جاڭا 2023-2024 وقۋ جىلى 25 مامىردا اياقتالادى. بۇل تۋرالى پرەمەر-ءمينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى.

«ءسوز سوڭىندا وقۋ جىلىنىڭ 36 اپتاعا دەيىن ۇزارتىلۋىنا قاتىستى ءوز پىكىرىمدى بىلدىرسەم دەيمىن. بۇل ماسەلەگە قاتىستى قوعامدا سىن كوپ بولىپ، پەداگوگتار قاۋىمداستىعى تاراپىنان ۇسىنىستار بولدى. بۇل الەمدىك تاجىريبە ەكەندىگىن مويىنداۋىمىز قاجەت. دەگەنمەن، مۇنداي جاڭاشىلدىقتى ەنگىزگەن كەزدە بارىنشا تىڭعىلىقتى دايىندىق قاجەت ەتىلەدى. مينيسترلىكتىڭ شەشىمى دۇرىس بولدى دەپ سانايمىن. بىراق، اسىعىستىق بولدى. وسىعان وراي وسى وقۋ جىلىندا 34 اپتالىق وقۋ ۇزاقتىعىنا ورالىپ، ساباقتى 25 مامىردا اياقتاۋ دۇرىس دەپ ەسەپتەيمىن»، - دەدى تامارا دۇيسەنوۆا ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىندە.

ونىڭ اتاپ وتۋىنشە، الداعى وقۋ جىلى ىشىندە قاجەتتى دايىندىق جۇمىستارىن جۇرگىزىپ، وقۋ باعدارلاماسىن بەيىمدەۋ كەرەك جانە 36 اپتالىق وقۋ ۇزاقتىعىنا ورالۋ ماسەلەسىن 2025 جىلدان باستاپ قايتا پىسىقتاعان دۇرىس.

Abai.kz