اۆتوبۋسپەن بىرگە جەر استىنا ءتۇسىپ كەتكەن قۇتقارۋشىلاردى ىزدەۋگە ايگۇل ەسىمدى كورىپكەلدىڭ مايقايىڭعا كەلگەنى تۋرالى اقپار تاراعان ەدى. توتەنشە جاعداي دەپارتامەنتى بالگەردى تابىلماي جاتقان ازاماتتاردىڭ تۋىستارى شاقىرتقانىن حابارلادى. 

پاۆلودار وبلىستىق توتەنشە جاعدايلار دەپارتامەنتىنىڭ باسشىلىعى مايقايىڭداعى ويىققا كورىپكەلدىڭ كەلۋىنە ءبىزدىڭ ەش قاتىسىمىز جوق دەپ مالىمدەدى.

— تج جونىندەگى دەپارتامەنتىنىڭ بۇل كورىپكەلدىڭ كەلۋىنە ەشقانداي قاتىسى جوق، قايعىلى وقيعا ورنىنا ىزدەلىپ جاتقان قۇتقارۋشىلاردىڭ تۋىستارى شاقىرتقان. ولاردىڭ بۇل ارەكەتىنە ەشقانداي ۆەدومستۆو كەدەرگى كەلتىرە المايدى. كورىپكەل ايەل تۋىستارىمەن بىرگە، ويىقتان قاۋىپسىز اراقاشىقتىقتا تۇردى. قۇتقارۋشىلار جۇرگىزىپ جاتقان ىزدەستىرۋ-قۇتقارۋ جۇمىستارىنا جاقىنداعان جوق. توتەنشە جاعداي ماماندارى مەن وزگە دە ماماندار نۇسقاۋلىققا سايكەس جۇمىس ىستەپ جاتىر. جۇمىستا توپىراقتىڭ قوزعالۋىن سكانەرلەيتىن تەحنيكا، گەولوگيالىق سكانەر جانە مەتالل ىزدەگىش قولدانىلۋدا. سونداي-اق ويىقتىڭ تۇبىندە كينولوگيالىق توپ ىزدەستىرۋ شارالارىن جۇرگىزىپ جاتىر. جۇمىس باعىتىمىز ارنايى اسپاپتاردىڭ كورسەتكىشتەرى نەگىزىندە تۇزەتىلىپ وتىرادى، -دەپ حابارلادى وڭىرلىك توتەنشە جاعدايلار دەپارتامەنتىنىڭ ءباسپاسوز قىزمەتىنەن.

ەسكە سالا كەتسەك، مايقايىڭالتىن اۋماعىندا قۇتقارۋشىلار قاۋىپتى جاعدايدا جۇمىس ىستەپ جاتىر.

ويىق تۇبىنە تۇسىرىلگەن ەكى شاعىن ەكسكاۆاتور جەر قازۋ جۇمىستارىن اتقارۋدا.

بۇعان دەيىن ويىق استىنداعى توپىراقتان اۆتوبۋستىڭ شاناعى مەن قۇتقارۋشىلاردىڭ سومكەسى جانە وزگە دە زاتتار تابىلدى.

فوتو: پاۆلودار وبلىستىق تجد

Abai.kz