جۇما, 20 قىركۇيەك 2024
1286 0 پىكىر 19 قاڭتار, 2024 ساعات 14:52

قوينىنا كونۆەرت تىققان شەنەۋنىك: اقتوبە» اكك» تەكسەرىلىپ جاتىر

الەۋمەتتىك جەلىدە «اقتوبە» اكك» اق باسقارما توراعاسىنىڭ ءبىرىنشى ورىنباسارى رۋسلان ءاجنيازوۆ كونۆەرت بەرىپ، وبلىس اكىمىنىڭ ورىنباسارى عالىمجان ەلەۋوۆتىڭ كومەكشىسى دەگەن ادامنىڭ ونى الىپ جاتقان ۆيدەوسى تاراپ كەتتى. قازىر وسى وقيعاعا بايلانىستى قىزمەتتىك تەكسەرۋ ءجۇرىپ جاتىر. 

ۆيدەودان «اقتوبە» اكك» اق باسقارما توراعاسىنىڭ ءبىرىنشى ورىنباسارى رۋسلان ءاجنيازوۆتىڭ كونۆەرت سەكىلدى زاتتى بەرىپ جاتقانى، ال عالىمجان ەلەۋوۆتىڭ كومەكشىسى دەپ جازىلعان ادامنىڭ ونى الىپ، قوينىنا جاسىرعانىن كورۋگە بولادى.

قازىرگى كەزدە «اقتوبە» اكك» اق-دا قىزمەتتىك تەكسەرۋ باستالدى.

- ۆيدەو الەۋمەتتىك جەلىگە تاراپ كەتتى. ءبىز دە كوردىك. قازىرگى كەزدە قىزمەتتىك تەكسەرۋ باستالدى. بارلىعى جان-جاقتى تەكسەرىلگەن سوڭ قورىتىندىسىن حابارلايمىز. ۆيدەوداعى ادام - «اقتوبە» اكك» اق باسقارما توراعاسىنىڭ ءبىرىنشى ورىنباسارى رۋسلان ءاجنيازوۆ. سونىمەن بىرگە ول جەردە وبلىس اكىمىنىڭ ورىنباسارى عالىمجان ەلەۋوۆتىڭ كومەكشىسى دەپ جازىلعان. تۇراقتاندىرۋ قورى مەن تۇرعىن ءۇي-كوممۋنالدىق شارۋاشىلىقتى جاڭعىرتۋعا جاۋاپتى رۋسلان ءاجنيازوۆ قازىر جينالىستا. بۇل جەردە قىزمەتتە جۇرگەنىنە ەكى اي بولدى. تەكسەرۋدى «اقتوبە» اكك» اق-نىڭ كادر ءبولىمى جۇرگىزەدى، - دەدى «اقتوبە» اكك» اق باسقارما توراعاسىنىڭ ورىنباسارى نارەك گەگاميان.

ول قىزمەتكەرلەردىڭ سىياقىسى قانشا ەكەنىن بىلمەيدى، بىراق جىل سوڭىندا سىياقى بەرىلگەنىن جاسىرمادى. «اقتوبە» اكك» اق-دا بارلىعى 80 ادام ەڭبەك ەتەدى.

ءمان-جايدى اقتوبە وبلىسىنىڭ اكىمدىگى دە ءتۇسىندىردى.

- اقتوبە وبلىسى اكىمىنىڭ ورىنباسارى عالىمجان ەلەۋوۆتىڭ قاتىسى بار ما، جوق پا، ول جاعىن بىلمەيمىز. قازىر ىشكى تەكسەرۋ جۇمىسى ءجۇرىپ جاتىر. سول كەزدە انىقتالادى. سودان كەيىن عانا شەشىمىن حابارلايمىز. ۆيدەوداعىنىڭ ءبىرى «اقتوبە» اكك» اق-ى باسقارما توراعاسىنىڭ ءبىرىنشى ورىنباسارى رۋسلان ءاجنيازوۆ، ەكىنشىسى بۇرىن وبلىس اكىمدىگىندە جۇمىس ىستەگەن. ءبىز ونى ارا-تۇرا كورەتىنبىز، بىراق اكىمدىكتە قىزمەتكەر ەمەس. ال اقتوبە وبلىسى اكىمىنىڭ ورىنباسارى عالىمجان ەلەۋوۆ جۇمىستا، جينالىستا، - دەدى اقتوبە وبلىسى اكىمىنىڭ ءباسپاسوز حاتشىسى گۇلباعدا كوبەەۆا.

ايتا كەتەيىك، قىزمەتتىك تەكسەرۋ ناتيجەسى 10 كۇن ىشىندە شىعارىلادى.

Abai.kz

0 پىكىر