ءمينيستردىڭ سوزىنشە، قازىر كومپانيامەن كەلىسسوز ءجۇرىپ جاتىر. بىراق جاماۋباەۆ "ۇكىمەت ميتتالدىڭ اكتيۆتەرىن ساتىپ الۋ بويىنشا رەسەيلىك "سەۆەرستال" كومپانياسىمەن كەلىسسوز جۇرگىزىپ جاتىر ما؟" دەگەن ساۋالعا جاۋاپ بەرمەگەن.
مينيستر كاسىپورىن بويىنشا كەلىسسوزدى "وتە ماڭىزدى ءىس" دەپ اتاپ، مۇنداي كەلىسسوزدەرمەن "ناقتى ءبىر ادامدار توبى" اينالىسۋى ءتيىس ەكەنىن ايتتى.
17 تامىز تاڭەرتەڭ "ارسەللورميتتال تەمىرتاۋ" (امت) كومپانياسىنىڭ شاحتينسكىدەگى "قازاقستان" شاحتاسىندا ءورت شىعىپ، بەس ادام قازا تاپقان. جەر استىندا بولعان 227 ادامنىڭ 222-ءسى سىرتقا شىعىپ ۇلگەرگەن.
شاحتينسكىگە بارعان پرەمەر-مينيستر ءاليحان سمايىلوۆ اپاتقا امت كومپانياسىن ايىپتاعان. مينيستر كومپانيانى قۇرىلعىلاردى جاڭالامادى، ينۆەستيتسيا مىندەتتەرىن ورىندامادى، وندىرىستىك قاۋىپسىزدىك شارتتارىن بۇزدى دەگەن.
"بۇل – ءبىرىنشى كەزەكتە وسى شاحتانىڭ يەسىنىڭ كىناسى. ولاردىڭ وزىنە سەنىمدىلىگى بىرنەشە جىلدان بەرى قايعىلى وقيعالارعا اكەپ سوعىپ جاتىر. وسىعان دەيىن كومپانيا جۇمىسشىلاردىڭ قاۋىپسىزدىگىن قامتاماسىز ەتۋدى ەمەس پايدا تابۋعا كوپ كوڭىل ءبولدى. سوندىقتان اپات جيىلەدى" دەگەن ەدى سمايىلوۆ.
پرەمەر-مينيستر ءار اپات سايىن كومپانيا ەڭبەك جاعدايىن جاقسارتامىز دەسە دە، ەشتەڭە وزگەرمەدى دەگەن. سمايىلوۆتىڭ سوزىنشە، كومپانيا قۇرىلعىلارىن جاڭالمايدى، ءوندىرىستىڭ كورسەتكىشى كەيىنگى جىلدارى ەكى ەسەگە، كومىر ءوندىرۋ ءتورت ەسەگە ازايعان. ۇكىمەت باسشىسى كومپانيانىڭ تەمىرتاۋ اۋاسىن لاستاپ جاتقانىن دا اتاپ وتكەن.
ۇكىمەتتىڭ ەسەبىنشە، كەيىنگى 15 جىل ىشىندە امت وبەكتىلەرىندە جۇزدەن اسا ادام قازا تاپقان. ادام ءولىمى كەيىنگى جىلدارى كوبەيگەن.
امت وكىلدەرى قازاقستان ۇكىمەتىنىڭ مالىمدەمەلەرىنە قاتىستى ازىرگە ەشتەڭە ايتقان جوق.
Abai.kz
