جىل باسىندا تاۋلى قاراباقتا 120 مىڭ ادام تۇرعان، بۇل ايماق حالقىنىڭ تورتتەن ءۇش بولىگى ارمەنياعا كوشكەنىن بىلدىرەدى. ازەربايجان جاعى بوسقىندار سانى تۋرالى مالىمەت ايتقان جوق.
ارمەنيا پرەمەر-ءمينيسترى نيكول پاشينيان ايماقتا ارميان حالقىنىڭ قالۋى مۇمكىن ەمەس دەپ مالىمدەدى. ول ازەربايجان بيلىگىن تۇرعىنداردى "ۇلتىنا قاراي قۋدالادى", "دەپورتاتسياعا ماجبۇرلەدى" دەپ ايىپتادى.
ارمەنيا كوشەتىن كولىكتەرى جوق تۇرعىندار ءۇشىن ستەپاناكەرتكە (ازەربايجانشا – حانكەندي) ونداعان اۆتوبۋس جىبەرگەن. ازەربايجان بيلىگى دە 30 اۆتوبۋس جىبەردى.
باكۋ ارمەنيا پرەمەرىنىڭ ءسوزى باكۋ مەن ەرەۆان اراسىندا بەيبىتشىلىكتىڭ بولاشاعىنا نۇقسان كەلتىرەدى دەپ مالىمدەدى. ازەربايجان بيلىگى ايماقتان كەتۋ-كەتپەۋ ماسەلەسىن تاۋلى قاراباق تۇرعىندارىنىڭ ءوزى شەشتى دەدى. ازەربايجان سىرتقى ىستەر مينيسترلىگى جەرگىلىكتى حالىقتى قاراباقتان كەتپەۋگە شاقىرعانىن، ازەربايجان قاۋىمداستىعىمەن رەينتەگراتسيانى باستاۋعا ۇندەگەنىن اتاپ وتكەن.
ازەربايجان پرەزيدەنتىنىڭ كومەكشىسى حيكمەت گادجيەۆتىڭ ايتۋىنشا، باكۋ قاراباققا بۇۇ باقىلاۋشىلار ميسسياسىن جىبەرۋگە دايىن. جازدا ازەربايجان باسشىسى يلحام اليەۆ باكۋ ايماققا 150 مىڭ ازەربايجان ازاماتىن قونىستاندىرۋعا دايىن ەكەنىن ايتقان.
29 قىركۇيەكتە بىرقاتار تەلەگرام-ارنالار "لاچين" باقىلاۋ-وتكىزۋ پۋنكتىندە ازەربايجان كۇشتەرى ارمەنياعا كەتپەك بولعان مويىندالماعان تاۋلى قاراباق رەسپۋبليكاسى كۇشتەرىنىڭ بۇرىنعى قولباسشىسى لەۆون مناتساكانياندى ۇستاعانىن حابارلاعان. ول 2015-2018 جىلدار ارالىعىندا مويىندالماعان رەسپۋبليكانىڭ قورعانىس ءمينيسترى بولعان. 2015, 2016, 2017 جىلدارى قاراباق جانە ازەربايجان كۇشتەرى اراسىندا قاقتىعىس بولىپ، تاراپتار اۋىر قارۋ قولدانعان. ولار ءبىر-ءبىرىن اتىستى توقتاتۋ كەلىسىمىن بۇزدى دەپ ايىپتاعان.
بىرنەشە كۇن بۇرىن لاچيندە مويىندالماعان رەسپۋبليكا ۇكىمەتىنىڭ بۇرىنعى جەتەكشىسى رۋبەن ۆاردانيان دا ۇستالىپ، قامالعان. ۆاردانيانعا "تەرروريزمدى قارجىلاندىرۋ", "قارۋلى توپ قۇرۋ جانە قاتىسۋ", "شەكارانى زاڭسىز كەسىپ ءوتۋ" باپتارى بويىنشا ايىپ تاعىلعان.
- حالىقارالىق قۇقىق بويىنشا، تاۋلى قاراباق – ازەربايجان جەرى. ايماق 1990 جىلدارداعى سوعىستان كەيىن ەرەۆان قولداۋىنا يە جىكشىل ارميانداردىڭ قولىندا ەدى. ءۇش جىل بۇرىنعى التى اپتالىق سوعىستا ازەربايجان ايماقتىڭ ەداۋىر بولىگىن باقىلاۋىنا العان.
- ازەربايجان مەن ارمەنيا بەيبىت كەلىسىمگە قول قويماعان. اقش، ەۋرووداق جانە رەسەي اراسىندا كەلىسسوز ازىرگە ناتيجە اكەلگەن جوق. ازەربايجان مەن ارمەنيا باسشىلارىنىڭ كەزەكتى كەزدەسۋى قازان ايىنىڭ باسىندا وتەدى.
- 19 قىركۇيەكتە ازەربايجان ارميان كۇشتەرىن ازەربايجان نىساندارىن اتقىلادى دەپ ايىپتاپ، تەرروريزمگە كىنالاعان. ءبىر كۇننەن سوڭ مويىندالماعان رەسپۋبليكا بيلىگى باكۋ شارتتارىمەن كەلىسكەن.
- 28 قىركۇيەكتە مويىندالماعان تاۋلى قاراباق رەسپۋبليكاسىنىڭ جەتەكشىسى سامۆەل شاحرامانيان 2024 جىلدىڭ 1 قاڭتارىنان باستاپ رەسپۋبليكانى جويۋ تۋرالى جارلىققا قول قويعان.
دەرەككوزى: ازاتتىق
Abai.kz
