بەلسەندى بوتاگوز يسا رۋزا بەيسەنبايتەگىن «كۇشپەن» الىپ كەتكەنىن جازعان ەدى. ەندى وسىعان قاتىستى رەسمي بيلىك تومەندەگىدەي ءوز جاۋابىن بەرگەنىنە كۋا بولدىق.

وندا: «اعىمداعى جىلدىڭ 24-قاڭتار كۇنى ساعات 16:20 شاماسىندا 103 نومىرىنە پاۆلودار قالاسىندا ايەل ادام كوشەدەگى ازاماتتارعا اگرەسسيا تانىتىپ جاتقانى تۋرالى حابارلاما كەلىپ ءتۇستى.

وقيعا ورنىنا كەلگەن مەديتسينالىق بريگادا پسيحيكالىق اۋىتقۋلارى بەلگىلەرىمەن 66-جاستاعى ايەل ادامدى ر.ب. پاۆلودار وبلىستىق پسيحيكالىق دەنساۋلىق ساقتاۋ ورتالىعىنا جەتكىزدى.

ورتالىق دارىگەرلەرى تاراپىنان ناۋقاسقا ەكى كۇن بويى ەم قابىلداۋ شارالارى جاسالدى. مەديتسينا قىزمەتكەرلەرىنىڭ قاراۋىنان كەيىن دەنساۋلىق جاعدايىنىڭ جاقسارۋىنا وراي، كونسيليۋم شەشىمىمەن ناۋقاس ديسپانسەرلىك باقىلاۋ ۇسىنىسىمەن ۇيىنە قايتارىلدى.

دەنساۋلىق ساقتاۋ سالاسىنداعى زاڭناماعا سايكەس، الداعى ۋاقىتتا ناۋقاستىڭ پسيحيكالىق اۋىتقۋلارى ناشارلاپ، اينالاسىنداعى ادامدارعا زيان كەلتىرۋ ىقتيمالدىعى قايتا بايقالعان جاعدايدا، ول ەمدەۋگە جىبەرىلەتىن بولادى»، - دەلىنگەن.

Abai.kz