وسكەمەنگە ىرگەسى ءتيىپ جاتقان شىعىس اۋىلىندا تۇراتىن اعايىنداردىڭ اراسىندا ون ساۋساعىنان ونەر تامعان جاس جىگىت بار دەگەندى ەلدەن ەستىپ، سولاي اتتاندىق. ويىمىز - ەكىنىڭ-ءبىرىنىڭ ەنشىسىنە بۇيىرا بەرمەيتىن ەتىكشىلىك ونەرىن، وندا دا دۇڭگىرشەكتە وتىرىپ تابانى تۇسكەن اياق-كيىمدەردى تاس-ءتۇيىن قىلاتىن قاتارداعى جوندەگىش ەمەس، كادىمگىدەي قازاقستاندىق ونىمدەردى ءوز قولىمەن شىعارىپ جاتقان قانداسىمىزبەن تىلدەسۋ، ءبارىن كوزبەن كورۋ ەدى.

نوۆوياۆلەنكا اۋىلىنداعى بۇرىنعى مەكتەپ عيماراتىنىڭ ەكىنشى قاباتىندا ءبىر بولمەگە كىردىك، قازاقتىڭ ورىمدەي جاس ەكى جىگىتى باس كوتەرۋگە مۇرشالارى، كەلمەي قىزۋ ەڭبەك ۇستىندە ەكەن. ەسىكتى اشقان ساتتە بىلعارىنىڭ مۇڭكىگەن ءيىسى تاناۋدى جارىپ كەتتى. تارسىلداعان بالعا مەن ساقىلداعان تىگىن ماشينەسىنىڭ دىبىسى ەستىلەدى قۇلاققا. مويىنعا ىلگەن فوتواپپارات پەن قولعا ۇستاعان قاعاز-قالامدى بايقاپ قالعان بولۋى كەرەك، ەكەۋى دە جۇمىستارىن ءسال توقتاتىپ سالەم بەردى. قازاقى ادەپپەن «تورلەتىڭىزدى» ايتۋدى دا ۇمىتقان جوق. حوش سونىمەن، تانىسىپ-بىلىسكەن سوڭ، كەلگەن ماقساتىمىزدى ءتۇسىندىرىپ، جاس كاسىپكەردى اڭگىمەگە تارتتىق.

 وسكەمەنگە ىرگەسى ءتيىپ جاتقان شىعىس اۋىلىندا تۇراتىن اعايىنداردىڭ اراسىندا ون ساۋساعىنان ونەر تامعان جاس جىگىت بار دەگەندى ەلدەن ەستىپ، سولاي اتتاندىق. ويىمىز - ەكىنىڭ-ءبىرىنىڭ ەنشىسىنە بۇيىرا بەرمەيتىن ەتىكشىلىك ونەرىن، وندا دا دۇڭگىرشەكتە وتىرىپ تابانى تۇسكەن اياق-كيىمدەردى تاس-ءتۇيىن قىلاتىن قاتارداعى جوندەگىش ەمەس، كادىمگىدەي قازاقستاندىق ونىمدەردى ءوز قولىمەن شىعارىپ جاتقان قانداسىمىزبەن تىلدەسۋ، ءبارىن كوزبەن كورۋ ەدى.

نوۆوياۆلەنكا اۋىلىنداعى بۇرىنعى مەكتەپ عيماراتىنىڭ ەكىنشى قاباتىندا ءبىر بولمەگە كىردىك، قازاقتىڭ ورىمدەي جاس ەكى جىگىتى باس كوتەرۋگە مۇرشالارى، كەلمەي قىزۋ ەڭبەك ۇستىندە ەكەن. ەسىكتى اشقان ساتتە بىلعارىنىڭ مۇڭكىگەن ءيىسى تاناۋدى جارىپ كەتتى. تارسىلداعان بالعا مەن ساقىلداعان تىگىن ماشينەسىنىڭ دىبىسى ەستىلەدى قۇلاققا. مويىنعا ىلگەن فوتواپپارات پەن قولعا ۇستاعان قاعاز-قالامدى بايقاپ قالعان بولۋى كەرەك، ەكەۋى دە جۇمىستارىن ءسال توقتاتىپ سالەم بەردى. قازاقى ادەپپەن «تورلەتىڭىزدى» ايتۋدى دا ۇمىتقان جوق. حوش سونىمەن، تانىسىپ-بىلىسكەن سوڭ، كەلگەن ماقساتىمىزدى ءتۇسىندىرىپ، جاس كاسىپكەردى اڭگىمەگە تارتتىق.

– بۇل ونەر ماعان اكەمنىڭ قانىمەن، انامنىڭ سۇتىمەن بەرىلدى. وقىعان-توقىعان تۇگىم جوق. نەگىزگى ماماندىعىم - تەحنيكالىق سالانىڭ قىزمەتكەرى. سويتسە دە، قولدان كەلەتىن ءىس بولعاندىقتان، وسى كاسىپپەن اينالىسۋدى ءجون كوردىم. مۇنداعى ەڭ باستى ماقسات - ۇلتتىق ناقىشى بار زامان تالابىنا ساي ساپالى اياق كيىمدەردى تىگۋ ارقىلى ۇلتتىق برەندتى قالىپتاستىرۋعا ۇلەس قوسۋ. «شەتەلدىك وندىرۋشىلەردىڭ ءبارى شىعارىپ جاتقان دۇنيەگە ءبىزدىڭ نەگە شامامىز جەتپەيدى؟» دەگەن نامىس جىگەرىمدى قامشىلاپ، اقىرى ىسكە بەل بۋدىم، - دەيدى سامعاۋ ءناسىپحانۇلى.

تالاپتى جاستىڭ بۇل تالپىنىسىن جەرگىلىكتى اتقارۋشى بيلىك جەردە قالدىرماي، قولداۋ ءبىلدىرىپ، «جۇمىسپەن قامتۋ – 2020» باعدارلاماسىمەن 2 ميلليون تەڭگە نەسيە الۋعا كومەكتەسىپتى. وسى قارجىعا ول قىتايدان تىگىن ماشينەسىن جانە كاسىبىنە قاجەتتى باسقا دا قۇرال-جابدىقتار ساتىپ الىپ، ىسكە كىرىسكەن. باستاپقىدا بىلعارىنى قىتايدان اكەلىپ ءجۇرىپتى، بىراق كەيىن ول جاقتا شيكىزات باعاسى كوتەرىلىپ كەتكەندىكتەن، سەمەي مەن الماتىدان تاسىمالداي باستاعان. ال ەتىكتىڭ تاباندارىن (رەسەيدە جاسالعان ونىمدەر) وسكەمەننىڭ وزىنەن ساتىپ الىپ ءجۇر.

نەگىزىنەن مۇندا ەر ادامدار مەن ايەلدەردىڭ اياق كيىمدەرى تاپسىرىسپەن تىگىلەدى. سەبەبى ەندى عانا اياقتانىپ كەلە جاتقان كاسىپ يەسىنە تاپسىرىسسىز ءونىم شىعارۋ پايداسىز. بۇرىنعىداي ەمەس، قازىر كەز-كەلگەن بازاردا، ساۋدا ورىندارىندا ەتىك-باتەڭكەلەردىڭ ءتۇر-ءتۇرى سىقاپ تۇر. قالاعانىڭىزدى الىپ كيەسىز. ولارمەن باسەكەلەسۋ ءۇشىن، اۋەلى ءوز ءونىمىڭىزدىڭ جوعارى سۇرانىسقا ساي كەلەتىندەي تانىمالدىعىن ارتتىرۋ كەرەك.

سامعاۋدىڭ تىككەن ەتىكتەرى ساپالى ەكەن

مىنە، وسىنى بەك تۇيسىنگەن كاسىپكەر ءبىرىنشى كەزەكتە تاۋاردىڭ ساپالى، ال باعاسىنىڭ قولجەتىمدى بولۋىنا دەن قويسا، ەكىنشىدەن، ۇلتتىق ناقىشتا بەزەندىرىلۋىن مۇرات تۇتادى. ونىڭ ايتۋىنشا، ەتىكتەردىڭ ەڭ تومەنگى باعاسى 3,5 مىڭ تەڭگەدەن باستاپ وزىندىك شىعىندارىنا بايلانىستى جوعارىلاي بەرەدى. ەش قوسپاسى جوق تازا بىلعارىعا بەينەلەنگەن قازاقتىڭ ويۋ-ورنەگى زاماناۋي ۇلگىدەگى اياق كيىمدەردىڭ ءسانىن اشىپ، تاماشا ۇيلەسىم تاپقان. جۋىق ارادا «ارلان» تاۋارلىق بەلگىسىمەن ونىمدەر ءوندىرۋدى قولعا الماقشى.

– بۇيىرتسا، الداعى كۇندەرى «ارلان» دەگەن جازۋى بار اياق-كيىمدەر سەرياسىن شىعارامىز دەپ جوسپارلاپ وتىرمىز. ول ءۇشىن قارجى دا، مۇمكىندىگىمىز دە جەتكىلىكتى. الدىڭعى نەسيەگە العان قارجىنىڭ ۇستىنە تاعى قوسىمشا وبلىستىق جاستار ساياساتى ماسەلەلەرى باسقارماسىنىڭ كومەگىمەن بۇۇ-نىڭ گرانتىن الدىم. باسقارما باسشىسى جاسۇلان سارسەباەۆ اعامىز مەنى ءوزى ىزدەپ كەلىپ، جاس كاسىپكەرلەرگە قانداي قولداۋلار كورسەتىلەتىنى تۋرالى ءتۇسىندىردى. سونىڭ ناتيجەسىندە 1,5 ملن. تەڭگە كولەمىندە قارجىعا يە بولدىم، - دەپ ءسوزىن جالعاستىرعان ول كاسىپكەرلىكتى دامىتۋعا وبلىس باسشىسىنان باستاپ، بارلىق جاۋاپتى وكىلدەر جەتە كوڭىل ءبولىپ، قولداۋ كورسەتىپ وتىرعانىن جاسىرمادى.

ايتپاقشى، بۇدان بىلاي «ارلان» اتاۋىمەن اياق كيىمدەرمەن قاتار بىلعارى ماتەريالدان تىگىلەتىن بەلدىكتەر جانە ساعات باۋلارى دا ساتىلىمعا تۇسپەك. تاۋار بەلگىسىن «ارلان» دەپ تاڭداپ الۋدىڭ وزىندىك سەبەبى بار ەكەن. تۇركىلەر ءپىر تۇتقان كوك ءبورى قازاق ءۇشىن قاشان دا قاستەرلى اڭ دەيدى ول.

كەلەشەك جوسپارىمەن بولىسكەن سامعاۋ اڭگىمە اراسىندا، ۇلكەن ءبىر فابريكا اشسام، ادامداردى جۇمىسقا تارتسام، ەل نارىعىندا وتاندىق ونىمدەردىڭ ويىپ تۇرىپ ورىن الۋىنا ۇلەس قوسسام» دەگەن ويىن جەتكىزدى. قازىر تىگىن تسەحىندا ءتورت ادام ەڭبەك ەتۋدە. ولار الاتىن ايلىق تابىستىڭ ەڭ تومەنگى مولشەرى - 35-40 مىڭ تەڭگە.

دۇرىس، قۇپتارلىق وي. ءبىر جاقسىسى، جاس كاسىپكەردىڭ بۇعان تالاپ-جىگەرى، ەڭ باستىسى، قابىلەتى جەتىپ تۇر. قارجى تاۋىپ بەرىپ، قولتىعىنان ءسال دەمەپ جىبەرسە، بولعانى. ولاي دەيتىنىم، الەمگە ايگىلى برەندتىك ەتىكتەردىڭ كوشىرمەسىن كوز الدىڭىزدا اينىماستاي ەتىپ تىگىپ بەرەتىن ونىڭ قولىنان ءالى تالاي ەرەكشە دۇنيەلەردىڭ شىعاتىنىنا سەنىم مول.

سەرىك ءابىلحان، ارنايى Abai.kz اقپاراتتىق پورتالى ءۇشىن. شىعىس قازاقستان وبلىسى