ەلوردادا «Okadzaki» قوعامدىق تاماقتانۋ نىساندارىنىڭ بىرىندە جاپپاي تاعامنان ۋلانۋ جاعدايى تىركەلدى. بۇل تۋرالى استانا قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى ءمالىم ەتتى.

باستاپقىدا الەۋمەتتىك جەلىلەردە «Okadzaki» مەيرامحاناسىنان تاماقتانىپ، ۋلاندىق دەگەن جازبالار جاريالانا باستادى.

«العاشقى ەكى كۇن قاتتى اۋىردىم جانە جاڭاجىلدىق ءىس-شارالارعا قاتىسقاندىقتان، ۆيرۋس جۇقتىرعان شىعارمىن دەپ ويلادىم. دەنە قىزۋى، السىزدىك، 5 كۇن توقتاماستان ديارەيا بولدى. جەدەل جاردەم قىزمەتىن شاقىرعاندا، ولار «ينفەكتسيالىق ۋلانۋ» دياگنوزىن قويدى. سونىڭ الدىندا «Okadzaki» مەيرامحاناسىنا سۋشي جەۋگە بارعانبىز. مەنىمەن بىرگە مەيرامحاناعا بارعان تاعى ەكى قۇربىمدا ۋلانۋ بەلگىلەرى بايقالدى. بىرەۋى جۇقپالى اۋرۋلار ورتالىعىنا بارىپ قارالدى. ونداعى دارىگەرلەر دە تاماقتان ۋلانىپ تۇسكەن پاتسيەنتتەر كوپ ەكەنىن ايتقان»، - دەيدى زارداپ شەگۋشىلەردىڭ ءبىرى ءامينا سۇلتانعازى.

بۇل ماسەلە جونىندە سانيتاريالىق-ەپيدەميولوگيالىق باقىلاۋ دەپارتامەنتى پىكىر ءبىلدىردى.

«Okadzaki» مەيرامحاناسىنداعى ۋلانۋ جاعدايى جەلتوقساندا ورىن الدى، ول بويىنشا قازىرگى ۋاقىتتا ەپيدەمياعا قارسى ءىس-شارالار جۇرگىزىلۋدە. بۇگىنگى كۇنى زارداپ شەككەندەردىڭ سانى 37 ادامدى قۇرادى. ءوتىنىش بەرۋشىنىڭ شاعىمى نەگىزىندە جوسپاردان تىس تەكسەرۋ جۇرگىزىلۋدە»، - دەلىنگەن حابارلامادا.

ەسكە سالا كەتسەك، 2022 جىلى دا «Okadzaki» قوعامدىق تاماقتاندىرۋ نىساندارىندا 90-نان استام ادام ۋلانعان ەدى. اتالعان نىساندارعا قاتىستى پوليتسيا باسقارماسى قىلمىستىق ءىس قوزعادى جانە سوت 1 110 900 تەڭگە كولەمىندە ايىپپۇل سالدى. ءبىر وبەكتىنىڭ قىزمەتى توقتاتىلدى.

«قازىر «Okadzaki» مەيرامحاناسىندا جوسپاردان تىس تەكسەرۋ جۇرگىزىلۋدە. سونداي-اق، ەسىل اۋدانىنىڭ پوليتسيا باسقارماسى سوتقا دەيىنگى تەرگەۋدى تىركەدى. قىلمىستىق ءىس قىلمىستىق جازالاناتىن ءىس-ارەكەت بەلگىلەرىنىڭ بولماۋىنا بايلانىستى توقتاتىلعان جاعدايدا، دەپارتامەنت 425-باپتىڭ 2-بولىگى بويىنشا اكىمشىلىك حاتتاما جاسايدى جانە شەشىم قابىلداۋ ءۇشىن سوتقا جولدايدى»، - دەيدى دەپارتامەنت.

فوتو: عالامتوردان

Abai.kz