قازاقستاندى قارا قايعى تاعى دا ۇيقىسىسىنان جۇلقىپ وياتتى. بۇگىن تاڭەرتەڭ ىشىندە 252 ادام بولعان قاراعاندى وبلىسىنداعى كوستەنكو اتىنداعى شاحتادا جارىلىس بولدى. قازا تاپقانداردىڭ سانى 32-uە جەتتى، جوعالعاندار سانى 14 ادام.

ساعات 11:00-گە دەيىن پروفەسسور ح. ج. ماقاجانوۆ اتىنداعى اۋرۋحاناعا 18 ادام جەتكىزىلگەن.

مەملەكەت باسشىسى قاراعاندى وبلىسىندا كەنشىلەردىڭ قازا تابۋىنا بايلانىستى كوڭىل ايتىپ، ۇكىمەتكە كەنشىلەردىڭ وتباسىلارىنا بارلىق قاجەتتى كومەك كورسەتۋدى تاپسىردى. وقيعانىڭ ءمان-جايىن انىقتاۋ ءۇشىن ۇكىمەتتىك كوميسسيا قۇرىلدى. سونىمەن قاتار، پرەزيدەنت ۇكىمەتكە «ارسەلورميتتالتەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋ تاپسىردى.

كوستەنكو اتىنداعى شاحتادا وت تۇتانۋ فاكتىسى بويىنشا «ارسەلورميتتال تەمىرتاۋ» اق قر قك 277-بابىنىڭ 3-بولىگى بويىنشا سوتقا دەيىنگى تەرگەۋ باستالدى («تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ»).

بولجام بويىنشا، لاۆادا گاز مەتا جارىلعان.

قازاقستان بۇعان دەيىن 12 رەت ۇلتتىق ازا تۇتۋ كۇنىن جاريالاعان. ونىڭ ەكەۋى قاراعاندى وبلىسىنداعى شاحتادا بولعان جارىلىس پەن ءورتتىڭ كەسىرىنەن بولدى.

ەستەرىڭىزگە سالا كەتەيىك، 2006 جىلى قاراعاندى وبلىسىنىڭ شاحتينسك قالاسىنداعى «لەنين» اتىنداعى شاحتادا مەتاننىڭ جارىلۋىنان 41 كەنشى قازا تاۋىپ، جەتى جۇمىسشى زارداپ شەككەن.

2008 جىلى قاراعاندى وبلىسىنىڭ «اباي» شاحتاسىندا تاعى دا مەتان جارىلىپ، 30 ادام وپات بولعان.

قۇداي بەتىن ءارى قىلسىن، بۇل – ءۇشىنشىسى. وتكەن جىلى عانا تەمىرتاۋداعى «ارسەلورميتتال» كومپانياسىندا ونەركاسىپتىك قاۋىپسىزدىك تالاپتارىنىڭ بۇزىلعانى تۋرالى 2 مىڭنان استام فاكت انىقتالعان. ۋا، سوندا لاكشمي ميتتال ءۇشىن ادامنىڭ قۇنى كوك تيىن با؟ ەگەر سول كەزدەگى ولقىلىقتىڭ ورنىن تولتىرسا، بۇگىن بۇلاي زار ەڭىرەپ وتىرار ما ەدىك؟ وسىنداي قارا قىرعىن ءتورتىنشى رەت تيمەسىنە كىم كەپىل؟!

جانازا شىعارۋدا الدىنا جان سالمايتىن ۇكىمەت، بارسىڭ با ءوزى؟ 2 مىڭنان استام فاكت كورە تۇرا جۇمىسىن جالعاستىرۋعا رۇقسات بەرگەن قاراعاندى اكىمدىگى، شەل باسقان كوزىڭدى ءولىم عانا تىرناپ اشاتىنى نەسى؟ جاۋاپتى ورگاندار ءبىلسىن، ۇكىمەت لاكشميدى لاقشا باقىرتپاسا، حالىقتىڭ ءوزى شىرىلداتادى.

Abai.kz