سولتۇستىك قازاقستان وبلىسىندا جەردى ءتيىمسىز پايدالانعاندارعا بيىل 1,6 ملن تەڭگەدەن استام ايىپپۇل سالىندى، ولقىلىقتاردى جويۋعا 23 ۇيعارىم بەرىلىپ، قۇجاتتار مەملەكەتتىك كىرىستەر دەپارتامەنتىنە 20 ەسەلەنگەن كولەمدە سالىق سالۋ ءۇشىن جىبەرىلدى.

سقو جەر رەسۋرستارىن باسقارۋ دەپارتامەنتىنىڭ باسشىسى باقىتجان بەكىشتىڭ ايتۋىنشا، 65,5 مىڭ گا اۋىل شارۋاشىلىعى ماقساتىنداعى جەرگە 32 تەكسەرۋ جۇرگىزىلدى. سونىڭ شامامەن 38 مىڭ گا بويىنشا 23 زاڭ بۇزۋشىلىق انىقتالدى، نەگىزىنەن جايىلىمدىق جەرلەرگە قاتىستى. ماسەلەن، بىلتىر 375,4 مىڭ گا القاپتا 96 زاڭ بۇزۋشىلىق انىقتالدى، ونىڭ 107 مىڭ گا ەگىستىك، 269,4 مىڭ گا جايىلىمدىق جەر بويىنشا.

«زاڭ بۇزۋشىلىقتاردى جويۋ تۋرالى 23 ۇيعارىم بەرىلدى، ولار مەملەكەتتىك كىرىستەر دەپارتامەنتىنە 20 ەسەگە ۇلعايتىلعان سالىق ستاۆكاسىن قولدانۋ ءۇشىن جىبەرىلدى. بۇدان باسقا 1 638,75 مىڭ تەڭگە سوماسىنا 20 ايىپپۇل سالىندى. ونىڭ 17-ءسى بويىنشا 1 224,75 مىڭ تەڭگە ءوندىرىلىپ الىندى.

جالپى بيىل سقو-دا جوسپار بويىنشا پايدالانىلماي جاتقان جەرلەردىڭ 330 مىڭ گا قايتارىلۋى ءتيىس»، - دەيدى باقىتجان بەكىش.

قازىرگى ۋاقىتتا وبلىس بويىنشا 104,7 مىڭ گا، ونىڭ ىشىندە 7,5 مىڭ گا ەگىستىك، 90,1 مىڭ گا جايىلىم نەمەسە جوسپارلانعان اۋماقتىڭ 31,7 % قايتارىلدى.

فوتو: ينتەرنەتتەن

Abai.kz