جالپى، ءبىزدىڭ قوستاناي وبلىسىندا نەشە ءتۇرلى عاجايىپتار بولىپ جاتادى. وتكەندە وبلىس ورتالىعىنىڭ شاڭىراق كوتەرگەندىگىنە 144 جىل تولۋىن اتتاي ءتورت كۇن بويى تويلاپ، مەرەيتويى بولماسا دا اتىمتاي جومارتتاي ءبىر شاشىلىپ ەدى.

«جامان ادەت جۇققىش كەلەدى» دەگەن ەمەس، بۇل ءداستۇردى جاقىندا وسىنداعى قوستانايدىڭ ىرگەسىندەگى رۋدنىي قالاسى جەرگە تۇسىرمەي، قاعىپ الىپ كەتتى. كەنشىلەر قالاسى دەگەن اتى بار ەمەس پە، قوستانايدان كەم تۇسسە، بۇكىل ەل كۇلمەي مە؟

وسىنداي نامىسقا تىرىسقان مۇنداعىلار وزدەرىنىڭ 66 جىلدىق تويىن دۇركىرەتىپ وتكىزدى. وزگەسى-وزگە، رۋدنىيلىقتار اسىرەسە، وسى مەرەكە قۇرمەتىنە قويىلعان كەشكىلىك الامان كونتسەرتتى ايتۋعا كەلگەندە ءسوز تابا الماي وتىر. سىرت كوزگە جاقسى اتتى كورىنۋ ءۇشىن استانادان ءبىر، الماتىدان ەكى ءانشى شاقىرعان بولعانىمەن، نەگىزى تويدى قىزدىرعان «كيليماندجارو» توبىنىڭ قارا تورى جىگىتتەرى. سوناۋ افريكانىڭ كونگو ەلىنەن ادەيى شاقىرىلعان ءانشى دە ءبيشى جىگىتتەر تويدىڭ كوركىن اشىپ، ابدەن قىزدىردى. ءبىر قىزىعى، وسىندا جىلدا كەلەتىن بۇل انشىلەردىڭ رۋدنىيلىقتاردىڭ وسال جەرلەرىن ءدوپ باسىپ، ىلعي ءبىر قارىق قىلىپ كەتەتىن كورىنەدى. بيىل دا سول انىنە باسىپتى. ءان بولعاندا، باياعى سول ايتىلا-ايتىلا ابدەن جاۋىر بولعان «Despasito»، «Hafanana»، «Drarostea»، «It’s My Life» ياعني، Dr.Alban سەكىلدى بۇگىندەرى مۇلدەم ەسكىرگەن سول باياعى حيت بولعان اندەر. «رۋدنىيلىقتارعا بۇل دا جاراي بەرەدى» دەپ ويلاسا كەرەك. وبالى نە، ءدال سولاي بولىپ شىقتى دا. بۇل تويدى ۇيىمداستىرعان قالا اكىمدىگى دە ريزا، تەگىن كونتسەرتتتى تاماشالاعان كوپشىلىكتىڭ دە توبەسى كوككە ءبىر عانا ەلى جەتپەي قالدى.
كوكەيدە تەك ءبىر عانا سۇراق. باسقاسىن بىلاي قويعاندا، وسى اسا زور قۇرمەتپەن شاقىرىلعان قارا قۇرىلىقتىڭ قارا تورى جىگىتتەرىن ريزا ەتۋ ءۇشىن قالا بيۋدجەتىنەن قانشا قارجى ءبولىندى ەكەن؟ ارينە، وعان مۇندا باسىن اۋىرتىپ جۇرگەن ەشكىم جوق قوي. بىزدە قازاننىڭ اۋزى قاشاندا اشىق ەمەس پە؟

جايبەرگەن بولاتوۆ

Abai.kz