كەشە، ياعني قازان ايىنىڭ 18-ءى كۇنى، ەلوردادا «XI قازاقستاننىڭ ازاماتتىق فورۋمى» سالتاناتتى تۇردە اشىلدى.

بيىلعى فورۋمنىڭ جالپى تاقىرىبى – «ادىلەتتى قازاقستان: ءبارىمىز جانە ارقايسىمىز ءۇشىن – ازاماتتىق قوعام دامۋىنىڭ باستى باعىتى».

مەملەكەت باسشىسى بۇگىن حI ازاماتتىق فورۋم قاتىسۋشىلارىنا ۇندەۋ جولدادى

«جيىرما جىل ىشىندە بۇل فورۋمنىڭ تيىمدىلىگى مەن قاجەتتىلىگى دالەلدەنىپ، سالماقتى ويلار مەن ساليقالى پىكىرلەر ايتىلاتىن الاڭعا اينالدى. وسىندا كوتەرىلگەن جاسامپاز باستامالار مەن ۇتىمدى ۇسىنىستار ازاماتتىق قوعامدى دامىتۋعا جانە جالپىۇلتتىق كەلىسىمدى نىعايتۋعا تىڭ سەرپىن بەرەدى. ۇكىمەتتىك ەمەس ۇيىمدار جانە قايىرىمدىلىق قورلارى، بەلسەندى ازاماتتار مەن ەرىكتىلەر ەل تاعدىرىنا بەي-جاي قاراماي، قوعامنىڭ وزەكتى ماسەلەلەرىن شەشۋگە بارىنشا اتسالىسىپ ءجۇر.

ولار ىنتىماقتاستىق پەن ناعىز وتانشىلدىقتىڭ وزىق ۇلگىسىن تانىتىپ، ەلىمىزدەگى بىرلىك پەن تاتۋلىقتى ساقتاۋعا زور ۇلەس قوسىپ كەلەدى. قازاقستاندا جۇرگىزىلىپ جاتقان اۋقىمدى وزگەرىستەر قوعامدا جاڭا ەتيكا قالىپتاستىرۋدى تالاپ ەتەدى.

وسى ورايدا ادىلدىك پەن گۋمانيزم، ءوزارا سەنىم مەن جاۋاپكەرشىلىك، زاڭ مەن ءتارتىپ، ەڭبەكقورلىق پەن بىلىمپازدىق جاڭا ەتيكانىڭ وزەگى بولۋعا ءتيىس»، – دەدى مەملەكەت باسشىسى.

پرەزيدەنت مەملەكەت پەن ۇكىمەتتىك ەمەس سەكتوردىڭ تىعىز ىنتىماقتاستىعى ەلىمىزدى جان-جاقتى دامىتۋعا ىقپال ەتىپ، ادىلەتتى قازاقستاندى قۇرۋعا جول اشاتىنىنا سەنىم ءبىلدىردى.

ايتا كەتەيىك، اتالمىش فورۋمدى ەكى كۇن وتكىزۋ جوسپارلانعان. بۇگىن فورۋمنىڭ ەكىنشى كۇنى.

Abai.kz