بۇگىن استانادا تۇركى مەملەكەتتەرى باسشىلارى باس قوسىپ جاتىر. ولار تۇركى مەملەكەتتەرى ۇيىمىنىڭ ونىنشى ءسامميتىن وتكىزۋگە جينالعان. دەمەك، بيىل تۇركى مەملەكەتتەرى ۇيىمىنىڭ قۇرىلعانىنا 10 جىل تولىپ وتىر.

اتالمىش ۇيىم باسىندا «تۇركىتىلدەس مەملەكەتتەردىڭ ىنتىماقتاستىق كەڭەسى» دەپ اتالعان بولاتىن. قۇرىلىمعا مۇشە ەلدەر باسشىلارىنىڭ العاشقى ءسامميتى 2011 جىلى الماتىدا وتكەن. 2021 جىلى ىستامبۇلدا وتكەن سامميتتە ۇيىم اتاۋىن وزگەرتۋدى ۇيعاردى.

ايتا كەتەتىن جايت، تمۇ بۇرىن مادەني بايلانىستار قۇرىلىمى رەتىندە باعالانىپ كەلگەن جانە الەم ساياساتكەرلەرى تاراپىنان وعان كوپ ءمان بەرىلمەگەن دەسەكتە بولادى. ال قازىر ۇيىمنىڭ دۇنيەجۇزىندەگى ساياسي سالماعى ارتىپ كەلەدى. وعان قاراباق ءۇشىن ءازىربايجان مەن ارمەنيا اراسىنداعى تەكەتىرەستىڭ ناتيجەسى اسەر ەتتى.

بيىلعى تۇركى مەملەكەتتەرى ۇيىمى باسشىلارىنىڭ مەرەيتويلىق ءسامميتىن قازاقستان ۇيىمداستىرىپ جاتىر. الەم كوز تىگىپ وتىرعان شاراعا ۇيىمعا مۇشە مەملەكەتتەر – ازەربايجان، قىرعىزستان، تۇركيا جانە وزبەكستان باسشىلارى قاتىسۋدا. سامميت جۇمىسىن ەكى ەل باقىلايدى. ولار – ماجارستان مەن تۇرىكمەنستان.

(سۋرەت اقوردا سايتىنان الىندى)

ورتاق قۇندىلىقتارىمىزدى تورتكۇل دۇنيەگە تانىتتىق!

ءساميتتىڭ القيسساسىن مەملەكەت باسشىسى قاسىم-جومارت توقاەۆ ايتتى.

مەملەكەت باسشىسى تۇركىتىلدەس مەملەكەتتەر ىنتىماقتاستىعى كەڭەسى قازىر تولىققاندى بەدەلدى حالىقارالىق ۇيىمعا اينالعانىنا ءمان بەردى.

«قازاقستاننىڭ باستاماسىمەن قۇرىلعان تۇركىتىلدەس مەملەكەتتەر ىنتىماقتاستىعى كەڭەسى قازىر تولىققاندى بەدەلدى حالىقارالىق ۇيىمعا اينالدى. «تۇركى الەمىنىڭ كەلەشەگى – 2040» اتتى قۇجات بەكىتىلدى. ەڭ باستىسى، باۋىرلاس ەلدەردىڭ بىرلىگىن بەكەمدەي تۇستىك. ورتاق قۇندىلىقتارىمىزدى تورتكۇل دۇنيەگە تانىتتىق.

ءبىز بابالار وسيەتىن ورىنداپ، تۇركى ەلدەرىنىڭ ىنتىماعىن نىعايتىپ كەلەمىز. ەندىگى ماقسات – ءوزارا سەنىمگە جانە باۋىرلاستىققا نەگىزدەلگەن بىرلىگىمىزدى ساقتاپ، وسكەلەڭ ۇرپاققا تابىستاۋ.

تۇركى الەمى جاھاندىق ىقپالى بار ەلدەرمەن تەڭ دارەجەدە قارىم-قاتىناس جاساپ وتىر. باسقا مەملەكەتتەر ءبىزدىڭ ۇيىمنىڭ ۇستانىمدارىنا باسا ءمان بەرەتىن بولدى. سوندىقتان، تۇركى حالىقتارىنىڭ ىقپالداستىعىن ارتتىرا ءتۇسۋ – بارىمىزگە ورتاق مىندەت»، – دەدى پرەزيدەنت.

قاسىم-جومارت توقاەۆ كىرىسپە-ءسوزىن تامامداعان سوڭ وزبەكستان پرەزيدەنتى شاۆكات ميرزيوەۆ، ازەربايجان پرەزيدەنتى يلحام اليەۆ، قىرعىز رەسپۋبليكاسىنىڭ پرەزيدەنتى سادىر جاپاروۆ، تۇركيا پرەزيدەنتى رەجەپ تايپ ەردوعان، تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ، ماجارستان پرەمەر-ءمينيسترى ۆيكتور وربان ءسوز سويلەدى.

مارتەبەلى مەيمانداردان كەيىن مەملەكەت باسشىسى بايانداما جاسادى.

قاسىم-جومارت كەمەلۇلى بايانداماسىندا تۇركى جۇرتىنىڭ بايكالدان بالقانعا دەيىنگى ۇلان-عايىر اۋماقتى جايلاپ جاتقانىن جانە تۇركى الەمىنىڭ وركەنيەتى ۇلى دالادان باستاۋ الاتىنىن ايتا كەلە، تۇركى مەملەكەتتەرى ۇيىمىن وسى ورتاق قۇندىلىقتاردىڭ مۇراگەرى دەپ اتادى.

«قازاقستان تۇركى مەملەكەتتەرى ۇيىمىن ودان ءارى دامىتۋعا مۇددەلى. تۇركى ىقپالداستىعىن تەرەڭدەتۋ – ورتاق مۇرات. ءبىز «تۇركى الەمى» اتتى جاڭا برەندتى دارىپتەۋىمىز كەرەك. سوندا عانا تۇركى حالىقتارىنىڭ ىنتىماعى بارىنشا نىعايىپ، الەۋەتى ارتا تۇسەدى.

قازاقستان ۇيىمعا توراعا رەتىندە ءوزارا ءىس-قيمىلدى جانداندىرۋعا باسا ءمان بەرىپ وتىر. سونداي-اق ءبىز ءتۇرلى سالاداعى بايلانىستى ورنىقتىرۋعا، حالىقارالىق بەدەلىمىزدى كوتەرۋگە كۇش سالامىز»، – دەدى مەملەكەت باسشىسى.

پرەزيدەنت تۇركى بىرلىگىن تانىتۋ ءۇشىن قازاقستاننىڭ توراعالىعى «تۇركى ءداۋىرى!»، ياعني «TURKTIME!» ۇرانىمەن وتەتىنىن جەتكىزدى.

«وسىعان وراي، سالت-ءداستۇر (Traditions), بىرىزدەندىرۋ (Unification), رەفورمالار (Reforms), عىلىم (Knowledge), سەنىم (Trust), ينۆەستيتسيا (Investments), مەدياتسيا (Mediation) جانە ەنەرگيا (Energy)» اتتى سەگىز ماسەلەگە باسىمدىق بەرەمىز. بۇل باسىمدىقتار ۇيىمنىڭ 20-شى سامميتىنە دەيىنگى ون جىلدى قامتيتىن قىسقا جانە ورتا مەرزىمگە ارنالعان. سونىڭ اياسىندا مىناداي شارالار اتقارۋدى ۇسىنامىن.

ءبىرىنشى باسىمدىق – سالت-ءداستۇر (Traditions). شىن مانىندە، تۇركى بىرلىگىن دارىپتەۋدىڭ ماڭىزى وتە زور. ءبىزدىڭ تاريحىمىز، مادەنيەتىمىز، ءتىلىمىز جانە ءدىلىمىز – ورتاق. وسىعان بايلانىستى تۇركى مەملەكەتتەرى ۇيىمىنىڭ، ونىڭ قۇرىلىمدارىنىڭ تۋلارىن جانە ەمبلەمالارىن ءبىر ۇلگىگە كەلتىرگەن ءجون. بۇگىن وزدەرىڭىزگە ۇسىنىلعان ەسكيزدەردى بىرگە قاراپ، ورتاق شەشىم قابىلدايمىز. بۇل تاريحي ءسات بولماق.

تاريحتان سىر شەرتەتىن ورتاق مۇراعاتتى زەرتتەپ، ۇرپاققا اقيقاتتى جەتكىزۋ – ءبىزدىڭ پارىزىمىز. قۇزىرلى ورگاندارىمىزعا بەيمالىم دەرەكتەردى بىرلەسىپ زەردەلەۋدى تاپسىرۋدى ۇسىنامىز. بۇل، شىن مانىندە، ماڭىزدى جۇمىس بولماق، سەبەبى ورتاق تاريحىمىزدا ءالى دە تولىق زەرتتەلمەگەن اقتاڭداقتار بار.

سونداي-اق ەلدەرىمىزدىڭ تەلەحيكايالارىن، ءوزارا ناسيحاتتاۋ ماڭىزدى. اسىرەسە، بالالارعا ارنالعان انيماتسيالىق فيلمدەردى كوبىرەك تاراتقان ءجون. بۇعان الەۋمەتتىك جەلىنى پايدالانۋ، تانىمال مەديا تۇلعالاردى جۇمىلدىرۋ كەرەك دەپ ەسەپتەيمىز. سول ارقىلى جاستارىمىزدى رۋحاني تۇرعىدان جاقىنداستىرۋعا مۇمكىندىك تۋارى ءسوزسىز»، - دەدى توقاەۆ.

پالەستيناعا كومەك: 1 ملن دوللار...

قاسىم-جومارت توقاەۆ:

«ەكىنشى باسىمدىق – بىرىزدەندىرۋ جۇمىسى (Unification). تۇركى مەملەكەتتەرىنىڭ قاتار دامۋى وتە ماڭىزدى. ءبىز مەملەكەتتەرىمىزدىڭ ستاندارتتارى جانە تەرمينولوگياسىن جۇيەلەگەن ءجون دەپ سانايمىز.

وسىعان بايلانىستى مودەلدىك زاڭ جوباسىن قىسقا مەرزىم ىشىندە قاراپ، ونى ماقۇلداۋعا شاقىرامىن. بۇل باستاما تاۋارلارىمىزدى ورتاق نارىققا ەركىن شىعارۋعا جول اشادى. ال بىرىڭعاي ستاندارتتار ىشكى جالپى ءونىمدى جىل سايىن شامامەن 1 پايىزعا ارتتىرۋعا مۇمكىندىك بەرەدى.

قازىر ەلدەرىمىزدىڭ ىشكى جالپى ءونىمى 1,4 تريلليون دوللارعا جۋىقتادى. بيىل ۇيىم مۇشەلەرى اراسىنداعى تاۋار اينالىمى 22 ميلليارد دوللاردان استى. ورتاق تالاپتار بەكىتىلسە، بۇل كورسەتكىشتى 1,5 ەسە ۇلعايتۋعا بولادى.

بۇدان بولەك، تۇركى مەملەكەتتەرى ۇيىمىنىڭ رەفەرەنتتىك ورتالىعىن قۇرعان ءجون دەپ سانايمىن. بۇل ورتالىق ءونىمدى سىناۋ ناتيجەلەرىن ءوزارا تانۋعا، سونداي-اق حيميا جانە تاماق ونەركاسىبى سالالارىندا جاڭا زەرتتەۋلەردى جۇرگىزۋگە مۇمكىندىك بەرەدى.

ءۇشىنشى باسىمدىق – رەفورمالار (Reforms). ۇيىم قىزمەتىن وڭتايلاندىرۋ شارالارىن جالعاستىرۋ كەرەك.

وسىعان وراي تۇركى مەملەكەتتەرى ۇيىمى جانىنداعى تۇراقتى وكىلدەرىمىزدى تاعايىنداۋ ماسەلەسىن تەزىرەك شەشۋگە شاقىرامىن. سونداي-اق حاتشىلىق قىزمەتكەرلەرىنىڭ سانىن كوبەيتۋ تۋرالى ۇسىنىستى قولدايمىز.

تۇركى مەملەكەتتەرىنىڭ سايلاۋ سالاسىنداعى ىنتىماقتاستىعىن نىعايتۋ قاجەت. ورتالىق سايلاۋ ورگاندارىنىڭ كونسۋلتاتيۆتىك كەڭەسىن قۇرۋعا بولادى. سوڭعى كەزدە ءبىزدىڭ ۇيىمعا حالىقارالىق جانە ايماقتىق قۇرىلىمداردىڭ قىزىعۋشىلىعى ارتا ءتۇستى.

ءبىز ەكونوميكالىق ىنتىماقتاستىق ۇيىمىنا بايقاۋشى مارتەبەسىن بەرۋ تۋرالى باستامانى قولدايمىز. سونىمەن قاتار ازىق-تۇلىك قاۋىپسىزدىگى جونىندەگى يسلام ۇيىمىمەن ىنتىماقتاستىق ورناتۋدى ۇسىنامىز.

ءتورتىنشى، عىلىمي ارىپتەستىك (Knowledge) ارقىلى ءبىلىم جانە عىلىم سالاسىنداعى ىنتىماقتاستىقتى نىعايتۋ اسا ماڭىزدى.

وسى ورايدا ەلدەرىمىزدە الەمدەگى ۇزدىك ۋنيۆەرسيتەتتەردىڭ فيليالىن اشۋدى ۇسىنامىن. بىرلەسكەن عىلىمي شارالار وتكىزىپ، تاجىريبە الماسۋ كەرەك. ءتىل ۇيرەتەتىن بولىمدەردى اشۋعا قاتىستى جۇمىستى رەتتەۋ قاجەت. جاساندى ينتەللەكتىنى، تسيفرلىق جانە اەروعارىش ونەركاسىبىن دامىتۋعا ەرەكشە نازار اۋدارعان ءجون.

بەسىنشى باسىمدىق – سەنىم (Trust). قازىر اۋمالى-توكپەلى زامان بولىپ تۇر. حالىقارالىق احۋال دا تۇراقسىز. وسىنداي الماعايىپ كەزەڭدە تۇركى جۇرتىنىڭ بىرلىگىن بەكەمدەي ءتۇسۋ اسا ماڭىزدى. بۇل – ورتاق قاۋىپسىزدىگىمىزدىڭ سەنىمدى كەپىلى.

قارۋ-جاراق جانە ەسىرتكى ساۋداسىنا، تەرروريزم مەن ەكسترەميزمگە، كوشى-قونعا قاتىستى سىن-قاتەرلەر كوبەيدى. مۇنداي قاۋىپتەردىڭ الدىن الۋ ءۇشىن قاۋىپسىزدىك سالاسىنداعى ىنتىماقتاستىقتى نىعايتۋىمىز كەرەك.

وسى ورايدا مەن كەلەسى جىلى استانادا مەملەكەتتەرىمىزدىڭ قاۋىپسىزدىك كەڭەسى حاتشىلارىنىڭ 3-ءشى وتىرىسىن وتكىزۋدى ۇسىنامىن. تۇركى مەملەكەتتەرىنىڭ قارجىلىق تەرگەۋ ورگاندارى اراسىندا قىلمىسپەن بىرگە كۇرەسۋ جانە اقپارات الماسۋ تۋرالى كەلىسىم جاساۋ ماڭىزدى.

التىنشى باعىت – ينۆەستيتسيا (Investments). ايماقتار اراسىندا ساۋدا-ساتتىقتى كەڭەيتىپ، ەكونوميكاعا قارجى قۇيۋعا باسا ءمان بەرگەن ءجون. بۇل ىستە تۇركى ينۆەستيتسيالىق قورى ەرەكشە ءرول اتقارادى.

تۇراقتى ەكونوميكالىق بايلانىستاردى نىعايتۋ ءۇشىن جاسىل قارجى نارىعىن دامىتۋ قاجەت. قازاقستان «تۇركى جاسىل قارجى كەڭەسىن» قۇرۋدى ۇسىنعانىن بىلەسىزدەر. وسى ۇسىنىستى جۇزەگە اسىرۋ ءۇشىن اۋقىمدى جۇمىس اتقارىلدى. بۇگىن ءتيىستى قۇجاتقا قول قويىلماق.

استانا قالاسىنا تۇركى الەمىنىڭ قارجى ورتالىعى مارتەبەسىن بەرۋ تۋرالى باستاما قولداۋعا يە بولدى. سىزدەرگە شىنايى العىسىمدى ايتامىن.

جەتىنشى. مەدياتسيانىڭ (Mediation) ءرولىن ارتتىرۋ – وزەكتى ماسەلە. قازىر اينالامىزدا كۇردەلى احۋال قالىپتاسىپ وتىر.

سولتۇستىكتە رەسەي مەن ۋكراينا، تاياۋ شىعىستا يزرايل مەن پالەستينا اراسىندا قاندى قاقتىعىس بولىپ جاتىر. اۋعانستاننىڭ جاعدايى دا تۇراقسىز. باتىستا زاڭسىز كوشى-قون ماسەلەسى ۋشىعىپ تۇر. بۇگىندە گازا سەكتورىنداعى بەيبىت تۇرعىندار، اسىرەسە، بالالار جانە قارتتار جانجال ازابىن شەگۋدە. ولاردىڭ قاۋىپسىزدىگىن قامتاماسىز ەتۋ – باستى مىندەت. وسى ورايدا، قازاقستاننان پالەستينا حالقىنا 1 ميلليون دوللار كولەمىندە گۋمانيتارلىق كومەك بەرۋ تۋرالى شەشىم قابىلدادىم.

ونداعان جىل بويى شەشىمىن تاپپاعان وزەكتى ماسەلەلەردى زورلىق-زومبىلىق كورسەتۋ جانە لاڭكەستىك ادىستەر ارقىلى شەشۋ مۇلدەم دۇرىس ەمەس. قازاقستان مۇنداي تاسىلدەردى قاتاڭ ايىپتايدى. احۋال ۋشىعىپ كەتسە، ونىڭ سالدارى ءتىپتى اۋىر بولۋى مۇمكىن. بۇل رەتتە كەز-كەلگەن جانجالدى بەيبىت كەلىسسوز جانە ديپلوماتيالىق ديالوگ ارقىلى عانا شەشۋگە شاقىرامىز. ءبىز ءۇشىن ءار ەلدىڭ اۋماقتىق تۇتاستىعىن ساقتاۋ جانە ونىڭ ىشكى ىسىنە قول سۇقپاۋ – باستى باسىمدىق. حالىقارالىق قۇقىق نورمالارىن ساقتاي وتىرىپ، بىرىككەن ۇلتتار ۇيىمى قاۋىپسىزدىك كەڭەسىنىڭ قارارلارىن مۇلتىكسىز ورىنداۋ ماڭىزدى. 

قازىر بىرىككەن ۇلتتار ۇيىمى قاۋىپسىزدىك كەڭەسىنىڭ قىزمەتى توقىراۋعا تۇسكەنى جاسىرىن ەمەس. وسىنداي كەزدە باس اسسامبلەيانىڭ ءرولىن كۇشەيتۋ كەرەك. بۇل رەتتە قاۋىپسىزدىك كەڭەسىن رەفورمالاۋ ىسىندە مەيلىنشە سىندارلى بولۋ قاجەت. ءبىزدىڭ ويىمىزشا، بۇل ماڭىزدى ورگان الەمنىڭ بارلىق ايماعىن قامتيتىن مەملەكەتتەرمەن تولىعۋعا ءتيىس. اسىرەسە، جاھاندىق وڭتۇستىك ەلدەرى تىس قالماۋى كەرەك.

الەمدەگى كۇردەلى ۇدەرىستەرگە قاتىستى تۇركى ەلدەرىنىڭ ءىس-قيمىلدارى بارىنشا بايىپتى بولعانى ءجون. بۇل تۇرعىدا تۇركى ينتەگراتسياسىن بەكەمدەي تۇسۋگە باسا ءمان بەرگەنىمىز ابزال.

سەگىزىنشى باسىمدىق – ەنەرگيا (Energy). ەنەرگيا قورىن ۇنەمدەۋ – ماڭىزدى مىندەتتىڭ ءبىرى.

قازاقستان جاڭا قۋات كوزدەرىن دامىتۋعا، جاڭعىرتۋعا جانە ونى تاسىمالداۋ جولىن ارتاراپتاندىرۋعا باسا ءمان بەرىپ وتىر. ءبىز گەولوگيالىق بارلاۋ، قۋات ءوندىرۋ ىستەرىنە وزىق تاجىريبەنى جانە تەحنولوگيانى ەنگىزۋگە ايرىقشا كوڭىل بولەمىز. مۇناي-حيميا ونەركاسىبىن دامىتۋعا ەرەكشە نازار اۋدارامىز. سونىمەن قاتار «جاسىل ەنەرگەتيكا» سالاسىندا بىرلەسىپ جۇمىس ىستەگىمىز كەلەدى.

مەن بيىل قازاقستاندا حالىقارالىق ەنەرگەتيكا فورۋمىن وتكىزۋدى ۇسىندىم. كوتەرىلگەن ماسەلەلەردى فورۋم كەزىندە كەڭىنەن تالقىلاۋعا بولار ەدى. قازاقستان كليماتتىڭ وزگەرۋىنە جانە تۇراقتى دامۋ قاعيداتتارىنا باسا ءمان بەرەدى.

2026 جىلى قازاقستاننىڭ باستاماسىمەن كليمات ماسەلەسىنە ارنالعان ايماقتىق سامميت وتكىزۋ جوسپارلانىپ وتىر. تۇركى باۋىرلارىمىز بۇل باستامالاردى قولدايدى دەپ سەنەمىن.

تۇركى مەملەكەتتەرىنىڭ قاۋىپ-قاتەرلەرگە قارسى بىرىگۋى، ءوزارا كومەك كورسەتىپ، ءتيىمدى ءىس-ارەكەت جاساۋى وتە ماڭىزدى.

بابالارىمىز «تىرلىك باسقا بولسا دا – تىلەك ءبىر، بارماق باسقا بولسا دا – بىلەك ءبىر» دەگەن. ءبىزدىڭ تۇركى ىقپالداستىعىن نىعايتۋ جولىنداعى ورتاق تابىسىمىز – سونىڭ ايقىن كورىنىسى. ءسامميتتىڭ قورىتىندىسى بويىنشا بىرقاتار شەشىم قابىلدانادى، قۇجاتتارعا قول قويىلادى. ونىڭ ءبارى تۇركى الەمىن وركەندەتۋگە، ەلدەرىمىزدىڭ ىنتىماعىن ارتتىرۋعا ىقپال ەتەدى. سونداي-اق ايماقتاعى ىقپالداستىقتى دامىتۋعا جانە ۇيىمنىڭ بەدەلىن كۇشەيتۋگە زور ۇلەس قوسادى دەپ سەنەمىن.

بىرلىگىمىز نىعايا بەرسىن!» – دەدى مەملەكەت باسشىسى بايانداماسىندا.

(سۋرەت اقوردا سايتىنان الىندى)

ماجارستان «ب» جوسپارىن قولدايدى!

ۆيكتور وربان:

ماجارستان پرەمەر-ءمينيسترى ۆيكتور وربان ەو-نىڭ ۋكراينانى ودان ءارى قارجىلاندىرۋ جوسپارىن ءساتسىز دەپ اتادى. وربان مۇنى استانادا ءوتىپ جاتقان تۇركى مەملەكەتتەرى ۇيىمىنىڭ سامميتىندە سويلەگەن سوزىندە ايتتى.

ول ەۋروپانىڭ ۋكراينانى قارۋ-جاراقپەن قامتاماسىز ەتۋ تاكتيكاسى ەندى ىسكە اسپايتىنىن جانە بۇل تاكتيكانىڭ ءپۋتيندى توقتاتا المايتىنىن جەتكىزدى.

«ارينە، بۇل ءساتسىز جوسپار. امبيتسياسى مىقتى، بىراق ءساتسىز. بۇل جوسپار جۇزەگە اسپايدى جانە وسى ۋاقىتقا دەيىن ناتيجەسىن كورگەن ەمەسپىز. ەۋروپالىق ساياساتكەرلەردىڭ كەمشىلىگى وسىندا: ءبىز شىندىققا بەتپە-بەت كەلىپ، «ب» جوسپارىن جاسايمىز با، جوق پا؟ كەيبىر ەلدەر قازىر ىستەپ جاتقانىمىزدى جالعاستىرايىق دەسە، باسقا ەلدەر «ب» جوسپارىن ۇسىنىپ جاتىر. قازىر ۋكرايناعا 50 ميلليارد ەۋرو ءبولۋ يدەياسى بار. بۇل الدىڭعى ستراتەگيانىڭ ءساتسىز بولعانىن، ونى جالعاستىرۋ كەرەكتىگىنىڭ جانە ودان دا كوپ اقشا ءبولۋ قاجەت ەكەندىگىنىڭ بەلگىسى. ەندى بۇل پىكىرتالاس ەۋروپالىق وداق ىشىندە ۇلكەن داۋ تۋدىرىپ وتىر. جانە وسى داۋ تاعى ءبىر-ەكى اي جالعاسادى. بىراق، مىرزالار، پرەزيدەنتتەر، مەن ماجارستاننىڭ «ب جوسپارىن» قولدايتىنىن ايتقىم كەلەدى.ءبىز بەيبىتشىلىككە، ۋكرايناعا دا، رەسەيگە دە قولايلى قاۋىپسىزدىكتىڭ جاڭا ينفراقۇرىلىمىن جاساۋعا شاقىرامىز»، – دەدى وربان.

Abai.kz