تاۋەلسىزدىك كۇنى قارساڭىندا ەلوردادا «AMANAT» پارتياسىنىڭ ءداستۇرلى «ۇلى دالا» رەسپۋبليكالىق شىعارماشىلىق بايقاۋى قورىتىندىلاندى. بيىل ادەبي دودا الاش قوزعالىسىنىڭ قايراتكەرى، اقىن، پەداگوگ ماعجان جۇماباەۆتىڭ 130 جىلدىعىنا ارنالدى.

ءسوز باسىندا ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ ۇلتتىق مۇددەگە ساي كەلەتىن كىتاپتاردى كوپتەپ باسىپ شىعارۋ ماسەلەسى ءاردايىم مەملەكەت باسشىسى قاسىم-جومارت توقاەۆتىڭ نازارىندا ەكەنىن جانە مەملەكەت، پارتيا تاراپىنان مادەنيەتكە، ادەبيەتكە قولدان كەلگەنشە كومەك كورسەتىلە بەرەتىنىن اتاپ ءوتتى.

«ادەبيەتتەگى جاس بۋىن ءۇشىن «ۇلى دالا» بايقاۋى ايتۋلى وقيعاعا اينالدى دەپ ويلايمىن. وسى ماڭىزدى ءىس-شارانى جىل سايىن تاۋەلسىزدىك كۇنىنە ورايلاستىرىپ وتكىزەمىز. ويتكەنى، ۇلت تاۋەلسىزدىگىنىڭ رۋحاني تىرەگى – ونىڭ ءتىلى مەن ادەبيەتى، مادەنيەتى. ءبىز ءوز تاراپىمىزدان سىزدەردى قولداۋعا ءاردايىم ءازىرمىز»، – دەدى ول.

ەرلان قوشانوۆتىڭ پىكىرىنشە، قازىر قوعامدىق كەسەلگە اينالعان ەسىرتكى، لۋدومانيانىڭ بەلەڭ الۋى «رۋحاني قالقاننىڭ» بولماۋىنان. سوندىقتان وقىرمانعا وسى زاماننىڭ بولمىسىن بەينەلەيتىن تىڭ تۋىندىلار، وبرازدار مەن جاڭا كەيىپكەرلەر كەرەك. توراعا كىتاپسۇيەر قاۋىم جاڭا تولقىن قالامگەرلەردەن سالماقتى، ماعىنالى دۇنيەلەر كۇتىپ وتىرعانىن ايتتى.

«ءبىز كىتاپپەن ءومىر سۇردىك. ادەبيەت بىزگە مورالدىق، رۋحاني قالقان بولدى. ال رۋحاني قالقان دەگەنىمىز نە؟ ول – جاستاردى، وسكەلەڭ ۇرپاقتى دۇرىس جولعا باعىتتاپ، بۇرىس جولدان ساقتايتىن قۇندىلىقتارىمىز. بۇرىن قوعامدى كىتاپ تاربيەلەسە، قازىر ينتەرنەت پەن كوشە تاربيەلەپ جاتىر. مۇنىڭ جولى – جاس ۇرپاقتى وتانشىلدىققا، ىزگىلىككە، ادامگەرشىلىككە تاربيەلەۋ. ال، ول قۇندىلىقتاردىڭ ءبارى – كىتاپتا، ادەبيەتتە.  بۇل تۋرالى مەملەكەت باسشىسى دا ءاردايىم ايتىپ كەلەدى»، – دەدى «AMANAT» پارتياسىنىڭ توراعاسى.

اتالعان كونكۋرس وسىمەن ءتورتىنشى رەت وتكىزىلىپ وتىر. بيىل ادەبي دودانىڭ وبلىستىق ىرىكتەۋى ۇيىمداستىرىلىپ، بايقاۋعا باس-اياعى 300-دەن استام شىعارما كەلىپ ءتۇستى. ونىڭ 170-ءى اقتىق كەزەڭگە جولداما الدى.

«ۇلى دالا» بايقاۋىنا «ادەبي سىن» نوميناتسياسىن ەنگىزۋ – ۇلكەن جاڭالىق بولدى. جالپى، ادەبي سىن بولمايىنشا، ادەبيەت دامىمايدى. بايقاۋعا ءبىر ەمەس، بىرنەشە ماتەريال كەلىپ ءتۇستى. ونىڭ ءبارىن وي ەلەگىنەن وتكىزىپ، لايىقتى باعاسىن بەردىك. سوندىقتان بۇل جانرعا كەلەشەكتە بارىنشا كوڭىل ءبولۋ كەرەك»، – دەدى قازىلار القاسىنىڭ مۇشەسى، ادەبي سىنشى امانگەلدى كەڭشىلىكۇلى.

سونىمەن، «پوەزيا» نوميناتسياسى بويىنشا ءبىرىنشى ورىندى ۇمتىل زارىققان, ەكىنشى ورىندى ايزادا راحىمجانوۆا, ءۇشىنشى ورىندى ەربول الشىنباي يەلەندى.

«پروزا» نوميناتسياسىندا ءبىرىنشى ورىنعا باقىتبەك قادىر, ەكىنشى ورىنعا سايان سەكسەنباەۆ, ءۇشىنشى ورىنعا مەرەي قاينارۇلى لايىق دەپ تانىلدى.

«بالالارعا ارنالعان شىعارما» نوميناتسياسى بويىنشا ءبىرىنشى ورىندى نۇربەك كەڭەسباي, ەكىنشى ورىندى اباي ورىنباي, ءۇشىنشى ورىندى اقمارال وماروۆا قانجىعالادى.

«دراماتۋرگيا» نوميناتسياسىندا ءبىرىنشى ورىندى قانات تىلەۋحان, ەكىنشى ورىندى تايبەك ابدۋللين, ءۇشىنشى ورىندى قۋات قيىقباي جەڭىپ الدى.

«ادەبي سىن» نوميناتسياسى بويىنشا ءبىرىنشى ورىن ءبىرجان احمەرگە, ەكىنشى ورىن انار ابدۋلليناعا, ءۇشىنشى ورىن مەيىر ورازعاليەۆكە بۇيىردى.

سونىمەن قاتار، «الاش اماناتى» ارنايى سىيلىعىن زەرتتەۋشى-عالىم باقتيار باتەۋ, «ماعجان جۇماباەۆتىڭ 130 جىلدىعى» ارنايى سىيلىعىن ارنايى سىيلىعىن اقىن، ساتيريك ابىلاي ماۋدانوۆ يەلەندى.

«قازىر ادەبيەتپەن كاسىبي اينالىسۋعا مۇمكىندىك از. بىرىنشىدەن، قالاماقى ماسەلەسى شەشىلگەن جوق، ەكىنشىدەن بىزدە كىتاپ نارىعى ءالى قالىپتاسپاي جاتىر. ايتكەنمەن، وسى ولقىلىقتىڭ بەلگىلى ءبىر بولىگىن ادەبي بايقاۋلار تولتىرىپ وتىر. بۇل قادام شىعارماشىل جاستاردى جازۋعا ىنتالاندىرادى. سوندىقتان، وسىنداي ادەبي بايقاۋلاردى ۇزبەي، جىل سايىن وتكىزىپ تۇرۋ كەرەك»، – دەدى بايقاۋ جەڭىمپازى، جازۋشى باقىتبەك قادىر.

Abai.kz