استانا - «QazaqGaz» ۇك” اق باسقارما توراعاسى سانجار جاركەشوۆ كۇزگى-قىسقى جىلىتۋ ماۋسىمىنا دايىندىق بارىسىندا استانا قالاسىنىڭ گازبەن جابدىقتاۋ وبەكتىلەرىن تەكسەردى.  

جۇمىس ساپارى اياسىندا ۇلتتىق كومپانيا باسشىسى جەو-2 نىسانىنداعى گاز رەتتەۋ پۋنكتى، جەو-3 قۇرىلىسى الاڭى، سونىمەن قاتار، قۇرىلىسى ءجۇرىپ جاتقان “يۋگو-ۆوستوك” گازبەن جىلىتۋ ستانتسياسىنا باردى. باسقارما توراعاسىنا وبەكتىلەردىڭ بۇگىنگى كۇي-جايى مەن وبەكتىلەردەگى گاز جەتكىزەتىن ينفراقۇرىلىم قۇرىلىسىنىڭ اياقتالىپ قالعاندىعى ايتىلدى.

«بۇگىن ەلورداداعى جەو جىلىتۋ ماۋسىمىنا دايىندىعىمەن تانىستىق. قالا اكىمدىگى ەنەرگەتيكالىق جوبالار بويىنشا اۋقىمدى جۇمىستاردى اتقارىپ جاتىر.  QazaqGaz تاراپىنان استانانىڭ گاز ينفراقۇرىلىمى كۇزگى-قىسقى جىلىتۋ ماۋسىمىنا دايىن، تۇرعىندار گازبەن قامتاماسىز ەتىلەدى. بارلىق وبلىستاعى وسىنداي وبەكتىلەردىڭ جۇمىسىن پىسىقتايمىز. بۇگىندە وڭىرلەردە كۇزگى-قىسقى جىلىتۋ كەزەڭىنە دايىندىق 82%-دى قۇرايدى، بەلگىلەنگەن كەستەدەن وزىپ كەلەمىز»، – دەدى QazaqGaz باسشىسى.

مەملەكەت باسشىسىنىڭ تاپسىرماسىن ورىنداۋ اياسىندا جەو-3 نىسانىنىڭ قۇرىلىس الاڭى دا تەكسەرىلدى. بۇگىندە قالا اكىمدىگى وبەكتىدەگى قۇرىلىس-مونتاج جۇمىستارىن جاساپ جاتىر.  وبەكتىنى پايدالانۋعا بەرۋ 2023-2024 جىلىتۋ ماۋسىمىنىڭ قارساڭىنا جوسپارلانۋدا.

بۇدان باسقا، استانا قالاسىنىڭ اكىمدىگى “يۋگو-ۆوستوك” گازبەن جىلىتۋ ستانتسياسىنىڭ قۇرىلىسىن جۇرگىزۋدە. اتالعان نىسان ىسكە قوسىلعاننان كەيىن، “مىڭجىلدىق” دەپ اتالاتىن جاڭا تەمىرجول ۆوكزالىنىڭ اۋدانى جىلۋمەن قامتاماسىز ەتىلەدى. ايتا كەتۋ كەرەك، اتالعان نىسان قۇرىلىسى دا بەلگىلەنگەن كەستەدەن بۇرىن ورىندالۋدا.

Abai.kz