كەشەگى قورعانۋشى، بۇگىنگى شابۋىلداۋشى ۋكراينا وزىنەن وتىز ەسە ۇلكەن مەملەكەتپەن تابان تىرەسىپ كۇرەسىپ قانا قويماي، ءوزىنىڭ اسكەري ءوندىرىسىن دە جولعا قويا بىلگەنى ەشكىمگە جاسىرىن بولماي قالدى، بۇگىن...

ۋكراينانىڭ اسكەري ءوندىرىس سالاسى قازىر 50 ملرد دوللاردىڭ شاماسىندا دەلىنەدى. 500 مىڭعا جۋىق ادام وسى سەكتوردا ىستەيدى ەكەن. مىڭنان استام كومپانيا تىركەلگەن. سوعىس باستالعانعا دەيىن بۇل كورسەتكىش الدەقايدا تومەن بولعان. ال اسكەري ءوندىرىس سالاسىنداعى كومپانيالاردىڭ سانى قوس قولدىڭ ساۋساعىمەن سانارلىق قانا بولعان.

ۋكراينانىڭ ءوز قارۋلارى...

سونىڭ ىشىندە ۋكراينانىڭ ءباس تىگىپ وتىرعانى - وت تۇمسىقتى تەمىر قۇستار (دروندار). FPV-دروندار، بارلاۋ جانە سوققىلاۋشى دروندار قازىر مايداندا ءوزىنىڭ تيىمدىلىگىن كورسەتۋدەي-اق كورسەتۋدە. مايدان شەبىندەگى جانە رەسەي اۋماعىنداعى ۋكراينا ءدوپ سوققان اسكەري، ەنەرگەتيكالىق نىسانداردىڭ ەداۋىر بولىگى ءدال وسى درونداردىڭ ەسەبىنە جازىلۋدا.

دروندار - ۋكراينانىڭ جالعىز قارۋى ەمەس. سوڭعى جىلدارى كيەۆ ارتيللەريا مەن بروندى تەحنيكا وندىرىسىندە دە ءوز قارۋىن جاساي تىلگەن. ونىڭ ءبىرى – «بوگدانا» دەيتىن ءوجاۇ (ساۋ). بۇعان تاعى مينومەتتەر مەن بروندالعان ماشينالاردى قوسىڭىز.

ەندى ايتپاق اڭگىمەمىزگە ويىسايىق: كەشەلى-بەرى رەسەي پرەزيدەنتى پۋتين مايداندا تاپ قازىر ەشقانداي ءۇزىلىس المايتىنىن، كەرىسىنشە، درونباسستى الماي، ۇرىستى توقتاتپايتىنىن قاقساپ ايتىپ، قاقىلداپ جاتىر.

ال بۇل كەزدە اسكەري ساراپشىلار «ۋكراينا ماسكەۋگە بالليستيكالىق زىمىراندارمەن سوققى جاساۋى مۇمكىن»، - دەگەندى اشىق ايتا باستادى. بۇنى ايتقان – «Fire Point» كومپانياسىنىڭ يەسى ءارى باس كونسترۋكتورى دەنيس شتيلەرمان.

ونىڭ بولجامىنشا، ۋكراينا وسى كۇزدە-اق، ماسكەۋدى باليستيكامەن سوققىلاۋى مۇمكىن. قازىر ۋكراينا ءوزى جاساپ شىعارعان سۋ جاڭا زىمىراندى سىناقتان وتكىزۋدىڭ سوڭعى كەزەڭىندە.

«سىناقتار سوڭىنا جەتكەن سوڭ، ۋكراينا رەسەي تەرريتورياسىنا سوققىلار جاساي باستايدى. ال قانداي نىسانداردى كوزدەپ اتاتىنىن اسكەريلەردىڭ وزدەرى شەشەدى»، - دەپ كەسىپ ايتتى.

«Fire Point» كومپانياسى — ۋكراينا ارمياسىنىڭ ەڭ ءىرى مەردىگەرلەرىنىڭ ءبىرى. بۇل كاسىپورىن «FP-1» دەيتىن الىسقا ۇشاتىن سوققىلاۋشى درونداردى جانە «FP-5 فلامينگو» كاناتتى زىمىراندارىن شىعارادى. كومپانيا «FP-7» جانە «FP-9» بالليستيكالىق زىمىراندارىن جاساپ جاتقانىن 2025 جىلدىڭ كۇزىندە ايتقان. قولدا بار مالىمەتتەرگە سەنسەك: «FP-7» زىمىرانى 250–300 شاقىرىمعا دەيىنگى، ال «FP-9» زىمىرانى 850 شاقىرىمعا دەيىنگى قاشىقتىقتاعى نىسانداردى جويۋعا قابىلەتتى.

تۇزدىق: بۇلاردان باسقا ۋكراينادا قازىر 500 شاقىرىمعا دەيىن ەنتىكپەي جەتەتىن «ساپسان» بالليستيكالىق زىمىران جوباسى تاعى بار. ۋكراينا بىلتىر بۇل زىمىرانداردى مايدان دالاسىندا قولدانا باستاعانى ايتىلعان.

وسىلايشا، رەسەي تولىقتاي قارۋسىزداندىرۋدى ماقسات ەتىپ، سوعىس اشقان ۋكراينا بۇگىندە ءوز قارۋ-جاراعىن، باليستيكالىق زىمىراندارىن جاساپ شىعاراتىن ەلگە اينالدى.

ال بۇگىن زەلەنسكي مەن ترامپ اق ۇيدە تاعى كەزدەستى. تالقىلانعان باستى ماسەلە - Patriot-قا ارنالعان زىمىرانداردى جاساپ شىعارۋعا بەرىلەتىن ليتسەنزيالار!

Abai.kz