سۋديا نۇرلان قايىربەكوۆ ءماسىموۆتى 10 جىلعا سوتتاپ، مۇلكىن تاركىلەۋ تۋرالى ۇكىم شىعاردى.

ۇكىمگە ساي، ءماسىموۆ جازاسىن قاتاڭدىعى ورتاشا تۇرمەدە وتەۋى ءتيىس. بۇعان دەيىن پروكۋرور ونى 13 جىلعا باس بوستاندىعىنان ايىرۋدى سۇرادى.

ايىپتالۋشى وزىنە تاعىلعان ايىپتاردى مويىندامادى.

— ۇكىممەن مۇلدە كەلىسپەيمىز، اپپەلياتسيالىق شاعىم تۇسىرەمىز. ىستەن دالەلدەردى الىپ تاستاپ، ايىپتاۋ ۇكىمىن شىعاردى. مەنىڭشە، سۋديانىڭ سوت القاسىنا دالەلدەردى كورسەتپەۋگە قۇقىق بەرەتىن باپ سوت القاسىنىڭ جۇمىسىن قۇنسىزداندىرادى، - دەيدى ءماسىموۆتىڭ ادۆوكاتى دميتري كۋرياچەنكو.

نۇرلان ماسىموۆتەن بولەك سوتقا ونىڭ بۇرىنعى ورىنباسارى دامير سيرازيديموۆ پەن كاسىپكەر ەۆگەني ەۆكوۆيچ تارتىلدى. ولار دا اسا اۋىر جەمقورلىق قىلمىسىن جاسادى دەگەن كۇدىككە ىلىنگەن. سوت ەكەۋىن دە 8 جىلعا تۇرمە جازاسىنا كەستى. سيرازيديموۆ تاعىلعان ايىپتاردى مويىنداماعانى، ەۆكوۆيچتىڭ كىناسىن تولىق مويىنداعانى ايتىلادى.

سوتتىڭ ايتۋىنشا، ءماسىموۆ قۇنى 607 ملن تەڭگە بولاتىن تەحنيكالىق قارۋلاردى جەتكىزۋ ءۇشىن كومپانيامەن كەلىسىم-شارت جاساسىپ، ءوزى 400 ملن تەڭگە العان. زاتتاردى جەتكىزەتىندەر كونكۋرسسىز الىنعان. كومپانيا قارۋ-جاراقتى ۇستەمە باعا كورسەتىپ، 180 ملن تەڭگەگە اكەلگەن.

— سوت كەزىندە انىقتالعانى، ءماسىموۆ 2020 جىلى دەپارتامەنت باسشىسى بولىپ تۇرعاندا ورىنباسارى سيرازيديموۆ ارقىلى جەرگىلىكتى كاسىپكەر ەۆكوۆيچتەن پارا العان. ياعني، ءماسىموۆ كاسىپكەردەن الماتى وبلىسى الاكول اۋدانى اقشي اۋىلىندا ەكى قاباتتى ءۇي مەن مونشا سالىپ بەرسەڭ جانە الماتىداعى ءۇيدىڭ تومەنگى قاباتىنا تولىق جوندەسەڭ، پوليتسيا دەپارتامەنتىنەن تەندەر الىپ بەرەم دەگەن، - دەدى سۋديا سوتتا.

سوتقا ايىپتالۋشىلاردىڭ جاقىندارى دا كەلدى. ۇكىمنەن سوڭ نۇرلان ءماسىموۆ سۋدياعا "بىرنەشە جىلدان كەيىن وسى ۇكىم ءۇشىن ۇيالاتىن بولاسىز" دەدى.

ال سيرازيديموۆتىڭ بالدىزى ايىما ابدراحمانوۆا ء"ىستى قاراۋ كەزىندە كوپ زاڭ بۇزىلدى. ءىس قۇجاتتارىن ەشكىم سوڭىنا دەيىن وقىمايدى. ەگەر ۇڭىلسەك، ادامدى جازىقسىز سوتتاي سالدى. سەبەبى بۇل – ساياسات، ول تەگى ءماسىموۆ بولعانى ءۇشىن سوتتالدى" دەدى.

قازاقستان ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆتىڭ نەمەرە ءىنىسى، 48 جاستاعى نۇرلان ءماسىموۆ پاۆلودار وبلىسى پوليتسيا باسقارماسىنىڭ باسشىسى قىزمەتىنەن بىلتىر قاڭتار ورتاسىندا بوساتىلعان ەدى. ول مەكەمەنى 2019 جىلدىڭ قاراشاسىنان باسقاردى.

2021 جىلى قازاقستان پرەزيدەنتى توقاەۆتىڭ قاۋلىسىمەن نۇرلان ماسىموۆكە "پوليتسيا گەنەرال مايورى" شەنى بەرىلگەن ەدى. سۋديا ۇكىمىندە نۇرلان ءماسىموۆتى "پوليتسيا گەنەرال مايورى", "ايبىن" اتاقتارىنان ايىردى.

بىلتىر ساۋىردە نۇرلان ماسىموۆكە ىزدەۋ جاريالانعان. كەيىن شىلدەدە ونىڭ رەسەيمەن شەكارادا ۇستالعانى حابارلاندى.

Abai.kz