ءماجىلىس دەپۋتاتى يرينا سميرنوۆا قازاقستان رەسپۋبليكاسىنىڭ ۇلتتىق عىلىم اكادەمياسىندا عالىمدارمەن كەزدەسۋ وتكىزدى.

باسقوسۋ وتاندىق عىلىمدى ىلگەرىلەتۋ، جىلدار بويى قوردالانىپ قالعان عىلىم ماسەلەلەرىنىڭ شەشىمىن تابۋ، عىلىمي جوبالارعا قولداۋ كورسەتۋ جانە كوممەرتسياليزاتسيالاۋ تاقىرىبىندا ءوربىدى.

– ماسەلەنىڭ قانشالىقتى تەرەڭدە جاتقانىن ءتۇسىنۋىمىز كەرەك. بىزدە عىلىممەن اينالىساتىن كادر جوقتىڭ قاسى. عىلىمدى دامىتۋدى وسىدان باستايىق. شەتەلدىك ءبىلىم بەرۋ مەكەمەلەرىنىڭ وقۋ باعدارلاماسىن سارالاۋىمىز قاجەت. سولاردىڭ ىشىنەن بىزگە قولايلىسىن الىپ ەنگىزسەك، وتاندىق عىلىمعا كاسىبي مىقتى ماماندار دەن قويار ەدى. وسى تەكتەس بىرقاتار ماسەلەنى تىزبەكتەپ ايتا بەرۋگە بولادى. بىراق كادر تاپشىلىعى كەزەك كۇتتىرمەيتىن ءىس بولىپ وتىر، – دەدى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ ۆيتسە-پرەزيدەنتى اقىلبەك كۇرىشباەۆ.

جيىنعا شەتەلدەگى قازاق عالىمدارى ونلاين قاتىسىپ، وزەكتى ماسەلەلەردى اتاپ ءوتتى. بىلىكتى عالىمداردى جۇمىسپەن قامتۋ، ولاردىڭ الەۋەتىن وتاندىق عىلىمدى دامىتۋعا باعىتتاۋ جايى قوزعالدى. بۇل رەتتە پرەزيدەنت جانىنداعى ۇلتتىق عىلىم اكادەمياسىنا ناقتى ۇسىنىستارىن بەرەتىندەرىن ايتتى.

– قازىر عىلىمنىڭ قارىشتاپ تۇرعانىن ەشكىم دە جوققا شىعارا المايدى. ەلىمىزدە عىلىمعا ەرەكشە كوڭىل ءبولىنىپ جاتقانى ءبارىمىزدى قۋانتادى. مەملەكەت باسشىسى عىلىمسىز العا جىلجۋ مۇمكىن ەمەس  ەكەنىن بىرنەشە رەت قاداپ ايتتى. بۇعان دەيىن كۇنسۇلۋ دالتونقىزىمەن دە كەزدەسىپ، عىلىمنىڭ احۋالى تۋرالى اڭگىمەلەستىك. ويىمىز ءبىر جەردەن شىقتى. دەپۋتات رەتىندە عىلىمدى دامىتۋ ءۇشىن زاڭنامالىق تۇرعىدا اتسالىسۋعا دايىنبىز، – دەدى ءماجىلىس دەپۋتاتى يرينا سميرنوۆا.

Abai.kz