اقتوبەدە جات اعىمنىڭ جەتەگىندە كەتكەن سەگىز ادامنىڭ سوتتالعانى حابارلاندى. ولار بىرلەسكەن تۇردە تۇرعىنداردىڭ اقشاسىن تارتىپ الىپ، كولىگىن يەمدەنىپ وتىرعان. قولىنا تۇسكەن "قۇربانداردى" جابىرلەپ، ۇرىپ-cوققان، دەپ حابارلايدى "ادىرنا" ۇلتتىق پورتالى. 

ءمالىم بولعانداي, سوتتالۋشىلاردىڭ سەگىزى دە بۇرىن ءىستى بولعان. تۇرمەدەن شىققاننان كەيىن دە بىرگە ءجۇرىپ قىلمىستىق توپ قۇرعان. بىلتىر جازدا قالا تۇرعىنىن ۇرلاپ كەتىپ، كولىك جوندەيتىن ورتالىققا قاماعان. سول جەردە ۇرىپ-سوعىپ، قورقىتىپ، 2 ميلليونىن تارتىپ العان. سونىمەن قاتار جابىرلەنۋشىنىڭ اتىنان نەسيە راسىمدەگەنى دە بەلگىلى بولىپ وتىر. ودان كەيىن تاعى ءبىر تۇرعىندى ۇرلاپ كەتىپ، تەحنيكالىق قىزمەت كورسەتەتىن ورتالىقتا ابدەن قيناعان. قاراقشىلار بىراق ودان اقشا تابا المايدى. تارتىپ الار دۇنيەسى بولماعان سوڭ، جابىرلەنۋشىنىڭ كولىگىن يەمدەنگەن.

تەرگەۋشىلەر سوتتالۋشىلاردى دەسترۋكتيۆتى ءدىني اعىم وكىلدەرى دەپ وتىر. ولار جەتى مەن توعىز جىل ارالىعىندا جازا ارقالادى:

«كۇدىكتىلەر بۇرىن باس بوستاندىعىنان ايىرۋ تۇرىندەگى جازاسىن وتەگەننەن كەيىن، ادامدارمەن الدىن الا ءسوز بايلاسىپ، مۇلىكتەر مەن اقشالاي قاراجاتتى اقتوبە تۇرعىندارىنان كۇش قولدانۋ ارقىلى يەمدەنگەن. مەملەكەتتىك ايىپتاۋشىنىڭ پىكىرىمەن كەلىسىپ، ولاردى كىنالى دەپ تانىپ، ارقايسىسىنا 7 جىلدان 9 جىلعا دەيىنگى مەرزىمگە باس بوستاندىعىنان ايىرۋ جازاسىن تاعايىندادى»،-دەيدى اقتوبە پروكۋراتۋراسىنىڭ ءبولىم پروكۋرورى اسەل وتەنوۆا.

Abai.kz