كەزىندە ەسەپتەن شىعارىلعان ستۋدەنتتىك جاتاقحانا قازۇازۋ تۇرعىن ءۇي قورىنا قايتارىلدى.  

وسىنداي ناقتى جۇمىستاردىڭ ناتيجەسىندە بيىلعى جىلى جاتاقحانالاردان ستۋدەنتتەر ءۇشىن تاعى دا 280 ورىن پايدالانۋعا بەرىلەدى.

2022 جىلعى 8 قاراشادا قازاق ۇلتتىق اگرارلىق زەرتتەۋ ۋنيۆەرسيتەتىنىڭ باسقارما توراعاسى-رەكتور كۇرىشباەۆ اقىلبەك قاجىعۇلۇلىمەن العاشقى كەزدەسۋ بارىسىندا ستۋدەنتتەر جاتاقحانا ماسەلەسىنىڭ ۋشىعىپ كەتكەنىن ايتىپ، ورىن تاپشىلىعىنا شاعىمدانعان بولاتىن.

قازىرگى كۇنى ۋنيۆەرسيتەتتىڭ №6 ستۋدەنتتىك جاتاقحاناسى تۇرعىن ءۇي قورىنا قايتارىلدى جانە وندا كۇردەلى جوندەۋ جۇمىستارى تولىق جۇرگىزىلۋدە. عيماراتتىڭ سىرتقى ءتۇرى عانا ەمەس، ونىڭ ىشكى كەڭىستىگى دە تولىق وزگەرەدى: تۇرعىن بولمەلەر، اسۇيلەر مەن دالىزدەر، جۋىناتىن تازالىق ورىندارى جاڭاشا ديزاينمەن ورنەكتەلمەك. ەدەندەر مەن توبەنى اۋىستىرۋ جۇمىستارى جۇرگىزىلدى، پليتكالار توسەلدى، جاڭا ەسىكتەر ورناتىلدى. قىسقا مەرزىمدە سۋمەن جابدىقتاۋ، كارىز جانە جىلىتۋ جۇيەلەرى اۋىستىرىلاتىن بولادى.

ايتا كەتەيىك، بۇل جاتاقحانا 1963 جىلى سالىنعان. مۇندا كۇردەلى جوندەۋ سوڭعى 10 جىلدا العاش رەت جۇرگىزىلۋدە.

قازۇازۋ باسشىلىعىنىڭ ايتۋىنشا، بيىلعى جىلى وسىنداي ناقتى جۇمىستاردىڭ ناتيجەسىندە جاتاقحانالاردان ستۋدەنتتەر ءۇشىن تاعى دا 280 ورىن پايدالانۋعا بەرىلەدى.

قازۇازۋ ءباسپاسوز قىزمەتى

Abai.kz