پەتروپاۆل جەو-2-دە سالىنىپ جاتقان ءتۇتىن مۇرجاسى وسىنەن ءبىر جاعىنا قيسايدى. نىسانداعى قۇرىلىس جۇمىستارى توقتاتىلدى.

قالادا جاڭا ءتۇتىن مۇرجاسى پيزا مۇناراسىنا ۇقسايدى دەگەن قاۋەسەت راستالدى. «سەۆكازەنەرگو» اق ءباسپاسوز قىزمەتى قۇرىلىستىڭ توقتاتىلعانىن حابارلادى.

«8 تامىزدا سەۆكازەنەرگو اق-نىڭ جاڭا ءتۇتىن مۇرجاسىن سالۋ بارىسىندا ورىندالاتىن قۇرىلىس-مونتاجداۋ جۇمىستارىنىڭ ساپاسىن قاداعالايتىن جاۋاپتى قىزمەتكەرلەرى مۇرجا ءوسىنىڭ جوبالىق ەرەجەدەن اۋىتقىعانىن انىقتادى. مەردىگەر ۇيىم - «قازتەپلوسپەتسستروي» جشس. مۇرجانى سالۋ جۇمىستارى دەرەۋ توقتاتىلدى. وبەكتىنى تەكسەرۋ كەزىندە قۇبىر وقپانىنىڭ قۇرىلىسى جۇرگىزىلىپ جاتقان كونۋستىق جىلجىمالى قالىپتا وسىنەن قيسايۋعا اسەر ەتكەن اقاۋ تابىلعانى انىقتالدى»،-دەپ ءتۇسىندىردى ءباسپاسوز قىزمەتىنەن.

قۇبىردىڭ قانشا مەترىن بولشەكتەۋگە تۋرا كەلەتىنى جوبالىق ۇيىم جۇرگىزەتىن ەسەپتەۋدەن كەيىن بەلگىلى بولادى. سونىمەن قاتار، قالىپتى بولشەكتەۋ جۇمىستارى جۇرگىزىلەدى.

«بيىكتىك بەلگىسىن انىقتاعاننان كەيىن بولشەكتەۋ جۇمىستارى ورىندالادى. بۇدان ءارى بارلىق قاۋىپسىزدىك نورمالارى مەن تالاپتارىن ساقتاي وتىرىپ، جاڭا قالىپ سالىنادى. قۇبىر قۇرىلىسى بويىنشا جۇمىستار قىسقا مەرزىمدە قايتا باستالادى»، - دەپ تولىقتىردى ءباسپاسوز قىزمەتىنەن.

وتكەن جىلدىڭ ناۋرىز ايىندا قۇلاعان مۇرجانىڭ ورنىنا سالىنىپ جاتقان جاڭا مۇرجانىڭ بيىكتىگى 180 مەتر بولۋى ءتيىس. ونىڭ 30 مەترى ورناتىلعان. قۇرىلىس جۇمىستارى جىلدىڭ سوڭىندا اياقتالىپ، كەلەسى جىلى ىسكە قوسىلادى دەپ شامالانعان.

Abai.kz