بۇگىن كەزەكتەن تىس پرەزيدەنت سايلاۋىنا ءبىر جىل تولىپ وتىر. وسىعان بايلانىستى مەملەكەت جانە قوعام قايراتكەرلەرى ءوز ويلارىمەن ءبولىسىپ جاتىر. فەيسبۋكتەگى پاراقشاسىندا ءماجىلىس توراعاسى ەرلان قوشانوۆ سايلاۋ قارساڭىندا مەملەكەت باسشىسىنىڭ جەكە تۇلعاسىنا دەگەن حالىقتىڭ ەرەكشە ىقىلاسى، شىنايى قۇرمەتى ايقىن كورىنگەنىن اتاپ ءوتتى.

– حالىقتىڭ وڭ وزگەرىستەرگە دەگەن سەنىمىنىڭ بەرىك ورنىققانىنا كوز جەتكىزدىك. وزگەرىستەر حالىقتىڭ ءۇمىتىن وياتتى، رۋحىن كوتەردى. سوندىقتان ازاماتتارىمىز مەملەكەتتىڭ، ەلدىڭ بولاشاعى ءۇشىن قاپىسىز تاڭداۋىن جاسادى. حالىقتىڭ ول ءۇمىتى مەن سەنىمى نەگىزسىز ەمەس بولاتىن. بۇل 2019 جىلى باستالعان قاسىم-جومارت توقاەۆتىڭ تۇبەگەيلى ساياسي رەفورمالارىنىڭ ناتيجەسى ەكەنى اقيقات. وسى ورايدا، ادىلەتتى قازاقستان قۇرۋ يدەياسى ادىلدىككە، ادالدىققا، وزگەرىسكە شولىركەپ وتىرعان قوعام سۇرانىسىنىڭ ۇدەسىنەن شىقتى دەپ سەنىممەن ايتا الامىز، – دەدى ءماجىلىس سپيكەرى.

ەرلان قوشانوۆ بۇل باعىتتا مەملەكەت باسشىسى تاباندى، باتىل قادامدار جاساعانىنا توقتالدى. كونستيتۋتسيانىڭ ۇشتەن ءبىرى جاڭاردى، قازاقستاننىڭ قازىنا-بايلىعى حالىقتىڭ مەنشىگى دەپ تانىلدى، پرەزيدەنت وكىلەتتىگى ءبىر مەرزىممەن شەكتەلدى، بيلىك ينستيتۋتتارى تولىقتاي جاڭعىردى، پارلامەنتكە التى بىردەي ساياسي پارتيانىڭ وكىلدەرى كىردى، شىنايى ازاماتتىق قوعامنىڭ ىرگەسى بەكەمدەلىپ جاتىر، پرەزيدەنت جاڭا ەكونوميكالىق باعدار ۇسىندى.

پالاتا توراعاسى وسىنىڭ ءبارى مەملەكەت باسشىسىنىڭ ايتقان «ادىلەتتى مەملەكەت – ادىلەتتى ەكونوميكا – ادىلەتتى قوعام» فورمۋلاسىنىڭ ناقتى ورىندالۋىنا العىشارت بولعانىنا نازار اۋداردى.

– پرەزيدەنت قوعامدا زاڭ مەن ءتارتىپتىڭ مۇلتىكسىز ساقتالۋى كەرەكتىگىن ۇنەمى ايتىپ كەلەدى. زاڭ مەن ءتارتىپ ۇستەمدىك قۇرعان كەزدە عانا قازاقستاندى ادىلەتتى، باقۋاتتى ەلگە اينالدىرا الامىز. بۇل ءوز قولىمىزدا. ارينە، ول جولدىڭ وڭاي بولمايتىنى تۇسىنىكتى. قازىرگىدەي اۋمالى-توكپەلى زاماندا وسى ماقسات-مىندەتكە ەلدىڭ بىرلىگى مەن بەرەكەسى ارقىلى عانا جەتە الامىز. وتكەن جىلعى پرەزيدەنت سايلاۋى وسىنى كورسەتتى. سول سايلاۋدا قاسىم-جومارت كەمەلۇلىنىڭ توڭىرەگىنە ەل بولىپ، ۇلت بولىپ ۇيىستىق. بارلىق قوعامدىق كۇشتەر ءبىر تۋدىڭ استىنا – ءبىر كوالياتسياعا بىرىكتىك. ۇلى مۇرات جولىندا العان باعىتىمىزدان تايمايتىنىمىزدى دالەلدەدىك.ەل مۇددەسى بارىنەن بيىك، ۇلت بولاشاعى بارىنەن قاستەرلى. وسى باعىتتا جۇدىرىقتاي جۇمىلساق قانا بارلىق سىناقتان سۇرىنبەي وتەمىز، – دەدى ە.قوشانوۆ.

Abai.kz