بۇۇ قاۋىپسىزدىك كەڭەسىنىڭ وتىرىسىندا بۇۇ باس حاتشىسى انتۋنيو گۋتەرريش حاماس-تىڭ يزرايلگە جاساعان شابۋىلى كەزدەيسوق جاسالماعانىن، پالەستينا حالقىنىڭ 56 جىل بويى وككۋپاتسيادا بولعانىن ايتتى. ول، پالەستينا حالقىنىڭ نارازىلىعى حاماستىڭ جان تۇرشىگەرلىك شابۋىلدارىن اقتاي المايتىنىن ايتتى. گۋتەرريش سونىمەن قاتار حالىقارالىق گۋمانيتارلىق قۇقىقتى، سونىڭ ىشىندە جەنەۆا كونۆەنتسيالارىن ساقتاۋعا شاقىردى.

وسىدان كەيىن يزرايل سىرتقى ىستەر ءمينيسترى ەلي كوەن بۇۇ باس حاتشىسى انتونيۋ گۋتەرريشپەن كەزدەسپەيتىنىن جانە حاماس شابۋىلىنان كەيىن ايماقتا «تەڭدەستىرىلگەن كوزقاراسقا ورىن جوق» دەپ سانايتىنىن مالىمدەدى.

ءيزرايلدىڭ بۇۇ جانىنداعى تۇراقتى وكىلى گيلاد ەردان ۇيىمنىڭ باس حاتشىسى انتونيو گۋتەرريشتى حاماستىڭ يزرايلگە شابۋىلى «ۆاكۋمنەن تىس» دەپ مالىمدەگەننەن كەيىن تەرروريزمدى اقتادى دەپ ايىپتادى.

«باس حاتشى مىرزا، ءسىز بارلىق ادامگەرشىلىك پەن بەيتاراپتىقتى جوعالتتىڭىز. بۇل جان تۇرشىگەرلىك شابۋىلدار ۆاكۋمدا بولعان جوق دەگەن قورقىنىشتى سوزدەردى ايتقاندا ءسىز تەرروريزمدى قۇپتادىڭىز جانە وسى ارقىلى تەرروريزمدى اقتاعىڭىز كەلدى»، – دەدى ەردان.

ونىڭ ايتۋىنشا، يزرايل ۇكىمەتى بۇۇ-مەن جانە ونىڭ «يزرايلدە ورنالاسقان» وكىلدەرىمەن قارىم-قاتىناسىن باعالاۋعا ءماجبۇر بولادى.

ول، سونداي-اق، الەۋمەتتىك جەلىدەگى پاراقشاسىنا: «بالالاردى، ايەلدەر مەن قارتتاردى جاپپاي ءولتىرۋ ناۋقانىنا تۇسىنىستىكپەن قارايتىن بۇۇ باس حاتشىسى بۇۇ باسشىلىعىنا لايىق ەمەس. مەن ونى دەرەۋ وتستاۆكاعا كەتۋگە شاقىرامىن»، - دەپ جازدى.

7-قازان كۇنى تاڭەرتەڭ پالەستينالىق حاماس قوزعالىسىنىڭ اسكەري قاناتى جاريالاعان «ءال-اقسا تاسقىنى» وپەراتسياسى اياسىندا يزرايل گازا سەكتورىنان بۇرىن-سوڭدى بولماعان اۋقىمدى شابۋىلعا ۇشىرادى. وسىدان كەيىن ۇيىم جاۋىنگەرلەرى ءيزرايلدىڭ وڭتۇستىگىندەگى شەكارالىق ايماقتارعا ەنىپ كەتتى. بۇعان جاۋاپ رەتىندە يزرايل قورعانىس كۇشتەرى گازا سەكتورىندا حاماسقا قارسى «تەمىر قىلىشتار» وپەراتسياسىن باستادى. بىرنەشە كۇن ىشىندە يزرايلدىك اسكەريلەر گازامەن شەكاراعا جاقىن ورنالاسقان بارلىق ەلدى مەكەندەردى باقىلاۋعا الىپ، جولاقتاعى نىساندارعا، سونىڭ ىشىندە بەيبىت تۇرعىندارعا اۋەدەن سوققى بەرە باستادى. سونداي-اق يزرايل گازا سەكتورىن تولىق قورشاعانىن جاريالادى: سۋ، ازىق-تۇلىك، ەلەكتر قۋاتى، ءدارى-دارمەك جانە وتىن جەتكىزۋ توقتاتىلدى.

گازا سەكتورىنداعى قۇرباندار سانى 5 مىڭنان استى، 15 مىڭنان استامى جارالانعان. يزرايلدە، جەرگىلىكتى بيلىكتىڭ مالىمەتى بويىنشا، 1,3 مىڭنان استام ادام قايتىس بولدى. ءتۇرلى اقپارات كوزدەرىنە سايكەس، 150-گە جۋىق يزرايلدىك حاماستىڭ تۇتقىنىندا بولۋى مۇمكىن. گازا سەكتورىنىڭ وزىندە 200-250-دەي تۇتقىن بار ەكەنىن مالىمدەدى.

ايتا كەتەيىك، Reuters اگەنتتىگى ليۆاننىڭ «ءال-مانار» تەلەارناسىنىڭ سيۋجەتىنە سىلتەمە جاساپ، ليۆاندىق «حەزبوللا» توبىنىڭ جەتەكشىسى حاسان ناسراللانىڭ بەيرۋتتا پالەستينالىق حاماس جانە يسلامدىق جيھاد توپتارىنىڭ جەتەكشىلەرىمەن كەزدەسكەنىن حابارلادى.

«حەزبوللا» جەتەكشىسىنەن باسقا كەلىسسوزدەرگە باسشىنىڭ ورىنباسارى حاماس سالەح ءال-اۋري جانە «يسلام جيھادىنىڭ» جەتەكشىسى زياد ان-ناحالا قاتىستى. كەزدەسۋدە گازا سەكتورىندا «قارسىلىقتىڭ ناقتى جەڭىسكە جەتۋى ءۇشىن» نە ىستەۋ كەرەكتىگى تالقىلاندى.

«كەزدەسۋدە […] حالىقارالىق دەڭگەيدەگى ۇستانىمدار مەن قارسىلاس تاراپ نە ىستەۋ كەرەكتىگى تۋرالى باعا بەرىلدى»،  – دەدى ءال-مانار.

Abai.kz