زەلەنسكي جارلىق شىعاردى.

سوبورلىق كۇنىندەگى ءوز قۇتتىقتاۋىندا ۋكراينا پرەزيدەنتى ۆ.زەلەنسكي: «بۇگىن ءبىز ۋكراينا مەن حالقىمىزدىڭ سوبورشىلىعىن نىعايتۋ ءۇشىن عانا ەمەس، سونداي-اق قۇقىقتار مەن بوستاندىقتاردىڭ سوبورشىلىعىن، ۋكرايندىقتار تۋرالى شىندىقتى، ءبىز تۋرالى شىندىقتى جانە ءبىزدىڭ تاريحىمىز تۋرالى شىندىقتى نىعايتۋ ءۇشىن قادامدار جاساۋعا ءتيىسپىز. وسى ماقساتتا مەن بۇگىن «رەسەي فەدەراتسياسىنىڭ ۋكرايندار تاريحي تۇرعىدان قونىستانعان اۋماقتارى تۋرالى» جارلىققا قول قويدىم، - دەدى.

ونىڭ ايتۋىنشا، بۇل ‑ ۋكراينا بولاشاعى ءۇشىن تاريحي شىندىقتى قايتارۋ. سونىمەن بىرگە، بۇل ‑ الەمدى سوعىس جاعدايىنا الىپ كەلگەن رەسەيلىك «ورىس الەمى» ساياساتىنا جاۋاپ. قۇجات ۋكراينا مەملەكەت باسشىسىنىڭ سايتىندا جاريا ەتىلمەگەنىمەن، ءبىز وقىرماندارىمىزدى جارلىقتا ايتىلعانمەن قىسقاشا تانىس ەتپەكپىز:

رەسەيدىڭ كۋبان دالالىق ايماعىندا، قازىرگى كراسنودار ولكەسىنىڭ شەگىندە، بەلگورود، بريانسك، ۆورونەج، كۋرسك جانە روستوۆ وبلىستارىندا جەرگىلىكتى تۇرعىنداردىڭ كوپشىلىگى ۋكراينالىقتار ەكەنى بەلگىلى. سوندىقتان، وسى جارلىققا سايكەس، ول اۋماقتاردا تۇراتىن ۋكراينداردىڭ ۇلتتىق بىرەگەيلىگىن ساقتاۋ جونىندەگى ءىس-قيمىل جوسپارىن ەنگىزۋ تۋرالى قاۋلى قابىلداندى.

سونداي-اق، جارلىققا رەسەيدەگى ەتنيكالىق ۋكراينداردىڭ تاريحي تۇرعىدان قونىستانعان اۋماقتارىندا تۇراتىن (تۇرعان) ۋكرايندارعا قارسى جاسالعان قىلمىستار تۋرالى فاكتىلەر مەن كۋالىكتەردى جيناۋ جانە زەردەلەۋ تۋرالى ارنايى باپ ەنگىزىلدى.  ول ۋكرايندارعا قارسى جاسالعان ساياسي قۋعىن-سۇرگiندەر مەن دەپورتاتسيالاردى اشىق كورسەتۋ، سول ارقىلى جەرگىلىكتى ۋكراينداردىڭ تاريحي جادىن قالپىنا كەلتiرۋ جانە ساقتاۋ، ماجبۇرلەپ رەسەيلەندiرۋ ساياساتىنىڭ بەت پەردەسىن اشۋ كوزدەلەدى. وسى كورسەتiلگەن ماسەلەلەر بويىنشا ورتالىق قۇرۋ تۋرالى شەشىم شىعارىلدى.

ال، زەلەنسكي جارلىعىنىڭ كەڭ ماعىناداعى ماقساتى مىنادا:

‑ رەسەي فەدەراتسياسىنىڭ رەسەيدەگى قازىرگى ۋكرايندار مەن قۇلدىققا العان بارلىق حالىقتاردىڭ تاريحى بويىنشا دەزينفورماتسياعا جانە ناسيحاتتاۋعا قارسى ءىس-قيمىل جۇمىسىن جانداندىرۋ;

ۋكراينا تۋرالى رەسەيلىك «اڭىزداردىڭ» ناتسيستىك مازمۇنى مەن اگرەسسيالىق سيپاتىن اشەكەرەلەۋ مەن ونى وزگەرتۋگە باعىتتالعان ءىس-شارالاردى دايىنداۋ جانە وتكىزۋ;

ۋكرايندار مەن بۇگىندە رەسەي قۇلدىقتا ۇستاپ وتىرعان بارلىق حالىقتار اراسىنداعى ءوزارا ءىس-قيمىلدى دامىتۋ;

ءارتۇرلى تاريحي كەزەڭدەردە ۋكراينا مەملەكەتىنىڭ تاريحىن، بۇگىنگى ەتنيكالىق ۋكرايندار مەكەندەگەن ايماقتار مەن ۋكراينانىڭ مەملەكەتتىك قۇرىلىمدارى اراسىنداعى تاريحي بايلانىستاردى قالپىنا كەلتىرۋ;

سول تۋرالى ماتەريالداردى دايىنداۋ جانە ونى ۋكراينادا جانە الەمدە تاراتۋدى قامتاماسىز ەتۋ;

رەسەي فەدەراتسياسىنىڭ شەگىندەگى تاريحي ەلدى مەكەندەردە ەتنيكالىق ۋكراينداردىڭ شىنايى تاريحىن وقۋ ورىندارىنىڭ وقۋ باعدارلامالارى مەن وقۋلىقتارىنا ەنگىزۋ;

مىنە، وسىلاي، بۇگىن «كەكىلدىلەر» دەگەن اتپەن اتى شىققان ەرلەر ەرلەدى. ولار وزدەرىنىڭ وتانىن قورعاۋدا جانكەشتىلىگىمەن الەمگە ۇلگى بولىپ وتىر. وسىعان قاراي وتىرپ، ءبىر كەزدەردەگى ۇشان‑قيان جەرىنەن ايىرىلعان الاش جۇرتى دا وسىنداي «جارلىق» شىعارۋعا ءداتى بارا ما، بارماي ما دەپ تە ويلايسىڭ...

ونى ۋاقىت كورسەتەدى، ەندى...

Abai.kz