الماتى اكىمدىگى قالانى جارنامالاۋ ءۇشىن 80 ملن تەڭگە بيۋدجەت قارجىسىنا شەتەلدىك بلوگەرلەردى جالداماق. بۇل تۋرالى Arbat.media جازدى.

شەتەلدىكتەرگە ارنالعان تۋردى وتكىزۋگە ارنالعان تەندەردى الماتى قالاسىنىڭ تۋريزم باسقارماسى جاريالاعان. تەحنيكالىق سيپاتتامادا ءار تۋرعا 30 ادام قاتىساتىنى اتاپ وتىلگەن. جالپى ءۇش تۋرعا كەلگەن قوناقتاردىڭ سانى – 90 ادام.

تۋردىڭ بارلىق قاتىسۋشىلارى بارۋ-قايتۋعا ەكونوم-كلاستىق اۆيابيلەتتەرمەن، كۇنىنە ءۇش رەت تاماقتانۋ كىرەتىن ءتورت جۇلدىزدى قوناقۇيمەن قامتاماسىز ەتىلەدى. سونىمەن قاتار ولارعا ترانسفەر ۇسىنىلادى.

بلوگەرلەر تۇركيا، ءباا، كاتار، ساۋد ارابياسى، قىتاي، وڭتۇستىك كورەيا، سينگاپۋر، ۇلىبريتانيا، مالايزيا، يتاليا جانە گەرمانيادان كەلەدى.

قوناقتاردىڭ ناقتى ءتىزىمى ءالى بەلگىسىز، ول ءالى قالانىڭ تۋريزم باسقارماسىمەن كەلىسىلەدى.

شەتەلدىكتەرگە كوك بازار، مەدەۋ، شىمبۇلاق، الماتى مۇراجايلارى مەن تەاترلارى، ساياباقتار، اربات، شارىن كانونى، كولساي، ءانشى بارحان، سۇڭقار پيتومنيگى، عۇندار ەتنواۋىلى جانە الماتىداعى باسقا دا تانىمال ورىنداردى كورسەتۋ جوسپارلانۋدا.

سونداي-اق، بلوگەرلەرگە قازاق تاعامدارىن دايىنداۋ بويىنشا ماستەر-كلاسس وتكىزىلەدى، ۇلتتىق كادەسىيلار بەرىلەدى. قازاقتىڭ ءداستۇرلى ويىندارى ويناتىلادى.

اقپاراتتىق تۋر تۋرالى جاڭالىقتار جەرگىلىكتى باق-تا جاريالانادى، سونىمەن قاتار دەلەگاتتارمەن 10 بەينە سۇحبات قۇرىلادى، وندا ولار تۋر تۋرالى ءوز اسەرلەرىمەن بولىسەدى. ءار تۋردىڭ ۇزاقتىعى – 5 كۇن.

فوتو: visitalmaty

Abai.kz