مادەنيەت جانە اقپارات ءمينيسترى ايدا بالاەۆا شىعارماشىلىق سۋبەكتىلەرىنە سالىقتىڭ جەڭىلدەتىلەتىنىن ايتتى. 

«مەملەكەت باسشىسىنىڭ كرەاتيۆتى يندۋستريانى دامىتۋ جونىندەگى تاپسىرماسىن ورىنداۋ ماقساتىندا ۇلتتىق ەكونوميكا جانە قارجى مينيسترلىكتەرىمەy بىرگە كەشەندى جۇمىس جۇرگىزدىك.

نەگىزگى ماقساتىمىز شىعارماشىلىق سۋبەكتىلەرىنە سالىقتى جەڭىلدەتۋ بولاتىن.

وسى كەشەندى جۇمىستىڭ ناتيجەسىندە ۇكىمەت ( قر ۇق #1240 29.12.2023ج.) قاۋلى قابىلدادى. قاۋلىعا سايكەس 40 قىزمەت ءتۇرى ارنايى بولشەك سالىق رەجيمىنە ءوتتى. بۇل دەگەنىمىز بيزنەس كتس، جەكە تابىس سالىعى، ققس تولەۋدەن بوساتىلعانىن بىلدىرەدى. اتالعان قىزمەت تۇرلەرىمەن اينالىساتىن سۋبەكتىلەر ەندى بىرىڭعاي سالىقتى عانا تولەيدى. بۇل جەكە كاسىپكەرلەر ءۇشىن 2%-دان 4%-عا دەيىن، جشس ءۇشىن 8%-عا دەيىن بولادى. تەك كومپانيانىڭ جىلدىق اينالىمى 2,2 ميلليارد تەڭگەدەن اسپاۋى، ال شتاتتا 200 ادامنان كوپ بولماۋى قاجەت.

سالىقتى جەڭىلدەتۋ كينو، بەينەكونتەنت پەن تەلەباعدارلامالاردى وندىرۋگە جانە ودان كەيىنگى وندىرىسكە، مۋزىكالىق شىعارمالارعا دىبىس جازۋ مەن باسىپ شىعارۋعا، تەاتر جانە مۋزەي ونەرىنە، ساۋلەت جانە ديزاينعا، قولونەر بۇيىمدارىنا، حالىق شىعارماشىلىعىنا جانە كادەسىيلار وندىرىسىنە اسەر ەتەدى.

وسى قولداۋ شاراسىن ازىرلەۋ بارىسىندا حالىقارالىق تاجىريبەنى مۇقيات تالداعانىمىزدى اتاپ وتكىم كەلەدى. ەڭ وزىق ەلدەردىڭ (ۇلىبريتانيا، گەرمانيا، وڭتۇستىك كورەيا) تاجىريبەسى كرەاتيۆتى يندۋستريانى دامىتۋ ءۇشىن سالىقتى جەڭىلدەتۋگە ەرەكشە ءمان بەرۋ كەرەكتىگىن كورسەتەدى»،-دەپ جازدى مينيستر.

بالاەۆانىڭ ايتۋىنشا، اتالعان جۇمىس سالانى اۋقىمدى دامىتۋعا باعىتتالعان العاشقى قادامداردىڭ ءبىرى.

فوتو: اشىق دەرەككوزدەن

Abai.kz