«قازىرگى ۋاقىتتا 100-دەن استام ەتنوس قازاقستاندا ءوزارا تۇسىنىستىك پەن كەلىسىم جاعدايىندا ءومىر سۇرەدى. 18 كونفەسسيانىڭ 4 مىڭعا جۋىق ءدىني بىرلەستىگى ەركىن جۇمىس ىستەپ جاتىر. مۇنى ءبىزدىڭ باعا جەتپەس بايلىعىمىز ءارى مىزعىماس باسىمدىعىمىز دەپ سانايمىز»

پرەزيدەنت قاسىم-جومارت توقاەۆ الەمدىك جانە ءداستۇرلى دىندەر كوشباسشىلارىنىڭ VII سەزىندە سويلەگەن سوزىنەن.

تاۋەلسىزدىك جىلدارىندا قازاقستاندا ەتنوسارالىق جانە كونفەسسياارالىق كەلىسىم قوعامىنىڭ وزىندىك بىرەگەي مودەلى قۇرىلدى. بۇل جول بۇكىل الەمگە «قازاقستاندىق جول» رەتىندە تانىلدى. بىرەگەي قازاقستاندىق تاجىريبە جاھاندىق دەڭگەيدە سۇرانىسقا يە بولدى، سوندىقتان استانا الەمدىك قوعامداستىقتىڭ ءدىني كوشباسشىلارىنىڭ كەزدەسۋ ورنى مەن ديالوگ الاڭىنا اينالدى. قازاقستاندا الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋ تۋرالى باستاماسى الەمدىك قوعامداستىقتا ۇلكەن قىزىعۋشىلىق تۋدىردى. بۇل يدەياعا رەسەي، اقش، انگليا، فرانتسيا، ەگيپەت سياقتى الپاۋىت ەلدەردىڭ باسشىلارى، بەدەلدى ساياساتكەرلەر جانە كوپتەگەن ءدىني كونفەسسيا ليدەرلەرى قولداۋ ءبىلدىردى. سەزدىڭ ۇلكەن جەتىستىگى قازاقستان بۇكىل الەم الدىندا شىنايى قوعامدىق جانە دىنارالىق كەلىسىم مەن بىرلىككە قول جەتكىزگەن ەل رەتىندە ءوزىن كورسەتتى.

2003 جىلدان 2022 جىلعا دەيىن استانادا وتكەن «الەمدىك جانە ءداستۇرلى دىندەر كوشباسشىلارىنىڭ» جەتى سەزىنە يسلام، حريستيان، يۋدايزم، بۋدديزم، سينتويزم، داوسيزم جانە باسقا دا ءداستۇرلى دىندەردىڭ باسشىلارى مەن ءدىن وكىلدەرى قاتىستى. دىنارالىق ديالوگ جانە ورتاق باعدارلاردى ىزدەۋ كونتەكستىندەگى بارلىق تۇجىرىمدامالىق يدەيالار ءبىرىنشى كونگرەسستە قابىلداندى. پرەزيدەنتىمىز قاسىم-جومارت كەمەلۇلى توقاەۆ ايتىپ كەتكەندەي: «بۇل ءبىزدىڭ باعا جەتپەس بايلىعىمىز جانە اجىراماس ارتىقشىلىعىمىز دەپ سانايمىز. سەزدى وتكىزۋ ءبىزدىڭ ەلىمىزدە دە، بۇكىل الەمدە دە ديالوگ پەن ىنتىماقتاستىقتى نىعايتۋعا باعىتتالعان قازاقستان ساياساتىنىڭ ماڭىزدى بولىگى بولىپ تابىلادى. قازىرگى كۇردەلى كەزەڭدە ءدىني ليدەرلەر ءبىر ۇستەلدە وتىرىپ، بارلىق الەمگە كەز-كەلگەن كەلىسپەۋشىلىكتەردى جەڭەتىن ىزگى نيەتتىڭ ۇلگىسىن كورسەتۋى وتە ماڭىزدى».

بيىل قازان ايىندا الەمدىك جانە ءداستۇرلى دىندەر ليدەرلەرى سەزىنىڭ 20 جىلدىعى اتاپ وتىلەدى. قر پارلامەنتى سەناتىنىڭ توراعاسى م.اشىمباەۆتىڭ جەتەكشىلىگىمەن سەزد حاتشىلىعىنىڭ XXI مەرەيتويلىق وتىرىسى وتەدى. حاتشىلىق دىندەر، مادەنيەتتەر پەن وركەنيەتتەردىڭ اراسىنداعى ديالوگتى دامىتۋعا باعىتتالعان. بۇل مەرەيتوي ارقىلى قازاقستان تولەرانتتىلىقتى، دىنارالىق ديالوگ پەن بەيبىتشىلىكتى نەگىزگى نىسانعا الا وتىرىپ، ەل ورداسى استانا قالاسىنا بارلىق ءدىن وكىلدەرىن قۋانا قارسى الماق.

بايكەن ەسەت بەرىكۇلى

استانا قالاسى اكىمىنىڭ ورىنباسارى

Abai.kz