قازاقستاندا 2023 جىلعى ستاتيستيكالىق دەرەك بويىنشا، 18 جاسقا دەيىنگى مۇمكىندىگى شەكتەۋلى 188 مىڭ 144 بالا ەسەپتە تۇر. ولاردىڭ 132 مىڭ 699-ى مەكتەپ جاسىنداعى بالالار بولسا، 47 مىڭ 726-ى مەكتەپكە دەيىنگى بۇلدىرشىندەر، ال سابيلەر سانى – 7 مىڭ 719.

مۇمكىندىگى شەكتەۋلى بالالاردى دامىتىپ، قوعامنىڭ تەڭ مۇشەسىنە اينالدىرۋدىڭ نەگىزگى تەتىگى – ءبىلىم بەرۋ. ەلىمىزدە مۇگەدەك بالالاردى وقىتۋدىڭ ءارتۇرلى نۇسقاسى قاراستىرىلعان: ۇيدەن وقىتۋ، قاشىقتان وقىتۋ، ارنايى مەكتەپتەر مەن ينتەرناتتاردا ءبىلىم بەرۋ جانە جالپى ءبىلىم بەرەتىن مەكتەپتەردە تۇزەتۋ سىنىپتارى جۇمىس ىستەيدى.

بىراق مەكتەپ قابىرعاسىندا ءوزى قاتارلاس قۇربىلارىمەن بىرگە ءبىلىم الۋ – ەرەكشە جاستاردى الەۋمەتتەندىرۋدىڭ ءتيىمدى جولى ەكەنىن اتاپ وتكەن ءجون. مۇنى ينكليۋزيۆتى ءبىلىم بەرۋ جۇيەسى دەپ اتايدى.

ينكليۋزيۆتى ءبىلىم بەرۋ – بۇل فيزيكالىق، پسيحيكالىق، ينتەللەكتۋالدى جانە باسقا دا ەرەكشەلىكتەرىنە قاراماستان، بارلىق بالانىڭ جالپى ءبىلىم بەرۋ جۇيەسىنە قوسىلۋى.

قازاقستان ينكليۋزيۆتى ءبىلىم بەرۋدى 2011 جىلدان باستاپ كەزەڭ-كەزەڭىمەن قولعا العان. ءبىلىم بەرۋدى دامىتۋدىڭ 2011-2025 جىلدارعا ارنالعان مەملەكەتتىك باعدارلاماسىندا 2025 جىلعا قاراي مەكتەپتەر مەن بالاباقشالاردىڭ 100 پايىزى، كوللەدجدەر مەن جوو-نىڭ 70 پايىزى ينكليۋزيۆتى ءبىلىم بەرۋ باعىتىنا كوشەتىنى ايتىلعان. وكىنىشكە قاراي بۇگىندە مۇمكىندىگى شەكتەۋلى بالالاردىڭ 23 پايىزعا جۋىعى عانا ينكليۋزيۆتى ءبىلىم بەرۋ پروتسەسىنە قاتىسادى ەكەن.

«پەداگوگ اكادەمياسى» قوعامدىق بىرلەستىگىنىڭ ديرەكتورى نۇرىم نۇرعاليەۆتىڭ ايتۋىنشا، ەرەكشە وقۋ جاعدايىن قاجەت ەتەتىن بالالارعا ارنالعان مەملەكەتتىك مەكتەپتەر كوپتەپ اشىلۋى كەرەك.

«ءبىزدىڭ مەكتەپ – ادەتتەگى مەكتەپتىڭ باعدارلاماسىنداي ءبىلىم بەرۋدىڭ بۇكىل تەندەنتسيالارىن ەسكەرە وتىرىپ، ەرەكشە بالالارعا ينكليۋزيۆتى ءبىلىم بەرەتىن رەسپۋبليكاداعى جالعىز مەكتەپ. «پەداگوگ اكادەمياسى» بالالاردىڭ ءبىلىم الىپ، سپورتپەن اينالىسىپ، قوعامعا ارالاسىپ، ۋاقىتىن كوڭىلدى وتكىزەتىن ورتاعا اينالدى. ال ءتورت قابىرعاعا تەلمىرىپ وسكەن بالانىڭ ءبىلىمى جەتكىلىكسىز، قوعامعا ءسىڭىپ كەتۋى دە وتە قيىن بولادى. اششى بولسا دا، شىنى سول. وكىنىشكە قاراي، كوپتەگەن ادامدى وقۋ جانە دامۋ مۇمكىندىگىنەن ايىرىلعان بالالاردىڭ تاعدىرى الاڭداتپايدى. ەلىمىزدە دە مۇنداي بالالار ءۇشىن ارنايى مەكتەپتەر قاراستىرىلماعان»،-دەدى پەداگوگ.

نۇرىم نۇرعاليەۆتىڭ ءوزى دە ەرەكشە بالانىڭ اكەسى.

ول مۇمكىندىگى شەكتەۋلى بالالارعا كومەكتەسۋ ءۇشىن ءوز ءۇيىن مەكتەپ عيماراتىنا اينالدىرعان. قازىر 1-4 سىنىپ ارالىعىنداعى 120 بالانى قابىلدايتىن وقۋ ورداسىندا كومپيۋتەرلىك سىنىپ، حورەوگرافيا زالى، ءاداپتيۆتى دەنە شىنىقتىرۋ كابينەتى بار. سونىمەن قاتار، اۋدانى 160 شارشى مەتر اشىق سپورت الاڭى جانە رەكرەاتسيا ايماعى بار. ينكليۋزيۆتى مەكتەپتىڭ بارلىق بولمەسى بەينەباقىلاۋمەن جابدىقتالعان. مەكتەپ كادرلارى بىلىكتى پەدەگوگتاردان جاساقتالعان.

نۇرىم نۇرعاليەۆ تاعى وسىنداي 8 مەكتەپ اشۋدى جوسپارلاپ وتىر.

ايتا كەتەيىك، 1 اقپاندا «پەداگوگ اكادەمياسى» مەكتەبىنىڭ اشىلعانىنا جىل تولادى. ەرەكشە بالالارعا بەي-جاي قارامايتىن، اتاۋلى ءىس-شارانىڭ مەيمانى بولعىسى كەلگەن كەز-كەلگەن ازاماتقا وقۋ ورداسىنىڭ ەسىگى اشىق.

مەكەن جايى: الماتى قالاسى، شۇعىلا شاعىن اۋدانى، نۇرلى تاڭ، 23.

ۋاقىتى: 16:00

بايلانىس ءنومىرى: +7 707 884 54 96, +7 701 316 76 54

سۋرەتتەر: «پەداگوگ اكادەمياسى» مەكتەبىنىڭ Instagram پاراقشاسىنان

Abai.kz