جاپونيا كۋريل ارالدارىنا قاتىستى رەسمي پوزيتسياسىن تاعى دا ءبىلدىردى. مينيسترلەر كابينەتىنىڭ باس حاتشىسى حيروكادزۋ ماتسۋنو كۋريل ارالدارى جاپون حالقىنىڭ تاريحي جەرى جانە ونىڭ ءبىر بولىگى وككۋپاتسيادا جاتقانىن ايتتى.

«سولتۇستىك ايماقتار ءبىزدىڭ ەلىمىزدىڭ تاريحي، بايىرعى جەرى سانالادى. ول ايماققا جاپونيا سۋۆەرەنيتەتى دە جۇرەتىنىن ايتقىمىز كەلەدى. بۇل پوزيتسيا مىزعىماس جانە وزگەرمەيدى»، - دەدى. ول جاپونيا رەسەيمەن بەيبىت كەلىسىم جاساۋ ءۇشىن، ەڭ الدىمەن سوعىستان كەيىن كسرو قۇرامىنا وتكەن ءتورت ارالدى قايتارۋ ماسەلەسى شەشىلۋ قاجەتتىلىگىن ايتتى. ءتورت ارال رەتىندە جاپونيا يتۋرۋپ، كۋناشير، شيكوتان ارالدارى مەن كىشى ارالداردان قۇرالعان حابوماي ارالدارىن اتايدى.

جاپونيا رەسەيمەن ۇزاق جىلدار بويى كۋريل ارالدارىنىڭ ماسەلەسىن شەشۋ ءۇشىن كەلىسسوز جۇرگىزۋدە. ۋكرايناعا رەسەيدىڭ سوعىس اشۋىنان كەيىن توكيو انتيرەسەيلىك پوزيتسياعا اشىق كوشتى. بۇل 2020 جىلى رەسەيدە وتكەن كونستيتۋتسيالىق رەفەرەندۋمعا بايلانىستى. رەسەي جاڭا كونستيتۋتسيا ەنگىزىپ، ارالداردى بەرۋ ماسەلەسىن زاڭمەن شەكتەيتىن وزگەرىستەر ەنگىزگەن-ءدى. رەسەي مەن جاپونيا سوڭعى رەت سينگاپۋردە باس قوسىپ، ارالدار بويىنشا بىرقاتار ماسەلەنى تالقىلاعان ەدى. الايدا 2022 جىلدان كەيىن بۇل ماسەلە مۇلدە تالقىلانبادى.

جاپون حالقى ءۇشىن كۋريل ارالدارى ازەربايجان ءۇشىن قاراباق تاقىرىبىنداي يدەولوگيالىق ماڭىزعا اينالدى. توكيو ميليتاريستىك ساياساتتى العا جىلجىتۋ ماقساتىندا، كۋريل ارالدارى تاقىرىبىن ءجيى قوزعاۋدا. ال رەسەيدىڭ وزگە ەلگە شابۋىل جاساۋى بۇگىندە الەمدىك گەوساياسي ويىنداردىڭ ەرەجەسىن وزگەرتىپ، «ءبىر ەلدىڭ جەرىن تارتىپ الۋ ءداۋىرىن» قايتا باستادى دەيدى ساراپشىلار. بۇگىندە كۋريل ماسەلەسىن كۇشپەن شەشۋ قاجەت دەپ سانايتىن جاپوندار سانى ارتقان.

Abai.kz