ماجىلىستەگى «اماNات» پارتياسى فراكتسياسىنىڭ جەتەكشىسى ەلنۇر بەيسەنباەۆ، ءماجىلىس دەپۋتاتتارى باقىتجان بازاربەك پەن ەرمۇرات باپي الماتىعا جۇمىس ساپارىمەن باردى. ولار «اماNات» پارتياسى سايلاۋالدى باعدارلاماسىنىڭ جول كارتاسىنىڭ جۇزەگە اسىرىلۋ بارىسىمەن جانە الماتى قالاسىنىڭ الەۋمەتتىك-ەكونوميكالىق دامۋ جاعدايىمەن تانىستى.  

كۇن تارتىبىندەگى ءبىرىنشى ماسەلە – ۇكىمەتتىك ەمەس ۇيىم وكىلدەرىمەن جانە جاستارمەن كەزدەسۋ، ويىن بيزنەسى ماسەلەسىن تالقىلاۋ بولدى. باسقوسۋعادەپۋتاتتارمەن بىرگە پارتيانىڭ الماتى قالالىق فيليالىنىڭ توراعاسى ستانيسلاۆ كانكۋروۆ، ساراپشىلار مەن جاستار وكىلدەرى قاتىستى. ماجىلىسمەندەر ويىنعا تاۋەلدىلەردىڭ كوبەيۋىنە، بۇل ماسەلەنىڭ جاس بۋىنعا, جالپى قوعامعا اسەرىنە الاڭداۋشىلىق ءبىلدىردى.

– سوڭعى 2,5 جىلدا ءاربىر بەسىنشى جاس قۇمارويىن ويناعان. بۇل – شىن مانىندە ۇلكەن كورسەتكىش. ونلاين-كازينو جارناماسى ءۇشىن 3 جىلعا دەيىن قىلمىستىق جاۋاپكەرشىلىك ەنگىزۋ ازىرلەنىپ جاتىر. قازاقستاندا ونلاين كازينولارعا تىيىم سالىنعان. بىراق وزدەرىڭىز بىلەتىندەي، ءبىز جىل سايىن ءتورت مىڭعا جۋىق سايتتى جاۋىپ وتىرمىز، – دەدى ەلنۇر بەيسەنباەۆ.

كەزدەسۋدە جاستار اراسىنداعى لۋدومانييانىڭ الدىن الۋعا قاتىستى نەگىزگى ماسەلەلەر، سونىڭ ىشىندە ءبىلىم بەرۋ باعدارلامالارى مەن قۇمار ويىنداردىڭ تاۋەكەلدەرى تۋرالى اقپاراتتىق ناۋقان, لۋدومانيا پروبلەماسىنا تاپ بولعاندار ءۇشىن ساپالى ءارى قولجەتىمدى مەديتسينالىق جانە پسيحولوگيالىق قولداۋدى قامتاماسىز ەتۋ بويىنشا ۇسىنىستار ايتىلدى. سونداي-اق زاڭناماعا قۇمار ويىنداردى رەتتەۋگە جانە باقىلاۋدى قاتاڭداتۋعا باعىتتالعان وزگەرىستەر ەنگىزۋ مۇمكىندىگى ءسوز بولدى.

ماجىلىسمەندەر بۇدان سوڭ «AMANAT» پارتياسىنىڭ الماتى قالالىق فيليالىنىڭ كەزەكتى XXXIV كونفەرەنتسياسىنا قاتىستى. ونداپارتيانىڭ 2023-2027 جىلدارعا ارنالعان سايلاۋالدى باعدارلاماسىن ورىنداۋ بويىنشا جول كارتاسىنىڭ ىسكە اسىرىلۋ بارىسى تۋرالى بايانداما جاسالدى. سونداي-اق الماتى قالالىق فيليالى مەن «جاستار رۋحى» جاستار قاناتىنىڭ 2021 جىلدان 2023 جىلدىڭ ءى جارتىجىلدىعىنا دەيىنگى كەزەڭدە اتقارعان جۇمىستارى تۋرالى ەسەبى تىڭدالدى.

ساپار سوڭىندا ەلنۇر بەيسەنباەۆ «قالقامان» مەترو ستانتسياسىنىڭ قۇرىلىسىمەن تانىستى. بۇگىنگى كۇنى مەتروپوليتەننىڭ ءۇشىنشى كەشەنىن ىسكە قوسۋ بويىنشا قۇرىلىس جۇمىسى بەلسەندى ءجۇرىپ جاتىر. «قالقامان» مەترو ستانتسياسىن سالۋ جوباسى الماتى قالاسى بويىنشا «AMANAT» پارتياسىنىڭ سايلاۋالدى باعدارلاماسىنىڭ 2.3-بولىمىنە ەنگىزىلگەن.

Abai.kz