تجم دەپارتامەنتتەرىنىڭ باسشىلارى سىبايلاس جەمقورلىق قىلمىستارى ءۇشىن سوتتالدى، دەپ حابارلايدى Ulysmedia.kz.

قر اسكەري سوتىنىڭ اپەللياتسيالىق القاسى الماتى قالاسى توتەنشە جاعدايلار دەپارتامەنتىنىڭ باستىعى، پولكوۆنيك رۋسلان قاسىباەۆقا قاتىستى ۇكىم شىعاردى.

سوتتالۋشى مەردىگەر ۇيىمعا ناقتى ورىندالماعان جۇمىس كولەمى ءۇشىن تولىق قۇنىن زاڭسىز تولەدى جانە تەحنيكالىق قاداعالاۋدىڭ وڭ قورىتىندىسىنسىز قالانىڭ ءورت ءسوندىرۋ بولىمدەرىنىڭ ءبىرىن پايدالانۋعا قابىلداعان. ول بيلىكتى تەرىس پايدالانعانى ءۇشىن كىنالى دەپ تانىلىپ، ءۇش جىلعا باس بوستاندىعىنان جانە ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلدى.

سونداي-اق، انتيكور مالىمەتىنشە، قىزىلوردا وبلىسىندا تجم ونەركاسىپتىك قاۋىپسىزدىك دەپارتامەنتى باسشىسىنىڭ ورىنباسارى بەرىك ستامقۇلوۆقا  ۇكىم شىقتى. ستامقۇلوۆ ورازباحوۆتان دەلدال اتاجانوۆ ارقىلى جەتكىزۋشىنى تاڭداۋ كەزىندە ارتىقشىلىق كورسەتكەنى جانە گاز تولتىرۋ پۋنكتتەرى بويىنشا جوبالىق قۇجاتتارعا كەدەرگىسىز قول قويعانى ءۇشىن 500 مىڭ تەڭگە سوماسىندا پارا العانى ءۇشىن كىنالى دەپ تانىلدى.

سونىمەن قاتار، ستامقۇلوۆ لاۋازىمدىق وكىلەتتىكتەرىن تەرىس پايدالانۋ ارقىلى قر تجم لاۋازىمدى تۇلعالارىنا كەزدەسۋلەر مەن بوس ۋاقىتتى ۇيىمداستىرۋ سىلتاۋىمەن ءوزىنىڭ باعىنىستى 4 قىزمەتكەرىنىڭ 100 000 تەڭگە سوماسىنداعى اقشالاي قاراجاتىن يەلەنگەن. وعان 5 جىل باس بوستاندىعىنان ايىرۋ جازاسى تاعايىندالدى.

وسى ۇكىممەن پارا بەرۋشى ن. ورازباحوۆ 3 جىل مەرزىمگە، دەلدال ا. اتاجانوۆ 1 جىلعا باس بوستاندىعىنان ايىرىلدى.

سوتتالعاندارعا مەملەكەتتىك قىزمەتتە، جەرگىلىكتى ءوزىن-ءوزى باسقارۋ ورگاندارىندا، قارجى ۇيىمدارىندا جانە كۆازيمەملەكەتتىك سەكتوردا باسشىلىق لاۋازىمداردا جۇمىس ىستەۋگە ءومىر بويى تىيىم سالىنادى.

ايتا كەتەيىك، بۇدان بۇرىن تجم ورتكە قارسى قىزمەت كوميتەتىنىڭ توراعاسى نۇربولات دەربىسوۆ جانە شىمكەنت قالاسى مەن جەتىسۋ وبلىسى بويىنشا تجد باستىقتارى ۇستالعانى حابارلانعان.

ولار ورتكە قارسى قاۋىپسىزدىك سالاسىنداعى قامقورلىعى ءۇشىن كاسىپكەرلەردەن جۇيەلى نەگىزدە پارا الىپ، تەكسەرىلەتىن ۇيىمداردى كەلىسىمشارتتار جاساۋ ارقىلى ولاردىڭ قىزمەتتەرىن ساتىپ الۋعا جانە ۋاقتىلى اقى تولەۋگە ماجبۇرلەگەن دەگەن كۇدىككە ءىلىندى.

Abai.kz