«الداعى ايلار ۋكراينا ءۇشىن وتە تاۋەكەلدى بولادى»،- دەپ مالىمدەدى اق ءۇيدىڭ ۇلتتىق قاۋىپسىزدىك كەڭەسىندەگى ستراتەگيالىق كوممۋنيكاتسيالار جونىندەگى ۇيلەستىرۋشىسى دجون كيربي بريفينگتە.

ۆاشينگتوننىڭ كيەۆكە كومەك كورسەتۋ ءۇشىن قوسىمشا قاراجات ءبولۋى تۋرالى ايتا كەلە، كيربي: «الداعى ەكى اي ۋكراينا ءۇشىن قيىن بولادى»، - دەپ اتاپ ءوتتى.

«ەگەر ءسىز قاردىڭ جاۋىنان ۇرىس توقتايدى دەپ ويلاساڭىز، وندا تاعى دا ويلانىڭىز»، - دەدى ول.

كيربيدىڭ ايتۋىنشا، ۋكراين اسكەريلەرى قانداي قارۋدى قولدانۋ كەرەكتىگىنە قاتىستى «قيىن تاڭداۋ» جاساۋعا ءماجبۇر، سەبەبى ولار «كەلەسى جەتكىزىلىم قاشان بولاتىنىن بىلمەيدى»:

كيربي سونداي-اق اقش پرەزيدەنتى دجو بايدەننىڭ بريتاندىق پرەمەر-مينيستر ريشي سۋناكپەن تەلەفون ارقىلى سويلەسكەنىن، وندا ۋكرايناعا كومەك كورسەتۋ تاقىرىبى كوتەرىلگەنىن ايتتى:

«ولار سونداي-اق ۋكراينا تۋرالى جانە ۋكراينانىڭ قازىرگى كەزدەگى قاجەتتىلىگى تۋرالى، قوسىمشا قارجىلاندىرۋ جانە ونىڭ ۇرىس الاڭىندا ءوزىن-ءوزى قورعاۋ قابىلەتىن قولداۋ تۋرالى ايتتى»، - دەدى كيبري.

اق ءۇيدىڭ ايقىن ستراتەگياسى بار ما جانە ۆاشينگتون ۋكراينا ءۇشىن قانداي ماقساتتارعا قول جەتكىزگىسى كەلەدى؟ بۇل سۇراققا دجون كيربي اق ءۇيدىڭ ستراتەگياسى ارقاشان اشىق ءارى ايقىن بولعانىن ايتتى.

«ءبىز ۋكراينانىڭ بۇل سوعىستا جەڭىسكە جەتۋىن قالايمىز، ءبىز گۇلدەنگەن، ەگەمەندى ۋكراينانى كورگىمىز كەلەدى. ءبىز ۋكراينانىڭ حالىقارالىق دەڭگەيدە مويىندالعان شەكارالارىنىڭ بارلىعى، سونىڭ ىشىندە پۋتين مىرزا دا تولىق مويىندالۋىن قالايمىز. ءبىز وسى ماقساتتارعا جەتۋ ءۇشىن ۋكراينانىڭ قولداۋىن جالعاستىرۋ مۇمكىندىگىنە يە بولعىمىز كەلەدى»، - دەدى.

ەندى مايدانداعى جاعدايعا كوز جىبەرەر بولساق:

رەسەيلىكتەر اۆدەەۆكاعا كىردى. اۆدەەۆكانىڭ وڭتۇستىك-شىعىسىنداعى «تسارسكايا وحوتا» قارۋلى كۇشتەرىنىڭ نىعايتىلعان اۋدانىن رەسەيلىكتەر باسىپ العاننان كەيىن، رف اسكەرى قالانىڭ وزىنە كىردى.

«سترانا.ua» جازۋىنشا، جەلىدە رەسەيلىك اسكەريلەردىڭ قالانىڭ وڭتۇستىك شەتىندەگى سپورتيۆنايا، سوبورنايا جانە چەرنىشەۆسكي كوشەلەرىنىڭ بويىمەن ءجۇرىپ-تۇرۋى بەينەلەنگەن.

امەريكاندىق سوعىستى زەرتتەۋ ينستيتۋتى انىقتاعان كادرلاردا رەسەيلىك اسكەرلەر «تسارسكايا وحوتا» مەيرامحاناسى ماڭىندا جانە سوبورنايا كوشەسى بويىندا ىلگەرىلەگەنى كورىنەدى.

سونىمەن قاتار، ۋكراينالىق اسكەري شولۋشى كونستانتين ماشوۆەتس رەسەيلىك اسكەرلەر اۆدەەۆكادا كولوسوۆ جانە لەرمونتوۆ كوشەلەرىمەن قوزعالعانىن مالىمدەدى.

رەسەيلىك تەلەگرام-ارنالار اۆدەەۆكانىڭ وڭتۇستىگىندەگى قارۋلى كۇشتەردىڭ جوعالعان پوزيتسيالارىن قايتارۋ ماقساتىنداعى كۇشتى قارسى شابۋىلدارى تۋرالى جازادى، بىراق رف ارمياسى پوزيتسياسىن ساقتاپ قالدى دەپ مالىمدەيدى.

ۋكراينا بۇعان تۇسىنىكتەمە بەرگەن جوق.

رەسەيلىك اسكەري جۇرتشىلىق كەلەشەكتە اۆدەەۆكاداعى رف ارمياسى بۇكىل قالا اتىلىپ جاتقان «9-شى كۆارتال» بيىك عيماراتتارىنىڭ سەكتورلارىن باسىپ الۋعا تىرىسادى دەپ بولجايدى. بىراق، ۋكراينا قارۋلى كۇشتەرى دە رەسەيلىكتەردى قالادان شىعارىپ جىبەرۋگە تىرىسىپ، قارسى شابۋىل جاساۋدا.

ارينە ونى ۋاقىت كورسەتەدى. باتىستىڭ سىلبىرلىعى ۋكراينانى اۋىر جاعدايعا قالدىرىپ وتىرعانى جاسىرىن ەمەس.

Abai.kz