قازاقستاندىق اكتەر اسقار جۇمابەك 6 جارىم جىلعا باس بوستاندىعىنان ايىرىلدى.

الماتىنىڭ №2 بوستاندىق اۋدانىنىڭ سوتى مەيمانداردى ۇرىپ-سوققان كاراوكە-باردىڭ قىزمەتكەرلەرىنە قاتىستى ۇكىم وقىدى.
سوتتالۋشىلارعا بۇزاقىلىق جاسادى، بۇزاقىلىق پيعىلدا ءبىر توپ ادامنىڭ دەنساۋلىعىنا قاساقانا اۋىر جانە ورتاشا زيان كەلتىردى دەگەن ايىپ تاعىلدى.

بىلتىر 28 جەلتوقساندا الماتىداعى Little Brazil مەيرامحاناسىندا ءبىر توپ جىگىت توبەلەسىپ قالعان. ولاردىڭ ىشىندە وليگارح باحاريدين ابلازيموۆتىڭ ۇلى نۇرمۇحامەت نۇعمان، دىنمۇحامەت ىدىرىسوۆتىڭ ۇلى جارمۇحامەد اپپاز بولعان.

مەيرامحانادا جارمۇحامەد اپپاز بەن ديدجەيدىڭ اراسىندا جانجال شىعىپ، ىدىرىسوۆتىڭ ۇلى دوسى البەرت كرۋشەلنيتسكيمەن بىرگە ديدجەيدى دالىزگە الىپ شىعىپ ۇرىپ تاستايدى. توبەلەسكە مەكەمە كۇزەتشىلەرى مەن باسقا قوناقتار جانە «شىڭعىس سەكيۋريتي» كۇزەت كومپانياسىنىڭ قىزمەتكەرلەرى ارالاسادى. اياعى جاپپاي توبەلەسكە اينالادى. كۇشى باسىم مەيرامحانا قىزمەتكەرلەرى وليگارحتاردىڭ بالالارىن ساباپ تاستاعان. ولار قاشۋعا تىرىسسا دا، سوتتالۋشىلار كوشەدە قۋىپ جەتىپ، توبەلەستى جالعاستىرعان.
«سالدارىنان بەس جابىرلەنۋشىنىڭ ەكەۋىنە اۋىر، جانە ورتاشا دەڭگەيدە دەنساۋلىعىنا زيان كەلگەن»،-دەپ حابارلادى سوت.

سوت 7 ادامدى كىنالى دەپ تاۋىپ، ولارعا 6 جانە 6 جارىم جىلدان باس بوستاندىعىنان ايىرۋ جازاسىن تاعايىندادى.

سوتتالعانداردىڭ قاتارىندا بىرنەشە فيلمدەر مەن سەريالداردا ويناعان ايگىلى اكتەر اسقار جۇمابەك بار. ول كەلەسى كۇنى ءوزىنىڭ كىناساز ەكەنىن ايتىپ، پرەزيدەنتكە ۆيدەوۇندەۋ جولداعان.

وقيعا ورنىنا كەلگەن پوليتسيانىڭ انىقتاۋىنشا، جانجال اياقتالعاننان كەيىن، جابىرلەنۋشى نۇرمۇحامەت نۇعمان جۋىنىپ، ەسەپشوتتى تولەۋگە بارعان. سول كەزدە اكتەر اسقار جۇمابەك وعان قول جۇمساپ، ۇرا باستاعان. بۇل كورىنىس كامەراعا ءتۇسىپ قالعان.

بەلگىلى بولعانداي اكتەر توبەلەسپەن بۇرىننان-اق اتى شىققان. اسقار جۇمابەك 2022 جىلدىڭ كوكتەمىندە كاراوكەدە دەمالىپ وتىرعان قوناقتارمەن جانجالداسىپ، بىرەۋىنىڭ بەتىنەن سوققى جاساپ، سۇيەكتەرىن سىندىرىپ جىبەرگەن. بۇل قىلمىسى ءۇشىن ول ءبىر جىلعا سوتتالدى. باقىلاۋدا جۇرگەنىنە قاراماستان اكتەر تاعى دا توبەلەستىڭ باستى كەيىپكەرىنە اينالدى.

ايتا كەتەيىك، سوتتالۋشىلار ءوز كىناسىن مويىنداعان جوق. جابىرلەنۋشىلەر دە كەشىرىم بەرمەدى.

سوت ۇكىمى زاڭدى كۇشىنە ەنگەن جوق.

Abai.kz