ماجىلىسكە ماجارستان پرەمەر-ءمينيسترى ۆيكتور وربان كەلدى
![](https://abai.kz/content/uploads/2023/11/2.jpg)
ماجارستان پرەمەر-ءمينيسترى ۆيكتور وربان قازاقستانعا رەسمي ساپارى اياسىندا ءماجىلىس توراعاسى ەرلان قوشانوۆپەن كەزدەستى.
مارتەبەلى مەيماندى قارسى العان ءماجىلىس سپيكەرى قازاق پەن ماجار حالىقتارىنىڭ تاريحى تىعىز بايلانىستى ەكەنىن اتاپ ءوتتى.
ءماجىلىس توراعاسى ەكى ەل اراسىنداعى قارىم-قاتىناس قازاقستان پرەزيدەنتى مەن ماجارستان پرەمەر-ءمينيسترىنىڭ تۇراقتى كەزدەسۋلەرى ارقاسىندا ستراتەگيالىق ارىپتەستىك دەڭگەيىنە كوتەرىلگەنىن ايتتى.
ول ماجارستان ۇكىمەتىنىڭ باسشىسىن ەلدەگى اۋقىمدى رەفورمالار مەن ساياسي جۇيەنى قايتا جاڭعىرتۋ تۋرالى اقپارات بەردى. پرەزيدەنت قاسىم-جومارت توقاەۆتىڭ جاڭا ەكونوميكالىق ساياساتى اياسىندا 2029 جىلعا قاراي ۇلتتىق ەكونوميكانىڭ كولەمىن ەكى ەسەگە ۇلعايتۋ جوسپارلانعانىنا توقتالدى.
سونداي-اق ەرلان قوشانوۆ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتى اياسىندا پارلامەنتتىڭ ءرولى مەن مارتەبەسى كۇشەيگەنىنە نازار اۋداردى. قازىرگى شاقىرىلىم قازاقستان تاريحىندا ەڭ كوپپارتيالى بولىپ وتىر. ءماجىلىس ءتۇرلى ساياسي كوزقاراس پەن كۇشتەردىڭ الاڭىنا اينالدى. ايەلدەردىڭ، ەرەكشە قاجەتتىلىكتەرى بار ادامداردىڭ جانە جاستاردىڭ سانى كوبەيدى.
اڭگىمە بارىسىندا تاراپتار دوستىق توپتارى ارقىلى جانە باسقا دا الاڭداردا پارلامەنتتىك ديپلوماتيانىڭ دامۋ پەرسپەكتيۆالارىن تالقىلادى.
– ءبىز ماجارستانداعى ارىپتەستەرمەن ءتۇرلى حالىقارالىق فورۋمداردا، سونىڭ ىشىندە تۇركى مەملەكەتتەرى پارلامەنتتىك اسسامبلەياسىنىڭ ءىس-شارالارىندا ءجيى كەزدەسىپ تۇرامىز. ءبىر جىل بۇرىن ماجارستان مەملەكەتتىك اسسامبلەياسى توراعاسىنىڭ ورىنباسارى شاندور لەزساك قازاقستانعا كەلگەن بولاتىن. ماجىلىستە ناتيجەلى ديالوگ بولعان ەدى، – دەدى ەرلان قوشانوۆ.
Abai.kz