الماتىدا رەسەيءدىڭ مانەرلەپ سىرعاناۋشىسى تاتيانا ناۆكانىڭ شوۋى وتپەيتىن بولدى. ۇيىمداستىرۋشىلار كورسەتىلىمگە بيلەت ساتۋدى توقتاتقان.

«الماتىداعى «شەحەرازادانىڭ ماحاببات حيكاياسى» شوۋىنا قاتىستى سپورت باسقارماسى حابارلايدى: ءىس-شارانى وتكىزۋ نەمەسە توقتاتۋ ماسەلەسى «الماتى ارەنا» كەشەنىنىڭ كونتسەرتتىك ءبولىمىنىڭ اكىمشىلىگى مەن ۇيىمداستىرۋشىلار اراسىنداعى شارتقا بايلانىستى.

سونىمەن قاتار، «الماتى ارەنا» كەشەنىنىڭ كونتسەرتتىك ءبولىمى اكىمشىلىگىنىڭ اقپاراتى بويىنشا ۇيىمداستىرۋشىلار «راحات» جك «الماتى ارەنا» اكىمشىلىگىنەن بيلەت ساتۋدى توقتاتۋدى سۇراعان.

«الماتى ارەنا» كەشەنى اۋماعىندا كونتسەرت وتكىزۋ ماسەلەسىنە الماتى اكىمدىگىنىڭ ەش قاتىسى جوق»، - دەپ حابارلادى قالالىق اكىمدىك.

ايتا كەتەيىك، تاتيانا ناۆكا رەسەي پرەزيدەنتى ۆلاديمير ءپۋتيننىڭ ءباسپاسوز حاتشىسى دميتري پەسكوۆتىڭ ايەلى. وعان 2022 جىلدىڭ ماۋسىمىنان باستاپ ەۋروپالىق وداق، ۇلىبريتانيا، كانادا، شۆەيتساريا، اۆستراليا جانە باسقا دا بىرقاتار ەلدەر سانكتسيا سالعان. سوندىقتان رەسەيلىك ءارتىستىڭ شەتەلگە شىعىپ، شوۋ كورسەتۋگە جولى بايلانعان.

بۇعان دەيىن قازاقستانعا كەلىپ ونەر كورسەتپەك بولعان رەسەيدىڭ باسقىنشىلىق سوعىسىن قولدايتىن ارتىستەردىڭ كونتسەرتتەرى وتپەي قالعان بولاتىن. «كامىزياكي» ازىلكەشتەر توبى، گريگوري لەپس، يرينا دۋبتسوۆا، نيكيتا دجيگۋردا سەكىلدى ارتىستەر قازاق قوعامىنىڭ قارسىلىعىنا ۇشىراپ، قازاقستانعا جوسپارلاعان ساپارلارىنان باس تارتتى.

Abai.kz