم چەمپيوناتىنىڭ اشىلۋىندا ايتقانداي، شاحمات – ادام اقىلىن شىڭدايتىن سپورت. بۇل اقىل-ويدى دامىتاتىن قىزىقتى ويىن عانا ەمەس، سونىمەن قاتار ادامنىڭ ساناسىنا وڭ اسەر ەتەتىن قۇندى قۇرال. وسى سپورت تۇرىمەن شۇعىلداناتىن بالالارىمىز بەن جاسوسپىرىمدەرىمىز تاپقىرلىق پەن جاسامپازدىق قابىلەتتەرىن شىڭداپ، اينالاسىنا ۇلگى بولادى»، - دەپ اتاپ ءوتتى نۇرلان نوعاەۆ.

چەمپيوناتتىڭ جابىلۋ سالتاناتى كاسپي تەڭىزىنىڭ جاعالاۋىنداعى امفيتەاتردا ءوتىپ، اسەرلى وتشاشۋمەن اياقتالدى.

ەرەسەكتەر توبىندا ءبىرىنشى ورىن العان تۇركيا كومانداسىنىڭ ويىنشىسى يشيك دجان اتاپ وتكەندەي، چەمپيونات بارلىق قاتىسۋشىلار ءۇشىن عالامات شاحمات مەرەكەسىنە اينالدى. «مەن بۇرىن-سوڭدى شاحمات جارىستارىندا مۇنداي كەرەمەت قويىلىم كورگەن ەمەسپىن. چەمپيونات وتە جوعارى دەڭگەيدە ءوتتى»، - دەدى شاحماتشى.

ەسكە سالا كەتەيىك، چەمپيونات 4-7 تامىز ارالىعىندا ءوتىپ، الەمنىڭ 53 ەلىنەن 400-دەن استام مەكتەپ وقۋشىلارىنىڭ باسىن قوسقان بولاتىن. شارانى حالىقارالىق جانە قازاقستان شاحمات فەدەراتسيالارى ۇيىمداستىردى. باس سەرىكتەس جانە باس دەمەۋشى «Freedom Holding Corp» بولدى. شارا ماڭعىستاۋ وبلىسى اكىمدىگىنىڭ، قازاقستان رەسپۋبليكاسى وقۋ-اعارتۋ مينيسترلىگىنىڭ جانە قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن ءوتتى.

Abai.kz