بۇگىن ءماجىلىستىڭ جالپى وتىرىسىندا 2024-2026 جىلدارعا ارنالعان رەسپۋبليكالىق بيۋدجەتتى بەكىتتى. پالاتا توراعاسى ەرلان قوشانوۆ زاڭنىڭ ماڭىزدىلىعىنا توقتالىپ، اۋقىمدى جۇمىس اتقارىلعانىن اتاپ ءوتتى.

– مەملەكەت باسشىسى قاسىم-جومارت كەمەلۇلى توقاەۆ بيىلعى جولداۋىندا جاڭا ەكونوميكالىق ساياسات جاريالادى. ونىڭ تۇپكى مۇراتى – حالىقتىڭ ءال-اۋقاتىن ارتتىرۋ. وسى ورايدا رەسپۋبليكالىق بيۋدجەت، ءبىرىنشى كەزەكتە، پرەزيدەنت جۇكتەگەن مىندەتتەردى ىسكە اسىرۋعا باعىتتالىپ وتىر. ەڭ باستىسى بۇل قۇجات الەۋمەتتىك مىندەتتەمەلەردى تولىق ورىنداۋعا، ەلدىڭ تۇرمىسىن جاقسارتۋعا مۇمكىندىك بەرەدى، – دەدى ە.قوشانوۆ.

دەپۋتاتتار بيۋدجەتتى ەكى اي بويى جۇمىس توپتارىندا جان-جاقتى تالقىلاندى. ماجىلىستەگى بارلىق فراكتسيا وتىرىستارىن وتكىزىپ، ءوز ۇستانىمدارىن انىقتادى. تالقىلاۋ بارىسىندا كوپتەگەن سىني پىكىرلەر بولدى، ۇسىنىستار ايتىلدى. ەرلان قوشانوۆ ولاردىڭ بارلىعى بيۋدجەتتە ەسكەرىلگەنىن اتاپ ءوتتى.

– سايلاۋشىلارىمىزدى تولعاندىراتىن ەڭ وزەكتى ماسەلە – ينفلياتسيا مەن ازىق-تۇلىك باعاسى. جىلۋ، جارىق، جول، سۋمەن قامتاماسىز ەتۋ دە – تۇيتكىلدى ماسەلەلەر. مەملەكەتتىك بورىشتىڭ ءوسۋى دە دەپۋتاتتاردى الاڭداتىپ وتىر. ۇكىمەت بۇل جايتتارعا ەرەكشە كوڭىل ءبولىپ، جۇيەلى تۇردە اينالىسۋى قاجەت.

بيۋدجەتتى تالقىلاۋ كەزىندە سايلاۋشىلارىمىزدىڭ وسى جانە وزگە دە تالاپ-تىلەكتەرى ەسكەرىلدى، – دەدى پالاتا سپيكەرى.

ەرلان قوشانوۆتىڭ ايتۋىنشا، بىرقاتار جايتتاردى شەشۋ ءۇشىن دەپۋتاتتار تاراپىنان قوسىمشا قارجى قاراستىرىلعان. ءبىر عانا مىسال، 2,5 ترلن تەڭگە باعدارلامالاردىڭ، جوبالاردىڭ ماڭىزدىلىعىنا قاراي قايتا ۇيلەستىرىلدى.

سونىمەن قاتار ءماجىلىس توراعاسى ۇكىمەتكە ۇلتتىق قوردىڭ قاراجاتىنا يەك ارتا بەرمەي، باسقا دا كىرىس كوزدەرىن قاراستىرعان ءجون ەكەنىنە نازار اۋداردى.

– وزدەرىڭىز بىلەسىزدەر، پرەزيدەنتتىڭ تاپسىرماسىمەن «ۇلتتىق قور – بالالارعا» جوباسى ىسكە اسىرىلا باستادى. سوندىقتان ۇلتتىق قورداعى قارجى كولەمى قوعامنىڭ باستى نازارىندا ەكەنىن ۇمىتپاڭىزدار. ەندىگى مىندەت – رەسپۋبليكالىق بيۋدجەتتى ءتيىمدى ىسكە اسىرۋ. دەپۋتاتتار بەكىتىلگەن بيۋدجەتتىڭ ورىندالۋىنا جۇيەلى تۇردە باقىلاۋ جۇرگىزەتىن بولادى. مەملەكەت باسشىسى بىزگە ءدال وسىنداي جاۋاپتى مىندەت جۇكتەپ وتىر. ەڭ باستىسى، بيۋدجەتتىڭ ءار تەڭگەسى ءوز ماقساتىنا جەتۋى قاجەت، – دەدى ە.قوشانوۆ.

Abai.kz