بيۋرونىڭ حابارلاۋىنشا، 2018 جىلمەن سالىستىرعاندا  كورسەتكىشتەر ايتارلىقتاي وزگەرىسكە ۇشىراعان. سول كەزدە شەتەلدەن 12,7 مىڭ ادام كەلسە، سىرتقا 41,8 مىڭ ادام كەتكەن. وسى رەتتە كوشى-قون سالدوسى -29,1 مىڭ ادامنان -6,7 مىڭعا دەيىن ازايعان.

“ال 2023 جىلعى قاڭتار-ماۋسىمدا بىلتىرعى سايكەس كەزەڭمەن سالىستىرعاندا ەلدە تۇرۋعا ىقتيارحات العاندار سانى 13 652 ادامدى قۇراپ، قازاقستانعا كەلگەندەردىڭ سانى 87,3%-عا ءوستى. ءبىرىنشى جارتىجىلدىقتا ەلدەن كەتكەندەر سانى 6 996 ادام بولسا، وتكەن جىلدىڭ التى ايىمەن سالىستىرعاندا ول 56,7% ازايعان. ناتيجەسىندە كوشى-قون سالدوسى وڭ ناتيجە كورسەتتى – 6 656 ادام”، – دەلىنگەن حابارلامادا.

ەلدىڭ نەگىزگى كوشى-قون الماسۋى تمد مەملەكەتتەرى اراسىندا بولعان. تمد ەلدەرىنەن كەلگەندەردىڭ ۇلەسى 89,1% بولسا، وسى ەلدەرگە كەتكەندەردىڭ ۇلەسى 75,4% قۇرادى.

تمد ەلدەرىنەن تۇراقتى تۇرۋعا كوشكەن 12,1 مىڭ ادامنىڭ ىشىندە رەسەيدەن 6858 ادام كەلگەن. ەكىنشى ورىندا وزبەكستان (3200), ءۇشىنشى ورىندا تۇرىكمەنستان (671). ال كەتكەندەردىڭ كوپشىلىگى رەسەيگە بارعاندار (4981).

بيىل باسقا ەلدەردەن 1,4 مىڭ ادام كەلسە، 1,7 مىڭ ادام شەتەلگە كەتكەن. مۇندا نەگىزىنەن موڭعوليادان (275), قىتايدان (265) جانە تۇركيادان (163) كوشىپ كەلگەندەر.

ۇلتتار بولىنىسىندە، قاڭتار-ماۋسىم ايلارىندا ەلىمىزگە قازاقتار (4706) ەڭ كوپ قونىس اۋدارعان، ودان كەيىن ورىستار (4622), وزبەكتەر (593), قاراقالپاقتار (498) جانە ۋكرايندار (452).

ال سىرتقا كوشىپ كەتكەن ۇلتتاردىڭ ىشىندە ەڭ كوبى ورىستار (4249), نەمىستەر (924), قازاقتار (516), ۋكرايندار (456) جانە تاتارلار (168).

ەسكە سالايىق، 2023 جىلعى 1 شىلدەدەگى جاعداي بويىنشا قازاقستان حالقىنىڭ سانى – 19 899 377 ادام.