ەكى وتتىڭ ورتاسىندا قالعان امەريكا
![](https://abai.kz/content/uploads/2023/11/facebook_comwhitehouse1_1200x675.jpg)
امەريكا پرەزيدەنتى بايدەن بيلىككە كەلگەلى ازيا-تىنىق مۇحيت ايماعىندا ءىرى جۇرىستەر جاسادى. فيليپپينمەن، ۇندىستانمەن جاڭا قاۋىپسىزدىك كەلىسىمىنە قول جەتكىزدى.
ايماقتا اسكەري جاتتىعۋدى كۇشەيتتى. سەرىكتەستەرىن قىتايعا جوعارى تەحنولوگيالاردى بەرمەۋگە كوندىردى. بىراق حاماس-تىڭ يزرايلگە كۇتپەگەن جەردەن جاساعان شابۋىلى اق ءۇيدى قايتادان ورتا شىعىسقا قايرىلۋعا ءماجبۇر ەتتى.
جوعارى شەندىلەردىڭ تەل-اۆيۆكە ات سابىلتىپ بارعانىن ايتپاعان دا، قورعانىس مينيسترلىگى ەرەكشە جۇمىس توبىن قۇردى. اسكەري كومەكتى كۇشەيتتى.
وسىنىڭ ءبارى ازيا-تىنىق مۇحيت ايماعىنداعى ارىپتەستەرىن الاڭ قىلۋدا. ولار امەريكا ايماقتاعى اسكەري كۇشتەرىن ورتا شىعىسقا جوتكەپ كەتەدى مە دەپ قاۋىپتەنەدى. بۇل جايىندا «نيۋ-يورك تايمس» گازەتى ماقالا جاريالادى.
گازەتكە سۇحبات بەرگەن جاپونيا پارلامەنتىنىڭ مۇشەسى: «ءبىزدى الاڭداتاتىنى امەريكانىڭ اسكەري رەسۋرستارىن ەۋروپاعا، ورتا شىعىسقا اكەتەدى مە دەگەن قاۋىپ. يزرايل مەن حاماس-تىڭ سوعىسى تەزىرەك اياقتالعانى ءبىز ءۇشىن ءتيىمدى»، - دەگەن.
بۇل سوعىستا جاپونيا بەيتاراپ پوزيتسيا ۇستانسا، ءۇندىستان ءيزرايلدى قولداعان. ال يندونەزيا ەۆرەي ەلىن ايىپتاپ، پالەستينا جۇرتىنا قولداۋ ءبىلدىرىپ وتىر.
اراداعى مۇنداي الاۋىزدىقتى بولدىرماۋ ءۇشىن امەريكانىڭ سىرتقى ىستەر ءمينيسترى مەن قورعانىس ءمينيسترى ايماققا ساپارمەن بارماق.
ەرتەڭ سان-فرانتسيسكو قالاسىندا ايماق ەلدەرىنىڭ APEK ەكونوميكالىق فورۋمى وتەدى. اقش-قا باسەكەلەس قىتاي باسشىسى دا بارادى. ميللياردتار ەلىنىڭ باسشىسى اقش-تىڭ اۋىلشارۋاشىلىق ونىمدەرىمەن بوينگ ۇشاعىن ساتىپ الۋعا قۇلىقتى دەيدى باق.
قازىرگى ەكونوميكالىق داعدارىس كەزىندە امەريكا تارابىنىڭ اراداعى ساياسي ارازدىقتى ىسىرىپ قويىپ، قۋانا كەلىسەرى حاق. بايدەننىڭ بۇل قادامدارى ايماقتاعى ارىپتەستەرىن تاعى دا الاڭداتىپ، سەنىمىنە سەلكەۋ ءتۇسىرۋى مۇمكىن.
Abai.kz