ەلىمىزدە ءبىر جىل ىشىندە وتباسىلىق-تۇرمىستىق زورلىق-زومبىلىقتان 69 ايەل مەن 7 بالا قازا تاپتى. بۇل تۋرالى سەنات دەپۋتاتى جاننا اسانوۆا مالىمدەدى.

2023 جىلى وتباسىلىق-تۇرمىستىق زورلىق-زومبىلىق فاكتىلەرى بويىنشا 99 مىڭنان استام ءوتىنىش كەلىپ تۇسكەن، بالالارعا جاسالعان قىلمىس سانى - 2452.

«وسى ۋاقىت ارالىعىندا ەشكىمدى بەي-جاي قالدىرماعان، رەزونانس تۋدىرعان بىرنەشە وقيعا بولدى. ەستەرىڭىزدە بولسا، سەنات دەپۋتاتتارى ۇكىمەتكە سۇراۋ جىبەرگەن بولاتىن. جاۋاپ تەز ارادا كەلدى، دەگەنمەن ناقتى جاۋاپتى كۇتىپ، سىزدەرگە جاڭالىقتى جاريالاماعان ەدىم»، - دەدى دەپۋتات.
جاننا اسانوۆانىڭ ايتۋىنشا، وتباسىلىق-تۇرمىستىق زورلىق-زومبىلىققا قارسى زاڭعا وزگەرىستەر ەنگىزۋ تۋرالى زاڭ جوباسى دايىن، تاياۋدا ءماجىلىس تالقىسىنا بەرىلەدى.

«تۇتاستاي العاندا، زورلىق-زومبىلىققا قارسى كۇرەستە ادام قۇقىقتارى دەگەنىمىز - جەكە باس قاۋىپسىزدىگىنە كەپىلدىك بەرۋ، فيزيكالىق جانە پسيحولوگيالىق زورلىق-زومبىلىقتان قورعاۋ، سوت قورعاۋى مەن ءادىل سوت ءىسىن جۇرگىزۋ. زاڭ زورلىق-زومبىلىق كورىنىستەرىنىڭ الدىن الۋعا جانە جولىن كەسۋگە، سونداي-اق ونى جاساعاندار ءۇشىن ءادىل جازانى قامتاماسىز ەتۋگە باعىتتالعان»،-دەپ جازدى دەپۋتات.

فوتو: elitar.kz

Abai.kz