كەشە باق وكىلدەرى پارلامەنت كۋلۋارىندا جۇرتتىڭ كوكەيىندە جۇرگەن ەۋرازيالىق ەكونوميكالىق وداقتان (ەاە) جانە ۇقشۇ-دان شىعۋىنا قاتىستى ەكى ساۋالدى قازاقستان ساۋدا ءمينيسترى جانە ەلدىڭ سىرتقى ىستەر ءمينيسترىنىڭ ورىنباسارىنا قاتار قويدى.

سۋرەت: قر ءسىم ءباسپاسوز قىزمەتى

سىرتقى ىستەر ءمينيسترىنىڭ ورىنباسارى قايرات وماروۆ جاۋابىندا:

«بۇل ۇيىمعا مۇشە بولۋعا قاتىستى كوپتەگەن پىكىر ايتىلدى. بىراق بۇگىنگە دەيىن بىردە-ءبىر مەملەكەت مۇشەلىگىن توقتاتۋعا رەسمي تۇردە جۇگىنبەدى. سوندىقتان ءبىز ۇقشۇ قۇرامىندا قانداي دا ءبىر وزگەرىستەردى قاراستىرمايمىز. سىرتتا بولعاننان گورى ىشتە بولعان جاقسى. قازاقستاننىڭ [ۇقشۇ-دان شىعۋ بويىنشا] جوسپارى جوق. بۇل ۇيىمدى قۇرۋدىڭ باستاۋىندا ءبىز دە تۇردىق. ول ءبىزدىڭ مۇددەلەرىمىزگە جۇمىس ىستەيدى دەپ سانايمىز. ۇقشۇ شەڭبەرىندەگى بارلىق شەشىم كونسەنسۋس ءپرينتسيپى نەگىزىندە قابىلدانادى»، - دەسە، ءوز كەزەگىندە ساۋدا جانە ينتەگراتسيا ءمينيسترى ارمان شاققاليەۆ: «وداقتان شىعۋ تۋرالى رەسمي ينيتسياتيۆا بولمادى. [وداقتان شىعۋ] تۋرالى ساراپشىلار كوپ ايتىپ جاتىر. بىراق بىزدە ەشقايدان شىقپايمىز. بۇل – ءبىزدىڭ رەسمي پوزيتسيامىز. وداقتان شىعۋعا ەشقانداي ەكونوميكالىق، ساياسي جاعىنان سەبەپ جوق»، - دەپ شورت كەستى.

ارمان شاققاليەۆ - قر ساۋدا جانە ينتەگراتسيا ءمينيسترى

كەزىندە كسرو قۇلاپ، ونىڭ قيراندىسىنان بوي تۇزەگەن ءپۋتيننىڭ «قوس پەرەزەنتى» وسىلايشا بيلىكتەگى توپتار ءۇشىن باعا جەتپەس قۇندىلىق ەكەن. وسى پۋتيندىك قۇندىلىقتار ەلىمىزدى گەوساياساتتا كەرى تارتاتىنىن قازاقتىڭ كوزى اشىق جۇرتىنىڭ ءبارى بىلەدى. بىراق بيلىكتىڭ بىلسە دە بىلگىسى كەلمەيتىنىن ساياسي-الەۋمەتتىك پارادوكسكە اينالىپ وتىر.

رەسەيدىڭ اۋەلى گۇرجىستانمەن، ودان كەيىن ۋكراينامەن سوعىسۋى – ۇقشۇ-نىڭ جالپى قازاققا كەرەگى بار ما دەگەن ويعا ءتۇسىردى.

ءبىرىنشى ەسىن جيعان ارمەنيا بولدى. ەسىن جيدى دەگەنىمىز ولار بارلىق ساياسي-ەكونوميكالىق كىرىپتارلىقتى قاپەرگە الا وتىرىپ، سەنىمدى وداقتاستىقتان – سەنىمدى ارىپتەستىككە كوشۋدىڭ قيلى نۇسقاسىن ماسكەۋگە ۇسىندى. بىراق جۇرتىڭ ءبارى «كىشى ءىنى»، ال ءوزىن «ۇلكەن اعا» سانايتىن كرەمل بۇعان ەش كونبەك ەمەس.

وسىدان ەكى جىل بۇرىن اقش ساراپشىلار دا، «ارمەنياداعى توڭكەرىس، رەسەيگە قارسىلىق ەمەس، تەك وداقتاستىقتان ارىپتەستىككە ءوتۋدىڭ وتپەلى كەزەڭى» دەگەن بولاتىن. ارمەنيا بۇل وتپەلى كەزەڭنەن قاراباقتاعى جەڭىلىسپەن ساتىمەن وتە الدى.

مينسكىگە ارمەنيانىڭ بارماۋى ۇقشۇ شىعام دەۋى ەمەس، وزىنە تيسەلى جارناسىن تولەپ، شارتتارىن مويىنداپ، وداقتاستىق ەمەس، ارىپتەستىك قارىم-قاتىناستى ساقتاماقشى بولعان ساياسي قادامىنان. ءبىز نەگە ارمەنيا ۇستانعان ءپرينتسيپتى باسشىلىققا المايمىز؟

ايتپاقشى، ۇقشۇ-نىڭ كەزەكتى باسقوسۋى بۇگىن مينسكتە وتەدى. وعان ۇيىمعا مۇشە مەملەكەتتەردىڭ باسشىلارى بىرتە-بىرتە بارىپ جاتىر. وندا قانداي ناقتى ماسەلەلەر كوتەرىلدى، قانداي شەشىمدەر قابىلداندى، بۇل تۋرالى كەيىنىرەك ەگجەي-تەگجەيلى جازاتىن بولامىز.

Abai.kz