بۇكىل ەلىمىز رەساۋبليكا كۇنىن دۇركىرەتىپ، اندەتىپ، كۇيلەتىپ جاتقان كەزدە اباي وبلىسىنداعى سەمەيدەن كەيىنگى ەڭ ءىرى قالا – اياگوزدە قايعىلى جاعداي ورىن الدى. ءتورت ءسابي ءتىلسىز جاۋدان باقيلىق بولدى.

وسى كۇنى ساعات 10:49-دا قالاداعى باراق باتىر كوشەسىندەگى جەر ۇيلەردىڭ بىرىنەن ءتۇتىن شىعىپ جاتقانى جونىندە ۇيالى تەلەفون ارقىلى قۇزىرلى ورىندارعا دابىل قاعىلدى.

اراعا جارتى ساعات ۋاقىت سالماي، ءتىلسىز جاۋ اۋىزدىقتالعانىمەن 4 ءسابي كەلمەستىڭ كەمەسىنە ءمىنىپ كەتتى.

اياگوز قالاسىنداعى ءورت جاعدايى بويىنشا ءباسپاسوز رەليزىندە:

«2023 جىلعى 25 قازاندا ساعات 10:49-دا تجب كۇشتەرى مەن قۇرالدارىن جەدەل باسقارۋ ورتالىعىنىڭ پۋلتىنە اياگوز قالاسىنىڭ جەكە ۇيلەرىنىڭ بىرىندە ءتۇتىن شىققاندىعى تۋرالى سيگنال كەلىپ ءتۇستى. 6 ادامنان تۇراتىن قۇتقارۋشىلار بريگاداسى دەرەۋ سول جەرگە كەتتى.

ءورت سوندىرۋشىلەر وقيعا ورنىنا كەلگەننەن كەيىن بولمەلەردىڭ بىرىندە 20 ش. م. جيھازدار مەن جەكە زاتتارى جانعانى انىقتالدى. ءورت ساعات 11:10-دا وقشاۋلانىپ، 11.24-گە تولىق ءسوندىرىلدى. ءورتتىڭ سەبەبى انىقتالۋدا.

وقيعا ورنىندا ءتورت بالانىڭ دەنەسى تابىلدى.

ءولىمنىڭ سەبەبى انىقتالۋدا. ءتيىستى ساراپتاما تاعايىندالىپ، پوليتسيا تەرگەۋ جۇرگىزۋدە. قازىرگى ۋاقىتتا وتباسى مۇشەلەرىنە بارلىق قاجەتتى كومەك كورسەتىلۋدە. جاعداي جاو باقىلاۋىندا»، - دەپ جازىلعان.

جوعارىدا ايتقانىمىزداي، قازا تاپقان سابيلەردىڭ ەرەسەگى 8 جاسار ەگىزدەر، ءۇش جانە ەكى جاستاعى قوس ۇل. وتاعاسى جەدەل جاردەم جۇرگىزۋشى رەتىندە قىزمەتىنە كەتكەن. وتاناسى ازىق-تۇلىك ساتىپ الۋعا جەرگىلىكتى بازارعا كەتكەن شاقتا قايعىلى وقيعا ورىن الىپتى.

ءورت شىققان جەرگە ۋچاستكەلىك ينسپەكتور العاشقلاردىڭ ءبىرى بولىپ جەتىپ، ىشكى بولمەلەردى ارالاپ شىققاندا ءتورت ءبۇلدىرشىنىڭ ءولى دەنەسىنە جولىقتى.  اتالعان فاكتى بويىنشا پوليتسيا تەرگەۋ جۇمىستارىن جالعاستىرۋدا، اۋداندىق پروكۋراتۋرا بۇل ءىستى ءوزىنىڭ ايىرىقشا باقىلاۋىنا الدى.

جەرگىلىكتى بيلىك قايعىدان قارا جامىلعان وتباسىعان قايىرىمدىلىق كومەك كورسەتۋ ءۇشىن ەرىكتىلەردەن قارجى جيناۋعا كىرىستى.

Abai.kz