بوبروۆ وتكەن اپتادا تاسس اقپارات اگەنتتىگىنە بەرگەن سۇحباتىندا قازاقستانداعى ءورىستىلدى سىنىپتاردىڭ ازايعانىن ايتىپ، قازاقستان وقۋ-اعارتۋ مينيسترلىگىن ايىپتاي سويلەگەن.
"بۇعان ءبىر وبەكتيۆتى سەبەپ بار، ول – ورىس حالقىنىڭ 15,2 پايىزعا قىسقارۋى. بۇعان قوسا، تاعى ءبىر ناقتى سەبەپ ءبىلىم سالاسىنداعى مينيسترلىكتىڭ قازاق تىلىنە باسىمدىق بەرەتىن مەملەكەتتىك باعدارلاماسى" دەگەن ەدى بوبروۆ. ونىڭ بۇل ءسوزى قازاقستان قوعامىندا قارسىلىق تۋدىردى.
سمادياروۆ جۋرناليستەردىڭ "بوبروۆ قىزمەتىن اياقتاپ كەتىپ بارا جاتىپ، وسى ءسوزدى ايتىپ كەتتى مە؟" دەگەن سۇراعىنا جاۋاپ بەرمەدى، بوبروۆتىڭ ءسوزى "دۇرىس ەمەس" دەدى.
كەيىنگى ۋاقىتتا رەسەيدە قازاقستانداعى ۇلتارالىق قاتىناستار جانە ورىس حالقىنىڭ جاعدايى تۋرالى ءارتۇرلى دەڭگەيدەگى تالقىلاۋلار كۇشەيگەن. رەسەيلىك ساياساتكەرلەر مەن پروپاگاندا جۋرناليستەرى ارا-تۇرا "قازاقستاندا ورىس تىلىنە قىسىم جاسالىپ جاتىر" دەپ بىرنەشە رەت مالىمدەمە جاساعان. رەسەيلىك ساياساتكەرلەر قازاقستانداعى قازاق ءتىلدى بەلسەندىلەردىڭ ارەكەتىن جانە تىلگە قاتىستى زاڭداردى ءجيى سىنعا دا العان.
قازاقستان پرەزيدەنتى قاسىم-جومارت توقاەۆ بىلتىر 7 قازاندا سانكت-پەتەربۋرگتە تمد ەلدەرى باسشىلارىنىڭ بەيرەسمي سامميتىندە تمد جانىنان ورىس ءتىلىن قولداۋ جانە دامىتۋ بويىنشا حالىقارالىق ۇيىم قۇرۋدى ۇسىنعان. ۇسىنىستى رەسەي باسشىسى ۆلاديمير پۋتين قولداعان ەدى.
Abai.kz
